मूल़ 38
38
यहूदा अर तामार
1एकी बारी हुअ इहअ कि, यहूदा हुअ आपणैं होरी भाई का ज़ुदअ। संघा डेऊअ सह धारा बाखे मुल्खा लै एकी मणछा सेटा रहंदअ। सह मणछ थिअ अदुलाम नगरी का अर तेऊ नाअं त हीरू।
2तिधी भेटी यहूदा एक शोहरी, सह थिई कनान देशा का, तेसे बाबा नाअं त शूआ। यहूदा किअ तैहा संघै बैह।
3तिन्नें हुऐ आजू चअन शोहरू। शूआ डाहअ ज़ेठै शोहरू नाअं एर, 4तेऊ का कान्हैं नाअं डाहअ तेऊ ओनान अर 5सोभी का कान्हैं शोहरू नाअं डाहअ तेऊ शेलाह। ज़धू सह शोहरू हुअ तधू थिअ यहूदा कज़ीब नाओंए ज़ैगा।
6थोल़ी साला बाद किअ यहूदा आपणैं ज़ेठै शोहरू एरो बैह। तेऊए नुशा नाअं त तामार। 7पर यहूदो ज़ेठअ शोहरू एर थिअ बेघै कदुष्ट, खिरी पाअ सह बिधाता मारी। 8खिरी बोलअ यहूदा आपणैं शोहरू ओनाना लै, “तूह रह-बस्स आपणीं भाभी संघै, संघा कर आपणैं ज़ेठै भाई लै लुआद पैईदा करी देऊर हणैंओ फर्ज़ पूरअ#38:8 देऊर हणैंओ फर्ज़ पूरअ तिन्नों थिअ इहअ रबाज़ कि ज़ेठै भाई लुआदा बाझ़ी मरनै का बाद करा तै तेऊए कान्हैं भाई तेऊ लै लुआद पैईदा।”
9ओनाना का थिअ थोघ कि ज़ुंण भाभी का आजू लुआद हणीं, सह खिंब हणअ आजू तेऊए ज़ेठै भाईओ अर सह निं इहअ च़ाहंदअ त। तेखअ सह आपणीं भाभी संघै ता सुत्तअ, पर बीज पोछअ तेऊ धरनीं बागै ताकि ज़ेठै भाईए नाओंऐं लुआद नां होए।
10बिधाता हुअ ओनाने एऊ कदुष्ट कामां लै नराज़, अर सह बी पाअ मारी।
11यहूदा सोठअ इहअ कि इहअ निं हआ कि शेलाह बी आपणैं ज़ेठै भाई ज़िहअ मरे। यहूदा बोलअ आपणीं नुश तामारा लै, “मेरअ शोहरू शेलाह आसा अज़ी होछ़अ, एऊए ज़ुआन हणैं तैणीं रहअ तूह आपणैं पेऊकै आपणैं ईजा बाबा सेटा बिधबा ज़ेही।”
सह डेऊई तेखअ पेऊकै लै संघा लागी तिधी रहंदी।
12थोल़ी साला बाद गई यहूदे लाल़ी ज़ांऐं ज़ुंण शूए शोहरी थिई, तेऊ किअ तैहा लै शोग। तेखअ डेऊअ आपणैं दोस्त अदुलाम नगरीए हीरू संघै तिम्ना नगरी लै, तिधी तै तेऊए हेल़्ही दी भेडा-बाकरी मुनदै लागै दै।
13तामारा का बी हेरअ कुंणी खोज़ी, “तेरअ शौहरअ आसा लागअ द भेडा-बाकरीए हेल़्ही मुनदअ तिम्ना नगरी लै डेऊंदअ।”
14तैहा ज़ाणअ इहअ बी कि शेलाह गअ हणअ ऐबै ज़ुआन हई, पर तेसो बैह निं तेऊ संघै हुअ। तेखअ ज़ुंण झिकल़ै बिधबा बेटल़ी बान्हां, तैहा खोल्है तिंयां पोर्ही संघा बान्हैं होर झिकल़ै अर मुंडा उंधै पाअ तैहा घुंढू। तेखअ रही सह एनीम नगरीए प्रऊल़ी बागै तिम्ना डेऊणे बाता बेठी।
15ज़ांऊं यहूदा तेस्सी बाती आअ, तेऊ निं सह बछ़ैणीं किल्हैकि तैहा त मुंडा उंधै घुंढू पाअ द। तेऊ ज़ाणअ इहअ कि अह आसा कुंण देबदासी।
16सह फिरअ बाता का तैहा बाखा संघा बोलअ तैहा लै, “मुंह संघै सुत्त।” तैहा बोलअ, “ज़ै हुंह इहअ करे, ताह किज़ै दैणअ मुल्है?”
17तेऊ बोलअ, “हुंह दैंऊं ताल्है बाकरीए हेल़्ही मांझ़ै एक छ़ेल्हू।”
तैहा बोलअ इहअ, “ज़ेभै तैणीं तेरअ सह छ़ेल्हू निं एछे तेभै तैणीं डाह किज़ै च़ीज़ मुंह सेटा बांधअ?” 18तेऊ पुछ़अ, “तूह बोल आप्पै हुंह किज़ै बांधअ डाहूं?”
तैहा दैनअ ज़बाब, “तेरी दसकते मोहर, गल़े कंठी अर तेरी हांढणे शोठी डाह मुंह सेटा बांधअ।” तेखअ दैनी तेऊ ईंयां सोभै च़िज़ा तैहा का संघा सुत्तअ तैहा सेटा अर सह हुई तेऊ करै सुंदी।
19तेखअ लागी सह तिधा का आपणैं घअरा लै हांढदी, घअरै पुजी खोल्है तैहा तिंयां झिकल़ै पोर्ही संघा बान्हैं तिंयां बिधबा आल़ै झिकल़ै।
20यहूदा छ़ाडअ आपणअ दोस्त अदुलाम नगरीओ हीरू कि एनीम नगरी एछ तैहा बेटल़ी सेटा छ़ेल्हू पजैल़ी, संघा आणै तैहा सेटा बांधै डाही दी दसकते मोहर, कंठी अर शोठी ओर्ही मांगी। पर सह बेटल़ी निं तेऊ तिधी भेटी।
21हीरू लागअ तिधी होरी लोगा का पुछ़दअ, “सह देबदासी किधी आसा ज़ुंण एनीमे प्रऊल़ी नेल़ तिम्ना डेऊणे बाता थिई बेठी दी?” तिन्नैं होरी बोलअ, “इधी निं कोहै देबदासी आथी ती।”
22हीरू डेऊअ यहूदा सेटा लै रित्तअ फिरी संघा बोलअ तेऊ यहूदा का, “मुंह निं तिधी सह बेटल़ी भेटी, एनीम नगरीए लोगै बोलअ इहअ कि देबदासी निं तैहा नगरी दी आथी ई।”
23यहूदा बोलअ तेऊ लै, “ज़ै ताह सह नांई भेटी तै दै तिन्नां च़िज़ा तैहा ई लै रहणैं, नांईं ता लोगा बी करनअ म्हारअ सुहांग। मंऐं हेरअ त तैहा लै छ़ेल्हू तेरै हाथै दैई पर ताह निं सह भेटी।”
24चिई भिन्नैं बाद खोज़अ कुंणी यहूदा का, “तेरी नुश तामार हुई ऐबै कंज़री, सह आसा सुंदी!”
यहूदा बोलअ ज़ोरै-ज़ोरै, “तैहा आणा नगरी बागै घिशी, तैहा लै चैल़णीं मुंह आग संघा करनी खतम।”
25तामारा बागै आणना लै तै लोग घिशदै लागै दै, तैहा दैनअ कहा का आपणैं शौहरै लै इहअ समाद, “ज़ुंणी मणछै मुल्है अह दसकते मोहर, गल़े कंठी अर शोठी आसा दैनी दी, हुंह आसा तेऊए सुंदी।”
26यहूदा हेरी तिंयां च़िज़ा बछ़ैणीं संघा बोलअ इहअ, “सह आसा मुखा भली, अह आसा मेरी गलती, तेसो निं किछ़ै कशूर आथी, मंऐं निं तैहा संघै आपणैं शोहरू शेलाहो बैह करने ज़बान पूरी किई।” तधा पोर्ही निं तेखअ यहूदा तैहा संघै सुत्तअ-बेठअ।
27-28तामारे हुऐ दोगल़ शोहरू। पर तिन्नां हणैं का आजी हुअ इहअ कि सुंदा बारी निखल़अ एकी शोहरूओ हाथ बागै, सुआऊई बान्हीं तेऊ शोहरूए हाथै मौल़ी, “अह शोहरू हुअ आजी।”
29पर तेऊ किअ आपणअ हाथ भितरा लै, अर तेथ हुअ आजी सह दुजअ शोहरू! तैहा सुआऊई बोलअ इहअ, “ए, तूह केस्सी गअ आप्पै बागै निखल़ी?” तिन्नैं डाहअ तेऊओ नाअं फिरिस#38:29 फिरिस बागै निखल़णअ। 30पिछ़ू हुअ तेखअ सह ज़सरै हाथै मौल़ी ती बान्हीं दी। तिन्नैं डाहअ तेऊ नाअं जेराह#38:30 जेराह लालू।
Currently Selected:
मूल़ 38: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
