मूल़ 43
43
बिन्यामीना संघा निंईं डेऊऐ मिसर देशा लै
1कनान देशै पल़अ होर बी खास्सअ नकाल़।
2याकबे शोहरू ज़ुंण नाज़ मिसर देशा का आणअ त, खिरी मुक्कअ सह बी। तेखअ बोलअ याकबै आपणैं शोहरू लै, “ऐबै डेओआ तम्हैं भिई मिसर देशा लै संघा आणा होर ज़िणस लई।”
3-5यहूदा दैनअ ज़बाब, “सह ज़ुंण मिसर देशै राज़ करा तेऊ आसा हाम्हां लै चतैनगी दैनी दी कि ज़ेभै तैणीं तम्हैं आपणअ कान्हअ भाऊ मुंह सेटा निं आणे, तेभै तैणीं निं मुखा आपणीं शकल रहैऊई।
“ज़ै तूह हाम्हां संघै बिन्यामीना छ़ाडे, तै च़ाल्लै हाम्हैं मिसर देशा लै ज़िणसा आणदै डेऊई, पर ज़ै करा तूह नांईं, तै निं हाम्हैं च़ाल्लै!”
6इज़राईलै बोलअ इहअ, “तम्हैं किज़ू उझ़ुऐ तेऊ का खोज़दै कि थारअ आसा एक होर भाई, ऐबै मुल्है बी आणी तम्हैं गल़ै तैणीं घाटी।”
7तिंयां लागै बोल्दै, “तेऊ पुछ़ै हाम्हां अर म्हारै टबरे बारै सुआला प्रैंदै सुआल। सह लागअ हाम्हां का पुछ़दअ कि थारअ बाब कै अज़ी ज़िऊंदअ आसा, थारै होर केतरै भाई आसा? तेखअ ज़िहअ तेऊ पुछ़अ हाम्हां पल़अ तेतो ज़बाब दैणअ। हाम्हां का किज़ै थोघ त कि तेऊ बोल़णअ इहअ कि आपणैं भाऊ आणा इधा लै?”
8तेखअ बोलअ यहूदा आपणैं बाब इज़राईला का, “बिन्यामीना दै हाम्हां संघै एछणैं, ताकि हाम्हैं मिसर देशा लै डेऊई सके, नांईं ता मरनै हाम्हैं सोभै ताह संघी भुखै।
9“बिन्यामीने ताह सेटा बापस पजैल़णें ज़िम्मैंबारी रही मेरी, ज़ै अह ताह सेटा राज्ज़ी-राम्बल़अ फिरी निं पुजे, तै पुछ़ै तूह मुखा, हुंह हणअ सारी अमरा तेरअ कशूरबार।
10“ज़ै हाम्हैं इहै बल़ैघदै निं लागदै, तै गऐ तै हाम्हैं एभा लै दूई बारी मिसर देशा का हांढी एछी।”
11खिरी बोलअ इज़राईलै तिन्नां लै, “ज़ै एही गल्ल आसा, तै करा इहअ, तम्हैं निंयां तेऊ मिसर देशे माहा मंत्री लै कनान देशे बधिया का बधिया च़िज़ा भैंट। ज़िहअ कि सैंट, मखीर, सेल्हरअ, गंधरस, पिस्तअ अर बदाम बी।
12“संघा निंयां आप्पू संघै दुगणैं ढब्बै। हई सका कि पिछ़ली बारी तिन्नैं भूला-बिस्सरा पाऐ होए थारी खाल्हल़ी दी थारै ढब्बै बापस।
13“ऐबै निंयां तै बिन्यामीना बी आप्पू संघै, संघा लागा ऐबै एभी हांढदै।
14“ज़ेभै तम्हैं तेऊ माहा मंत्री सेटा डेओए, तेभै करे सह बिधाता ज़हा का सारअ बल आसा, सह आप्पै थारी मज़त, ताकि तम्हैं शमौन अर बिन्यामीना दुही घअरै पजैल़े। ज़ै मुंह ऐबै लुआदा बाझ़ी हणअ होए, तिहअ बी लागे ऐबै हंदअ।”
15तेखअ लागै तिंयां सोभै भाई मिसर देशा लै हांढदै। माहा मंत्री लै भैंट, ज़िणस लणा लै दुगणैं ढब्बै अर बिन्यामीन बी निंयं आप्पू संघा। मिसर देशै पुजी हुऐ तिंयां युसुफा सम्हनै खल़ै।
याकबे भाई पुजै युसुफे मैहलै
16ज़ांऊं युसुफै बिन्यामीन भाल़अ, तेऊ बोलअ आपणैं मैहले दरोगै लै, “इना सोभी निंयां मेरै मैहला लै, छ़ेल्हू काटा संघा बणाआं खाणां-पिणां लै। इना का खैऊंणी आझ़ मुंह क्लारी आप्पू संघै।”
17ज़िहअ युसुफै बोलअ तेऊ दरोगै किअ तिहअ ई, संघा निंयैं तेऊ तिंयां मैहला लै।
18पर तिन्नां लागी डअर, संघा लागै तिंयां युसुफे मैहला लै डेऊंदी बारी आप्पू मांझ़ै एही गल्ला करदै, “पिछ़ली बारी ज़ुंण ढब्बै म्हारी खाल्हल़ी दी आऐ तै, तेता पिछ़ू शादै हणैं हाम्हैं एऊ मैहला लै। एऊ बान्हणैं ऐबै हाम्हैं संघा बणाणैं आपणैं गलाम अर म्हारै ईंयां गाधै बी पाणै।”
19ज़ांऊं तिंयां युसुफे मैहले दुआरै पुजै, तिन्नैं बोलअ तेऊ दरोगै का, 20“मालक, हाम्हैं आऐ तै पिछ़ली बारी बी मिसर देशा लै ज़िणसा लै। 21पर ज़ांऊं हाम्हैं बापस फिरदी एकी ज़ैगा बैल़ी रहै, हाम्हां सोभी भेटै म्हारै तिंयां सारै ढब्बै नाज़े खाल्हल़ी भितरी ज़ुंण हाम्हैं ज़िणसो मोल दैनअ त। हाम्हैं आणै तिंयां ढब्बै एभै संघा, 22ज़ुंण हाम्हां एभै होर ज़िणस निंणीं तेता लै आसा हाम्हैं ज़ुदै ढब्बै आणै दै। हाम्हां का निं थोघै पिछ़ली बारी तिंयां ढब्बै म्हारी खाल्हल़ी दी कुंणी पाऐ!”
23दरोगै बोलअ तिन्नां लै, “तम्हैं निं लागा डरदै, तम्हैं रहा निहंचै दी राम्बल़ै, मुखा गई ती थारी सारी किम्मत एछी। हई सका कि ज़हा बिधाते च़ाकरी थारै दाद-बाब अर तम्हैं करा, तेऊ डाहै होए तिंयां ढब्बै थारी खाल्हल़ी दी।” तेखअ काढअ शमौन तेऊ कैद खानै का संघा आणअ तिन्नां सेटा लै।
24तेखअ पजैल़ै तेऊ दरोगै तिंयां सोभै युसुफे मैहलै संघा दैनअ तिन्नें हाथा-खूरा धोणा लै पाणीं। तिन्नें गाधै लै बी दैनअ तेऊ घाह-पाणीं।
25तिन्नां का लागअ थोघ कि माहा मंत्री खाणीं क्लारी तिन्नां संघै। तेखअ ज़ुंण च़िज़ा कनान देशा का तेऊ लै भैंट आणी ती, तिंयां डाही तिन्नें तिधी कठा करी।
26ज़ांऊं क्लारी लै युसुफ मैहलै पुजअ, तिन्नैं दैनी तेऊ लै तिंयां च़िज़ा भैंट, संघा टेक्कअ उटी बाखा धरनीं पल़ी तेऊ सेटा माथअ।
27माहा मंत्री पुछ़ै तिंयां राज्ज़ी-बाज़ी संघा लागअ तिन्नां का पुछ़दअ, “तम्हैं बोलअ त थारै आसा घअरै बाब प्रोढअ, सह आसा बी राम्बल़अ ऐ? सह अज़ी बी ज़िऊंदअ आसा?”
28तिंयां लागै खोज़दै, “हाँ, मालक, तेरअ दास म्हारअ बाब आसा ज़िऊंदअ अर राज्ज़ी-राम्बल़अ।” संघा टेक्कअ भिई तिन्नैं तेऊ सेटा माथअ।
29तेखअ भाल़अ युसुफै आपणअ भाऊ बिन्यामीन संघा बोलअ इहअ, “ज़सरै बारै तम्हैं खोज़अ त, थारअ सह कान्हअ भाऊ आसा अह भाल़ी?” तेखअ बोलअ युसुफै बिन्यामीना लै, “बिधाता लोल़ी ताल्है खास्सअ जश दैनअ।”
30युसुफ उझ़ुअ तेभी तिधा का खल़अ संघा लागअ पांडा भितरी डेऊई एक्कै ज़ण्हअ हिंह करै लेरा लांदअ। किल्हैकि आपणैं भाऊ बिन्यामीना भाल़ी फिरी तेऊ खास्सी झींण अर तेऊ च़ाल्ली ती तिन्नां सोभी नदरी लेरा छ़ुटी।
31तेखअ धोअ तेऊ आपणअ मुंह संघा किई आपणीं लेरा काबू, तेखअ बोलअ दासा लै, “रोटी आणा ओर्ही खाणां लै।”
32तेखअ लाऐ युसुफे दासै तिन्नां सोभी लै ज़ुदै-ज़ुदै मेज़। युसुफा लै दैनअ ज़ुदै मेज़ा दी खाणां लै, एकी होरी मेज़ा दी बशैल़ै युसुफे सोभै भाई रोटी खांदै।
ज़ुंण तिधी मिसरी प्राहुणैं थिऐ, तिंयां बशैल़ै एकी होरी मेज़ा दी, किल्हैकि मिसर देशे लोग निं इब्रानी लोगा संघै रोटी खांदै तै, तिंयां करा तै छ़ुंह।
33युसुफे तिंयां सोभ भाई लागै एकी दुजे मुंहैं भाल़ै, किल्हैकि तिंयां हुऐ एता लै रहैन कि तिंयां बशैल़ै रोटी खांदै तिन्नें अमरे साबै, सोभी का आजू ज़ेठअ अर छ़ैहंकी सोभी का कान्हअ।
34युसुफ त आपणैं मेज़ा का खाणैं-पिणें सोभ च़िज़ा आपणैं दासे हाथै तिन्नां लै बांडदअ लागअ द। बिन्यामीना लै दैनी हर गल्ला तिन्नां होरी का पांज़ गुणा ज़ादी। संघा खाई तिन्नैं सोभी रज्ज़ी रोटी।
Currently Selected:
मूल़ 43: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
