मूल़ 12
12
बिधाता शादअ अब्राम
1बिधाता#12:1 बिधाता याहवेह बोलअ अब्रामा का, “तूह डेऊ आपणैं देश अर आपणैं टबरा#12:1 टबरा तैहा ज़ैगा ज़िधी हुअ ज़ल्मअ अर ज़िधी तेऊए आपणैं नातै रिश्तैदार आसा छ़ाडी तेऊ देशा लै ज़ुंण मुंह ताखा रहैऊंणअ।#शधा. 7:3; इब्रा. 11:8
2“मुंह दैणीं ताल्है बर्गत अर तेरी आद-लुआदा करै बणाणैं मुंह खास्सै देश। तूह हणअ इहअ मशूर कि ताह करै भेटणीं होरी बी बर्गत।
3“ज़ुंण ताल्है भलअ करे तेऊ लै दैणीं मुंह बर्गत, पर ज़ुंण ताल्है फिटक दैए, तिन्नां लै दैणअ मुंह फिटक। पृथूईए सोभी खिंबे लोगा भेटणीं ताह करै मुखा बर्गत।” #शधा. 3:25; गल. 3:8
4-5बिधाता ज़धू अब्राम हारान देशा का शादअ, तधू थिई तेऊए अमर पझत्तरा साले। ज़िहअ बिधाता तेऊ लै बोलअ, तिहअ ई लागअ सह तिधा का आपणीं लाल़ी साराई, भतिज़ै लूता संघा लई कनान देशा लै हांढदअ। हारान देशै ज़ुंण ज़ैदात अर गलाम तेऊ संघै थिऐ, तिंयां बी आणै तेऊ संघा।#शधा. 7:4
6हांढदी-हांढदी पुजअ अब्राम शकेम नाओंए तैहा ज़ैगा, ज़िधी महरूओ बडअ बूट आसा। तेऊ ज़मानैं रहा तै अज़ी बी तेऊ देशै कनानी लोग।
7बिधाता हुअ अब्रामा सेटा प्रगट संघा बोलअ अब्रामा लै इहअ, “तेरी लुआदा लै दैणीं मुंह अह ज़ैगा सदा लै।” तेखअ बणाईं अब्रामै तिधी बिधाता लै एक बेदी।#गल. 3:16
8तेखअ फिरअ अब्राम तिधा का बेतेल नगरी पुर्ब दिशा बाखा, धारा बाखे मुल्खा लै तिधी पाअ तिन्नैं तेखअ डेरअ, पछ़मा बाखा बेतेल अर पुर्बा बाखा ती एई नगरी। तिधी बी बणाईं अब्रामै बिधाता लै एक बेदी। 9बादा का डेऊअ अब्राम हांढदी-हांढदी कनान देशे दखणा बाखा।
अब्राम मिसर देशै
10-11कनान देशै पल़अ सारै दी खास्सअ नकाल़ संघा डेऊअ अब्राम आपणीं लाल़ी साराई अर आपणैं सोभी मणछा संघी मिसर देशा लै कि तिंयां नकाल़ खतम हणैं तैणीं तिधी रहे।
ज़ांऊं तिंयां मिसर देशा नेल़ पुजै, अब्रामै बोलअ साराई लै, “तूह आसा हेरनी खास्सी बित्ती! 12ताह भाल़ी सका मिसर देशे लोग मुंह मारी पाई, किल्हैकि हुंह आसा तेरअ मर्ध। पर ताह निं ईंयां मारदै। 13ज़ीबाण, तूह बोलै इहअ कि तूह आसा मेरी बैहण, तै झ़ाणीं हुंह बच़े।”#मूल. 20:2; 26:7
14ज़िहअ ई अब्राम अर साराई मिसर देशै पुजै, मिसरी लोगै भाल़अ कि साराई आसा हेरनी बित्ती। 15राज़दारै खोज़अ तेसे बारै मिसर देशे माहा राज़ै का, अर साराई पजैल़ी मिसर देशे माहा राज़ेए मैहलै।
16मिसर देशो राज़अ#12:16 मिसर देशो राज़अ फिरोन हुअ साराई करै अब्रामा लै खुश अर तेऊ दैनी अब्रामा लै खास्सी भेडा-बाकरी, गाऊई-बल्द, गाधै-गाधी अर ऊँटे हेल़्ही अर गलाम।
17पर बिधाता पाई अब्रामे लाल़ी साराई पिछ़ू मिसर देशे माहा राज़ेए सारै टबरा जैंदरी घोर बमारी अर आफ़त। 18खिरी शादअ मिसर देशे माहा राज़ै अब्राम संघा बोलअ तेऊ लै, “अह कै किअ तंऐं मुंह संघै? तंऐं किल्है निं खोज़अ कि साराई आसा तेरी लाल़ी? 19तंऐं किल्है बोलअ इहअ कि अह आसा तेरी बैहण? तैही लाअ त मंऐं ऐहा संघै बैह करी! ऐबै निंऊं ऐहा आपणीं लाल़ी संघा डेऊ इधा का।”
20तेखअ बोलअ मिसर देशे माहा राज़ै आपणैं लोगा कि अब्रामा अर एऊए लाल़ी दैआ इने ज़ैदाता संघी इधा का राज्ज़ी-राम्बल़ै फिरी डेऊणैं।
Currently Selected:
मूल़ 12: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
