ईशायाह 36
36
अश्शूरी छ़ेल़अ यहूदा मुल्खा संघै जुध
(2 राज़ै 18:13-27; 2 इतिहास 32:1-19)
1यहूदा मुल्खे राज़ै हिजकिया राज़े राज़ा दी च़ौदुई साला छ़ेल़अ अश्शूर देशे राज़ै सनहेरीबै यहूदा मुल्खे गहल़ा आल़ी नगरी संघै जुध संघा किअ तेथ कबज़अ। 2तेखअ किअ अश्शूरी राज़ै आपणैं सैनापति लै हुकम कि लकीश नगरी का डेओआ खास्सी सैना संघा निंईं एरुशलेम नगरी लै, संघा बोला यहूदा मुल्खे राज़ै हिजकिया लै इहअ कि आपणीं हार मनी मन्न म्हारी गलामी। अश्शूरी सैनापति अर सैना किअ एरुशलेम नगरीए तैहा सल़का दी कबज़अ ज़ेथ झिकल़ै बुणनै आल़ेए दुकाना थिई, संघा खल़्हुऐ उतरा बाखा कोफरी का एछदै पाणींए नाल़ा अर धोबीए खेचा नेल़ सल़का। 3तिधी आऐ हिजकिया राज़े बडै कार-करिंदै मांझ़ै चअन ज़ण्हैं तिन्नां सेटा लै मिलदै। तिंयां थिऐ हिलकिया प्रोहतो शोहरू एलीकीम ज़हा का राज़ दरबार त सभाल़अ द, शेबना काईथ, असापो शोहरू जोआह ज़ुंण इतिहास लिखणैं आल़अ थिअ। 4तिन्नां मांझ़ै बोलअ अश्शूर देशे एकी सैनापति, “राज़ै हिजकिया का खोज़ा इहअ कि अश्शूर देशो माहा राज़अ पुछ़ा ताखा इहअ, ‘ताह कसरै आसरै हुई एही हिम्मत? 5तूह कै सोठा कि ताह किज़ै एही बिक्री सोठणीं कि सिधअ गल्ला ई गल्ला करै ज़ितणअ ताह जुध? तेरअ साथ कुंणी आसा लाअ द दैई? ताह मुल्है द्रोह करने हिम्मत आई किधा का? 6तूह कै सोठा कि मिसर देशा दैणअ तेरअ साथ? सह आसा जैंठुई दी नगाल़ै ज़िहअ ज़ुंण तैहा शोठिए आसरै हांढे, तेता करै पल़णीं हाथै बी झ़र्हा। ज़ुंण मिसर देशे माहा राज़ेए आसरै रहे, तेऊ संघै हणअ इहअ ई।
7“‘ज़ै तूह मुल्है इहअ बोले कि तूह आसा आपणैं परमेशर बिधाते आसरै! तेता लै आसा मेरी एही गल्ला कि अह आसा सह ई बिधाता ज़ुंण तंऐं हिजकिया ई नकदरअ किअ? तिंयां थिऐ बिधाते ई गान-स्तान अर बेदी ज़ुंण तंऐं बरैबाद किई। तंऐं बोलअ यहूदा अर एरुशलेम देशे लोगा लै इहअ कि एरुशलेम नगरीए बेदी का सुआई निं होर्ती माथअ टेक्की आथी। 8ऐबै लाई मंऐं मेरै मालक अश्शूर देशे राज़ै बाखा ताह संघै शार्थ पाई, हुंह दैंऊं ताल्है दूई हज़ार घोल़ै ज़ै तूह तिन्नां प्रैंदै शुंआरी करनै आल़ै तेतरै मणछ लोल़ी सके! 9ज़ै तेरै भलै एतरअ बी निं हंदअ, तै निं तूह मेरै मालक अश्शूर देशे राज़े एकी होछ़ै ज़िहै सपाही संघै बी मकाबलअ करी सकदअ अर तूह आसा तेता लै मिसर देशे रथ अर घोल़े आसरै रहअ द! 10ऐहा गल्ला बी निं तूह भूली आथी कि ताह अर तेरै देशा बरैबाद करना लै आसा हाम्हां लै बिधाता ई ज़ाज़त दैनी दी!’”
11तेखअ बोलअ एलीकीम, शेबना अर जोआहै तेऊ सैनापति लै, “हाम्हां संघै करा तम्हैं अरामी बोली दी गल्ला, तेता हेरा हाम्हैं समझ़ी। यहूदी बोली दी निं गल्ला करा किल्हैकि नगरीए दुआली प्रैंदै बेठै दै सोभ लोग आसा शूणैं लागै दै।”
12तेऊ सैनापति दैनअ बोलअ, “तम्हैं कै सोठा कि म्हारै मालकै हाम्हैं सिधै तम्हां चिई अर राज़ै हिजकिया लै बोल्दै आसा छ़ाडै दै? माहा राज़ै आसा हुंह छ़ाडअ द कि इना सोभी का बी थोघ लागे ज़ुंण गहल़ा प्रैंदै आसा बेठै दै। ताकि तम्हां संघै तिन्नां बी आपणअ गूह-मूच खाणअ अर झुटणअ पल़े।”
13तेखअ लागअ सह सैनापति तिधी खल़्हुई करै यहूदी बोली दी ज़ोरै-ज़ोरै बोल्दअ कि सोभी का शुण्हिंए, “शूणां, माहा राज़अ, मतलब अश्शूर देशो राज़अ किज़ै बोला! 14अश्शूरी राज़अ च़ाहा इहअ कि तम्हैं निं हिजकिया ठगै लोल़ी। हिजकिया राज़े भलै निं थारी फाज़त हंदी। 15तम्हैं निं एऊए ऐहा गल्लो भरोस्सअ करी कि तम्हैं हेरनै अश्शूर देशे राज़ै का बिधाता बच़ाऊई अर अह एरुशलेम नगरी निं तेऊ अश्शूर देशे राज़े कबज़ै दैणी हणैं। 16तम्हैं निं हिजकिया राज़े ज़ाणैं लागी। अश्शूरी माहा राज़ैओ आसा तम्हां लै इहअ हुकम कि नगरी का निखल़ा बागै संघा मना तेऊए गलामी। तै भेटणीं तम्हां आपणीं बागा का दाख खाणीं, आपणैं फेडूए बूटा का फल़ खाणैं अर आपणैं कुहै का पाणीं झुटणअ। 17तेखअ निंणै तम्हैं माहा राज़ै इधा का होर्ता लै, सह देश बी हणअ थारै एऊ ई देशा ज़िहअ रज़दअ-पज़दअ। तिधी सका तम्हैं दाखे बाग लाई, आपणअ नाज़ पज़ेरी। 18तम्हैं निं हिजकिया राज़े ऐहा गल्ले आसरै रही कि तम्हैं हेरनै बिधाता बच़ाऊई। होरी देशे देअऐ बी कै तिंयां अश्शूर देशे राज़ै का बच़ाऊऐ? ज़ाथी निं कोह बच़ै! 19ऐबै तिंयां हमात अर अर्पात नगरीए देअ किधी आसा? सपर्बैम, हिना अर इबा नगरीए देअ किधी लुक्कै? तिन्नां मांझ़ै एकी बी मुखा सामरी#36:19 सामरी सामरी नगरी ती इज़राईल उतरा बाखा देशे राज़धानी ज़ेथ अश्शूरी राज़ै 721 ईसा आजी कबज़अ किअ त। नगरी बच़ाऊई? ज़ाथी निं कोही!#2 राज़. 18:11,12 20इना सोभी देशे देअआ मांझ़ै कुंण आसा ज़ुंणी आपणअ देश अश्शूर देशे माहा राज़ै का बच़ाऊअ? ज़ाथी निं कोह निखल़अ! तै तम्हैं कै सोठा कि थारै परमेशर बिधाता माहा राज़ै का एरुशलेम नगरी बच़ाऊई हेरनी?”
21एरुशलेम नगरीए लोग रहै नगरीए दुआली प्रैंदै च़ुपच़ाप शूणैं लागी, तिन्नैं निं बैण बी काढअ, तिन्नां लै त हिजकिया राज़ै इहअ ई हुकम किअ द कि किछ़ निं बोली। 22हिलकिया प्रोहतो शोहरू एलीकीम, शेबना काईथ अर असापो शोहरू इतिहास लिखणैं आल़अ जोआह हुऐ खास्सै दुखी अर तिन्नैं धेल़ै तेऊ दुखै आपणैं झिकल़ै संघा डेऊऐ तिधा का फिरी अर तिन्नैं खोज़ी हिजकिया राज़ै का पठी गल्ला ज़ुंण अश्शूर देशे सैनापति बोली ती।
Currently Selected:
ईशायाह 36: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
