ईशायाह 28
28
उतरा बाखा बस्सै दै इज़राईली लै चतैनगी
1इज़राईल मुल्खे राज़धानी सामरी नगरी लै आसा आफ़त ज़ुंण रज़दी-पज़दी ज़ैगा आसा बस्सी दी! ऐहा नगरीए सैणैं आसा शराबी अर तिन्नां आसा ऐहा नगरीए खाणैं-पिणैंओ बडअ घमंड। तिंयां#28:1 तिंयां इज़राईली सैणैं ज़ुंणीं खास्सी आसा झुटी दी हणैं इहै फूला ज़िहै ज़ुंण मछैंईं करै धरनीं अल़णैं। 2मालक बिधाता छ़ाडणीं एक बलबान सैना बडै-बडै शरू अर लोदल़-छ़ोदल़ पाणीं ज़ेही सामरी नगरी लै। तिन्नां पल़णअ हर्हले दरैऊआ ज़िहै तिन्नां लै चुटी संघा घ्रोहल़णै तिंयां धरनीं। 3एप्रैम गोत्रे शराबी सैणैंओ घमंड जैंटणअ खूरा हेठै। 4रज़दी-पज़दी ज़ैगा बस्सी दी शान-शोभा हणीं झ़ट च़ारै खतम। अह हणीं ज़ेठै-शाहल़ै पाक्कै दै फेडू ज़ेही, ज़ेतरी तिंयां पाक्कै निं तेतरी छ़ेक्का तिन्नां खाई।
5एक बगत एछणअ इहअ कि स्वर्गे सारी सैनो मालक बिधाता हणअ तिन्नां इज़राईली लै आप्पै महान मुगटा ज़िहअ ज़ुंण तेभै ज़िऊंदै हणैं रहै दै। 6ज़ुंण पांच़ हणैं, तिन्नां लै दैणीं बिधाता नसाफ करने सोर-समझ़। ज़ुंण जोधै दुशमणा का फाज़त करना लै नगरीए प्रऊल़ी दी पहरी हणैं, तिन्नां लै दैणीं तेऊ हिम्मत अर खास्सअ ज़ोर।
ईशायाह अर यहूदा मुल्खे शराबी गूर
7इज़राईले गूर अर प्रोहतै झुटी खास्सी शराब, तिन्नां आसा धाक्कै-फर्नैक्कै लागै दै! तिन्नैं झुटअ खास्सअ नशिलअ दाखो-रस अर शराब, तिंयां निं आज़रै हांढदै अर तिन्नां दी आसा झाख पल़अ द। गूरा हआ धैन अर सुपनै पर तिन्नां निं तेते समझ़ एछदी! नां प्रोहत तिन्नां झ़गल़ैओ फैंसलअ करी बोल्दै ज़ुंण तिन्नां सेटा एछा। 8ज़िधी तिंयां खांदै बेशा, तेथ आसा फेरा-फेर उल़्टी किई दी, ज़ाथी निं धख ज़ेही ज़ैगा बी साफ आथी।
9तिंयां शराबी सैणैं काढा तेता लै बी बिधातो कशूर, तिंयां बोला इहअ, “बिधाता कै समझ़ा कि हाम्हैं किज़ै आसा? अह किज़ू हआ हाम्हां लै एही शिक्षा दैंदअ लागअ द? हाम्हैं कै होछ़ै लान्हैं ज़िहै आसा ज़ुंण एभै च़ूई का च़लाऊऐ? 10अह रहा हाम्हां लै भिई-भिई ढेओआ करदअ लागी! घल़ी करा इहअ हुकम! घल़ी बोला तिहअ करा! एऊ सिधी घल़ी-घल़ी हुज़त डाही दी लाई!”
11ऐबै ज़ै तिन्नां बिधाते गल्ला हुज़त ज़ाण्हिंआं, ज़ै तिन्नां नांईं शुणनअ, बिधाता करनी तेखअ तिन्नां संघै परदेसी मणछा करै गल्ला, तेखअ समझ़ाऊआ तिंयां आप्पै ज़सरी बोली-भाषा ई समझ़ निं एछदी! 12तेखअ बोला बिधाता आपणीं परज़ा लै इहअ, “मंऐं लाई तम्हां लै बशैघणा लै ज़ैगा दैई, ज़ुंण थकै दै आसा, तिंयां करा इधी मज़ै करै राम। पर तिन्नां निं शुणनअ ई आथी। 13बिधाता बी रहणअ तिन्नां लै भिई-भिई ढेओआ करदअ लागी! घल़ी करनअ इहअ हुकम! घल़ी बोल़णअ तिहअ करा! तेऊ बी डाहणीं तिन्नां लै घल़ी-घल़ी सिधी हुज़त लाई! ताकि तिन्नां ठोहल़ लागे, तिंयां ज़खमी होए अर तिन्नां कैद करी निंए।”
सियोन धारा आथरी
14ऐबै ज़ुंण तम्हैं सैणैं एरुशलेम नगरी लोगा प्रैंदै राज़ करा, तम्हैं शूणां धैन दैई कि बिधाता किज़ै बोला। 15तम्हैं मारा एही डिंगा ज़ेही कि तम्हैं आसा होए जम्परी संघै करार किई दी कि तम्हैं निं मरनै ई आथी! ज़ाणनअ कि ज़ेभै घोर माहा मरी एछे, सह रोग निं तम्हां लागणअ ई आथी! किल्हैकि तम्हैं रहा झ़ुठे आसरै अर ठगी करै रहणैं तम्हैं राज्ज़ी-राम्बल़ै! 16तैही बोला सोभिओ मालक बिधाता इहअ, “मुंह लाणअ सियोन नगरीए आथरी दी एक पाक्कअ पात्थर। अह आसा आथरीओ सह खास पात्थर#28:16 पात्थर मतलब बिधाता ज़ेथ दी भरोस्सअ आसा। ज़ुंण तेऊ पात्थरे आसरै रहे, तेऊ निं तिधा का ओर्ही-पोर्ही ठुर्हने ज़रुरत आथी।#रोम. 9:33; 1 करि. 3:11; इफि. 2:20; 1 पत. 2:4,6 17नसाफ हणअ तैहा आथरी दी लाऐ दै सूता ज़िहअ अर धर्मीं ज़िन्दगी हणीं तेथ साहुला ज़ेही।”
ज़ेऊ झ़ुठे आसरै तम्हैं आप्पू बच़ा, तेथ पल़णै सरगा का बडै-बडै शरू अर सह ज़ैगा घ्रोल़्हणीं दूर अर ज़िधी तम्हैं शरण लई लुक्कै दै हणैं, तेथ पेशणअ पाणींओ हर्हल। 18तेखअ हणीं थारी मौत अर मूंऐं दै मणछे संसारा संघै किई दी करार बी खतम। ज़ांऊं आफ़तो दरैअ तम्हां प्रैंदै पल़णअ, तम्हैं डुबणै तेथ पठ। 19सह दरैअ रहणअ तम्हां लै भिई-भिई हर धैल़ै एछदअ लागी अर राची बी रहणअ सह बढदअ ई लागी। बिधाता का एछणैं आल़ै हरेक समादा करै रहणअ तम्हां हैल़अ-फिकर ई पल़ी। 20तम्हैं हणैं तेऊ मणछा ज़िहै ज़ुंण च़ैन्नै सुत्तणअ, च़ाहा पर नां हेठै तेऊ बराबर लाम्मअ बिस्तरअ आथी अर प्रैंदै खेस बी आसा घाटी! 21बिधाता उझ़णअ नसाफ करदअ ज़िहअ परज़ीम धारा किअ त, तेऊ करनअ तिहअ फैंसलअ ज़िहअ गबोन खागै किअ त।#2 शमू. 5:20; 1 इति. 14:11 आपणअ काम ता करनअ तेऊ ज़रूर पर ऐहा बारी करनअ बिधाता किज़ै नोखअ अर सह काम हणअ रहैन करनै आल़अ।#ज़ैह. 10:10,11
22ज़ुंण हुंह चतैनगी दैआ, तेता लै निं हास्सदै लागा! नांईं ता तम्हां हणअ छ़ुटणअ होर बी मस्सा। मंऐं शूणअ स्वर्गे सारी सैनो मालक बिधाता इहअ बोल्दअ कि तेऊ आसा एऊ सारै देशा खतम करने डाही दी।
बिधातो ज्ञैन
23मेरी गल्ला शूणां कान छ़ैई, ज़ुंण हुंह बोला, तेथ दैआ धैन। 24कृषाण कै कबल्लअ रहा हल़ा लांदअ लागी अर बऊंदअ निं आथी? सह कै धैल़ रहा बाहंदअ लागी अर बेज़अ निं तेथ रोहंदअ आथी? 25ज़ांऊं कृषाण खेच बाही हेरा, तेथ छिंगा तिंयां सुंफो बेज़अ, तेथ डाहा तिंयां ज़िरैओ बेज़अ शोटी। तिंयां डाहा तेथ ज़ौ अर कणको बेज़अ बराबर शोटी अर बाढा बाती डाहा किज़ै होर नाज़ बऊई। 26किल्हैकि तिन्नां का हआ थोघ कि तिन्नां आपणअ काम किहअ लागा करनअ, किल्हैकि बिधाता आसा तिंयां सखाऊऐ दै। 27सुंफ अर ज़िरै निं तिंयां थरेट घरैऊई करै मांडदै, तेता मांडा तिंयां होछ़ी ज़ेही शोठी करै कि तेते दाणैं धरनीं अल़े। 28तिंयां काढा डागै करै ज़ौआ कणके खहल़ पर तिंयां निं तेथ कबल्लै थरेटा घरैऊंदै रहंदै लागी ज़ेता करै पठी बरैबाद हआ। तिन्नां का हआ थोघ कि ज़ांऊं नाज़ काशी का धरनीं गअ आल़ी तेखअ लागा डागै पोर्ही काढणैं ताकि नाज़ नां खोईए। 29अह सारी अक्ल भेटा स्वर्गे सारी सैने मालक बिधाता का। ज़ुंण गल्ल परमेशर सोठा, तेथ हआ अक्ल अर तिंयां गल्ला हआ सफल।
Currently Selected:
ईशायाह 28: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
