याकब 5

सेठ लोगा लै चतैनगी

1ओ सेठ मणछो, तम्हैं बी लआ शूणीं, तम्हैं लाआ आपणीं आजू एछणैं आल़ी खरी लै लैल़ा। 2थारी ज़ैदात हणीं बरैबाद, अर थारै झिकल़ै लै लागणै ल्हऐ। 3थारै सुन्‍नैं-च़ंदी दी गई खई लागी अर तैहा खई खाणअ थारअ मास्स आगी ज़िहअ। अह ज़ैदात ज़ुंण तम्हैं कठा आसा किई दी एता दैणीं खिरी थारै खलाफ शाजत ज़ेभै परमेशरा नसाफ करनअ।

4हेरा, ज़ुंणी मज़दूरै थारै खेचै लऊंणेओ काम किअ, तिन्‍नें मज़दूरी ज़ुंण तम्हैं धोखअ दैई खाई, सह लागी लैल़ा लांदी, अर तिन्‍नां लऊंणे आल़ेए लेरा पकारा गई स्वर्गे सैने प्रभू सेटा पुजी।#बधा. 24:14,15

5तम्हैं रहै पृथूई दी आल-मस्ती दी लागी, अर तम्हैं हेरअ खास्सअ सुख भोग करी। आपणीं दिले च़ाहा पूरी करै आसा तम्हैं इहै मोट्टै हुऐ दै ज़िहै काटणा लै गाभू। 6तम्हैं पाअ धर्मीं दोशी बणाईं करै मारी ज़ुंणी थारअ किछ़ै निं बगाल़अ त।

सबर करनअ

7भाईओ, प्रभू एछणैं तैणीं करा सबर, हेरा, कृषाण बी करा पृथूईए किम्मती फल़े आशा डाही करै पैहली अर खिरी हणैं आल़ी बरसाती तैणीं सबर।#बधा. 11:14

8इहअ ई करा तम्हैं बी सबर, अर आपणैं दिला करा मज़बूत, किल्हैकि प्रभू एछणें शुभ धैल़ी आसा नेल़। 9भाईओ, एकी-दुजै लै निं दोश लाई नसाफ करदै निं फिरा, ताकि तम्हां लै बी कुंण दोश नां लाऐ, हेरा, ईशू आसा छ़ेक्‍कै एछणैं आल़अ अर तेऊ करनअ म्हारअ नसाफ तम्हैं समझ़ा इहअ कि सह आसा दुआरै खल़्हुअ द।

10भाईओ, ज़ुंणी परमेशरे गूरै प्रभूए नाओंऐं गल्‍ला किई, तिन्‍नां समझ़ा दुख ज़िरनै अर सबर करना लै आपणअ आदर्श। 11हाम्हां का थोघ निं आसा कि परमेशर करा सबर करनै आल़ै मणछो अदर, तम्हैं आयूबे सबर करने बारै ता आसा शूणअ द, अर प्रभू बाखा ज़ुंण तेतो फल तेऊ भेटअ, तेतो बी आसा तम्हां का थोघ, ज़िहअ करै प्रभूए खास्सी झींण प्रगट हआ।

12पर हे मेरै भाई-बैहणीओ, सोभी का बडी गल्‍ल आसा अह कि ज़ेभै बाहिदअ करे तेभै निं झ़ुठै सोह खाई, नां स्वर्गै, नां पृथूईए, नां कोई बी च़िज़े। थारअ “हाँ” करनैओ मतलब लोल़ी “हाँ” हुअ अर थारी “नांह” करनैओ मतलब लोल़ी “नांह” हुअ। नांईं ता परमेशरा दैणीं तम्हां लै एकी धैल़ै सज़ा।

प्राथणां करने शगती

13ज़ै तम्हां मांझ़ै कोई दुखी होए, सह करै प्राथणां। ज़ै तम्हैं खुशी होए, प्रभूए स्तोती करना लै बोलै भज़न। 14ज़ै तम्हां मांझ़ै कुंण बमार होए, विश्वासीए टोली का विश्वासी टोलीए सैणैं शादै, अर तिन्‍नैं करनी प्रभूए नाओंऐं तिन्‍नां लै तेल मल़ी करै प्राथणां। 15ज़ुंण प्राथणां तम्हैं परमेशरा सेटा विश्वास डाही करै करे तेता करै हेरनअ परमेशरा सह बमार मणछ तैहा बमारी का बच़ाऊई अर ज़ै तेऊ कोई पाप बी किऐ दै होए, तेते बी भेटणीं तेऊ लै माफी।

16तैही मना तम्हैं आप्पू मांझ़ै एकी-दुजै सेटा आपणैं पाप, संघा करा एकी-दुजै लै परमेशरा सेटा प्राथणां, ज़िहअ करै तम्हैं भिई नरोगै होए। किल्हैकि धर्मीं मणछे प्राथणां करै सका सोभै गल्‍ला हई। 17एलियाह बी त हाम्हां ज़िहअ दुख-सुख भुगतणै आल़अ मणछ, अर तेऊ किई लेरा लाई-लाई प्राथणां कि सरगा का निं पाणीं निं लोल़ी हुअ, अर साढै चिई साला तैणीं निं भूमी दी सरग हुअ।#1 राज़. 17:1

18तेखअ किई तेऊ भिई प्राथणां, अर सरगा का हुअ पाणीं अर पृथूई हुई हरी भरी।#1 राज़. 18:42-45

19हे मेरै भाई-बैहणीओ, ज़ै तम्हां मांझ़ै कुंण सत्ता का कबाता पेठे, अर तेऊ कुंण फरेऊई आणे, 20सह लऐ ऐहा गल्‍ला समझ़ी कि ज़ुंण बी कबाता पेठै दै पापी मणछा राम्बल़ी बाता फरेऊई आणे, सह बच़ाऊआ तेऊए प्राण मौता का, परमेशरा करनै तेऊए पाप माफ।#सैणीं. 10:12

Currently Selected:

याकब 5: OSJ

Highlight

Copy

Compare