मूल़ 21
21
खिरी हुअ सारो शोहरू-इसहाक
1ज़िहअ बिधाता बोलअ त, तेऊ डाहअ तैहा गल्लो धैन, संघा दैनी सारा लै बर्गत।
2एही थिअ आबराम खास्सअ प्रोढअ गअ द हई, तेऊ करै हुई सारा प्रोढी अमरा सुंदी संघा ज़िहअ बिधाता बोलअ त, तेसो हुअ ठीक तेभै ई शोहरू।#इब्रा. 11:11 3आबरामै डाहअ तेऊ शोहरू नाअं इसहाक#21:3 इसहाक मतलब सह हास्सा।#मोत्त. 1:2; लूक. 3:34 4तेखअ ज़िहअ बधान बिधाता आबरामा का खोज़अ त, आबरामै किअ इसहाको आठुऐ धैल़ै खतैर। #मूल. 17:12; शधा. 7:8
5ज़ेभै इसहाक हुअ तेभै ती आबरामे अमर शौआ साले गई दी हई।
6सारा बोलअ इहअ, “बिधाता दैनअ मुल्है बी खुशी मनाऊंणेओ मोक्कअ, ज़ुंण बी ऐहा गल्ला शुणें तेऊ बी मनाऊंणी मुंह संघै खुशी। 7इहअ निं कोही बी सोठअ त कि आबराम अर सारा का हणीं लुआद। पर तेऊए खास्सी प्रोढी अमरा बी दैनअ मंऐं तेऊ लै शोहरू।”
8ज़ांऊं शोहरू बडअ हुअ, तेखअ चल़ाऊई तिन्नैं तेऊ का च़ूई। ज़हा धैल़ी इसहाका का च़ूई चल़ाऊई, तैहा धैल़ी दैनी आबरामै धाम। #गल. 4:22; इब्रा. 11:11
हागार अर इशमाईल घअरा का काढणैं
9-10एकी धैल़ै भाल़अ सारा इहअ कि तेसे दासी हागारा का हुअ द शोहरू इशमाईल आसा इसहाका संघै खेल्हदअ लागअ द, तैहा बोलअ आबरामा का, “ऐहा मिसर देशा का आणी दी गलामा अर एसे एऊ शोहरू काढ इधा का दूर! हुंह निं च़ाहंदी कि अह मेरै शोहरू संघै साझ़ू बारस होए। अह लोल़ी मेरै शोहरू का दूर रहअ।”#गल. 4:29,30
11आबरामा पल़अ इशमाईले बारै इहै बैण शूणीं फिकर।
12पर बिधाता बोलअ आबरामा लै, “आबराम, तूह निं आपणीं गलाम बेटल़ी अर तेसे एऊ शोहरूए बारै फिकर करी। तूह कर तिहअ ई, ज़िहअ ताल्है तेरी बेटल़ी सारा बोल्दी आसा लागी दी। आजू हणीं इसहाका ई का तेरी आद-लुआद। #इब्रा. 11:18; रोम. 9:7
13“पर ऐहा दासीओ शोहरू बी आसा तेरअ ई शोहरू, एऊए आद-लुआदा का बी बणाणअं मुंह बडअ देश।”
14दुजै धैल़ै दोत्ती उझ़ुअ आबराम दोत्थी, संघा दैनी हागारा का रोटी-पाणींए खाल्हल़ी भरी। तेखअ दैनअ शोहरू तेसे कान्हा पाई संघा छ़ाडै तिंयां तिधा का दूर।
हागार लागी आपणैं शोहरू संघा निंईं तिधा का हांढदी। तिंयां रहै बेर्शेबा शुन्नैं रेगीस्तानै दुहै ज़ण्हैं कज़ेस्सी हांढदै लागी।
15ज़ांऊं खाल्हल़ी दी तिन्नों पाणीं मुक्कअ, हागारै डाहअ शोहरू कांडे झ़ुम्भल़ा हेठै छ़ैल्ली दी बशैल़ी।
16आप्पू रही तेखअ दूर ज़ेही कोई दूई शौ हाथ#21:16 शौ हाथ कोई शौ गज़ दूर दूर बेशी, किल्हैकि तैहा सोठअ इहअ, “आपणैं शोहरूए मौत निं मेरै भाल़्हुई च़ाल्ली#21:16 च़ाल्ली सह लागी हिक्का पटाक्की हिंह करै लेरा लांदी।”
सह थिई दूर ज़ेही बेठी दी अर शोहरू लागअ लेरदअ-छजैऊंदअ।
17बिधाता शूणअ सह शोहरू लेरा लांदअ, स्वर्ग दूतै लाई हागारा लै उझै का हाक्का संघा बोलअ इहअ, “हागार, तूह किल्है आसा डरी दी? फिकर निं करै, बिधाता हेरी तेरै शोहरूए लेरा-पकारा शूणीं।
18“खल़ी उझ़ू, आपणैं हाथा ढाकी कर एऊ शोहरू खल़ै, मुंह बणाणअं एऊ करै एक बडअ देश।”
19तेखअ रहैऊई बिधाता तैहा का तिधी एक पाणींए बाऐ, सह डेऊई तेता नेल़ संघा भरअ खाल्हल़ै दी पाणीं, तेखअ पणैऊंअं तैहा शोहरू का पाणीं।
20-21बिधाता दैनी इशमाईला लै बर्गत, ज़ांऊं शोहरू ज़ुआन हुअ, सह बणअ मशूर धणश-बाण च़लाऊंणैं आल़अ। सह रहा त परान शुन्नैं रेगीस्तानै। तेऊए ईजै लोल़ी तेऊ लै मिसर देशा का लाल़ी, संघा किअ तैहा संघै तेऊओ बैह।
अबीमोलका संघै आबरामे करार
22तिन्नां धैल़ै हुअ इहअ कि राज़ै अबीमोलकै अर तेऊए सैनापति पिकोलै बोलअ आबरामा लै, “बिधाता रहा तेरै हर कामां लै ताह संघै!#मूल. 26:26
23“तूह आसा भाल़ म्हारी ऐहा ज़ैगा परदेसी। मंऐं निं ताल्है किछ़ै छ़ल़-कपट किअ, हुंह च़ाहा इहअ कि तूह दै मुल्है बिधाते सोह खाई ज़बान कि ज़िहअ हुंह ताल्है भलअ रहअ, तिहअ रहै तूह बी मुंह अर मेरी आजू लुआदा संघै सदा भलअ।”
24आबरामै बोलअ, “मेरी रही ताल्है ज़बान।”
25एकी धैल़ै बोलअ आबरामै अबीमोलका लै, “तेरै नोकर-च़ाकरै गिम्मै मेरै सोभै कुहै।”
26अबीमोलकै दैनअ ज़बाब, “मुखा निं थोघै कि अह काम कुंणी किअ, तंऐं बी निं मुखा खोज़अ आथी, मंऐं निं आझ़ तैणीं एते बारै शूणअ ई।”
27आबरामै दैनी अबीमोलका लै भेडा-बाकरी, गाऊई-बल्द, गाधै-गाधी अर ऊँटे हेल़्ही, संघा किई आप्पू मांझ़ै करार।
28आबरामै डाही सात गाभी हेल़्ही का ज़ुदी ज़ेही।
29अबीमोलकै पुछ़अ आबरामा का, “ईंयां सात गाभी ज़ुंण तंऐं ज़ुदी ज़ेही डाही, एतो कै मतलब हुअ?”
30आबरामै दैनअ ज़बाब, “तूह ढाक मुखा इना साता गाभी, ताकि तूह मेरअ शाजत होए कि अह कुहअ थिअ मंऐं खण्हअ द।”
31तिन्नैं दुही दैनी सोह खाई एकी-दुजै लै ज़बान, इहअ करै पल़अ तैहा ज़ैगा नाअं बेर्शेबा#21:31 बेर्शेबा सात कुहै मतलब सोह।
32ज़ांऊं बेर्शेबा तिन्नें आप्पू मांझ़ै करार हुई, तेखअ डेऊऐ अबीमोलक अर तेऊओ सैनापति पिकोल बापस पलिश्ती देशा लै फिरी।
33आबरामै रोप्पअ बेर्शेबा एक मधनूंओ बूट संघा किई तेऊ अमर परमेशर बिधाते स्तोती।
34आबराम रहअ तेखअ खास्सी साला पलिश्ती लोगे देशै परदेसी।
Currently Selected:
मूल़ 21: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
