ईशायाह 56
56
परमेशरे परज़ा संघै ज़ुल़णै सोभ लोग
1बिधाता बोला आपणीं परज़ा लै इहअ, “शुचै अर मानदार हआ, हुंह एछणअ तम्हां बच़ाऊंदअ छ़ेक्कै। 2मुंह दैणीं तिन्नां मणछा लै बर्गत ज़ुंण बशैघे धैल़ीओ अदर करा अर सोभी कदुष्ट कामां का दूर रहा ज़ेता करै छ़ोत लागा अर किछ़ बूरअ निं करदअ।”
3ज़ुंण परदेसी मणछ बिधाते परज़ा संघै ज़ुल़ै तिन्नैं निं इहअ लोल़ी बोलअ, “बिधाता निं हाम्हां आपणीं परज़ा संघै साझ़ू हणैं दैंदअ!”
ज़ुंण मणछ बाब निं बणी सकदै, तिन्नैं निं इहअ लोल़ी बोलअ, “हाम्हैं आसा शुक्कै डाल़ा बूटा ज़िहै, हाम्हैं निं बिधाते परज़ा संघै साझ़ू हई सकदै।” 4बिधाता बोला इहै मणछा लै, “ज़ै तम्हैं मेरी बशैघे धैल़ी पबित्र मनी मेरअ अदर करे, ज़ेता लै हुंह राज्ज़ी हआ। ज़ै तम्हैं तिहअ ई करे अर शुचै-पाक्कै रही मेरी करार मने, 5तै डाहणअ मुंह थारअ नाअं मेरै भबना दी अर मेरी परज़ा संघै लिखी। अह हणअ तम्हां लै शोहरू-माठै हणैं का बी खास्सअ भलअ अर अह रहणअ सदा लै अटल़।”
6बिधाता बोला तिन्नां परदेसी लै ज़ुंण दिला का बिधाते परज़ा संघै आसा ज़ुल़ै दै, ज़ुंण बिधाता लै झ़ूरा, तेऊए च़ाकरी करा, ज़ुंण बशैघे धैल़ी पबित्र मना अर शुचै-पाक्कै रही तेऊए करार मना, 7“मुंह पजैल़णैं तम्हैं मेरी पबित्र धारा सियोन#56:7 सियोन सह ज़ैगा ज़िधी बिधातो भबन आसा, तिधी मनाऊंणी तम्हां मेरै प्राथणां करने घअरै खुशी। ज़ुंण तम्हां तिधी मेरी बेदी सेटा हूम अर मेल़-ज़ोल़ करनैओ बल़ीदान करनै, तिंयां हेरनै मुंह मनी। मेरअ भबन हणअ सोभी देशे लोगा लै प्राथणां करनैओ घअर।”#मोत्त. 21:13; मार्क. 11:17; लूक. 19:46
8सोभिओ मालक बिधाता ज़ुंणी आपणीं परज़ा इज़राईली गलामी का बापस आणी फरेऊई, तेऊ आसा एही ज़बान दैनी दी कि तेऊ दैणअ होरी सोभी लोगा आपणीं परज़ा संघै ज़ुल़णै।
इज़राईले सैणैं लै दोश
9बिधाता बोला परदेसी देशा लै कि बणें ज़ीबा ज़िहै एछा संघा पतोक्का मेरी परज़ा ज़ुंण दोशी आसा। 10बिधाता बोला इहअ, “तिंयां सोभ सैणैं ज़हा मेरी परज़ा लै चतैनगी लागा ती दैणीं, तिंयां आसा कांणै! तिन्नां का निं किछ़ थोघ आथी। तिंयां आसा इहै कुक्करा ज़िहै ज़ुंण हुघी निं सकदै। तिंयां हआ फेर कज़ेस्सी सुत्तै दै अर सुपनै भाल़ै लागै दै। तिंयां झ़ूरा सिधै सुत्तणा लै। 11तिंयां आसा इहै च़टोर कुक्करा ज़िहै ज़ुंण रज़दै ई निं आथी। इना सैणैं निं समझ़ ई आथी। तिंयां सोभ भाल़ा सिधअ आपणअ ई नफअ अर तिन्नां हआ सिधी आपणैं पेटा भरने पल़ी दी। 12तिंयां शराबी सैणैं बोला आप्पू मांझ़ै, ‘एछा हाम्हां झुटणीं रज्ज़ी शराब! काल्ला करनीं हाम्हां भिई एही ई मौज़।’”
Currently Selected:
ईशायाह 56: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
