एज्रा 7
7
एज्रा पुजअ एरुशलेम
1खास्सी साला बाद, ज़ांऊं फारस देशै अर्तक्षत्र माहा राज़ैओ राज़ आअ, तेथ त एक एज्रा नाओं मणछ। सह आअ बाबेल देशा का एरुशलेम नगरी लै फिरी। सह थिअ हारण माहा प्रोहते खिंबा का। तेऊओ खिंब त पिछ़ू इहअ:
एज्रा त सरयाहो शोहरू, सरयाहो बाब त अजर्याह, अजर्याहो बाब त हिलकिया, 2शलूम थिअ हिलकियो बाब, शलूमो बाब थिअ सदोक, 3सदोको बाब थिअ आहीतूब, आहीतूबो बाब थिअ अमर्या, अमर्यो बाब थिअ अजर्याह, अजर्याहो बाब थिअ मरयोत, 4मरयोतो बाब थिअ जेराह, जेराहो बाब थिअ ऊज्जी, ऊज्जीओ बाब थिअ बूकी। 5बुक्की त अबीशूओ शोहरू, अबीशूओ बाब त पिनहास, पिनहासो बाब त एलीआजर अर एलीआजर त हारण माहा प्रोहतो शोहरू।
6-7एज्रा त शास्त्री, तेऊ त बधानो सारअ ज्ञैन ज़ुंण परमेशर बिधाता आपणैं दास मोसा लै दैनअ त। एज्रा लै हुई तेऊए परमेशर बिधाते एही बर्गत कि माहा राज़ै दैनअ तेऊ लै ज़िहअ तेऊ मांगअ तिहअ। अर्तक्षत्र माहा राज़ेए राज़ा दी छ़ाडअ एज्रा बाबेल देशा का इज़राईलीए एकी दला संघै एरुशलेम नगरी लै, तेऊ दला दी थिऐ प्रोहत, लेबी, भबने गाज़ै-बाज़ै आल़ै, भबने पहरी अर होर बिधाते भबनै च़ाकरी करनै आल़ै। 8-9तिंयां लागै साज़ै च़ैत्रै नऊंऐं संबते धैल़ी बाबेल देशा का यहूदा मुल्खा बाखा हांढदै, बिधाता किई तिन्नें मज़त अर तिंयां पुजै साज़ै शाऊंणै एरुशलेम नगरी। 10एज्रा काटी आपणीं सारी ज़िन्दगी बिधाते बधाना शिखल़णा लै अर तेते साबै आपणीं ज़िन्दगी ज़िऊंणां लै। तेखअ रहअ आपणीं ज़िऊंदी ज़िता बधाने बिधी अर शिक्षा इज़राईली परज़ा का सखाऊंदअ लागी।
अर्तक्षत्र माहा राज़ै ज़ुंण च़िठी एज्रा का दैनी
11एज्रा त प्रोहत अर शास्त्री। बधान अर तेते सोभै बिधी ती तेऊ पठी शिखल़ी दी ज़ुंण बिधाता इज़राईली परज़ा लै थिई खोज़ी दी। माहा राज़ै अर्तक्षत्रै दैनअ एज्रा का सरकारी हुकम लिखी, तेते नकल आसा अह:
12“माहा राज़ै अर्तक्षत्रा बाखा प्रोहत एज्रा लै, ज़ुंण स्वर्गे परमेशरे बधानो शास्त्री आसा।
13“ज़ेतरै देशै मेरअ राज़ आसा, हुंह करा तिन्नां सोभी देशै बस्सै दै इज़राईली, प्रोहत अर लेबी लै हुकम कि ज़सरअ दिल बोला सह सका एज्रा संघै एरुशलेम नगरी लै फिरी डेऊई। 14मंऐं अर मेरै सात बज़ीरै दैनी एज्रा लै एरुशलेम डेऊंणा लै ज़ाज़त कि सह यहूदा मुल्खै ज़ाच़े-भाल़े कि परमेशरे बधानो ज्ञैन ज़ुंण तेऊ का आसा, तेता यहूदा अर एरुशलेम नगरी केतरअ मना। 15तेऊ सुन्नैं-च़ंदी संघा निंणे ज़ाज़त बी आसा एज्रा लै ज़ुंण मंऐं अर मेरै बज़ीरै इज़राईले परमेशरा लै भैंट किअ ज़सरअ भबन एरुशलेम आसा। 16ज़ुंण सुन्नअ च़ंदी एज्रा बाबेल सारै देशै लोगा का गराहअ, अर ज़ुंण भैंट इज़राईली मणछै अर प्रोहतै आपणैं परमेशरे भबन एरुशलेम नगरी लै दैनी।
17“इना ढब्बै करै लऐ एज्रा बल़ीदान करना लै बल्द, रिठ, गाभू, हूम करना लै नाज़ अर अर्घै दैणा लै दाखो रस संघा च़ढाऊऐ तैहा बेदी दी ज़ुंण थारै परमेशरे एरुशलेम नगरीए भबनै आसा। 18ज़ुंण सुन्नैं-च़ंदीए ढब्बै बच़े, तेता करै लऐ एज्रा अर तेऊए साथी तिन्नां च़िज़ा ज़िहअ तिन्नों दिल बोले या ज़ेही परमेशर तिन्नें दिलै पाए तेही। 19ज़ेतरअ बी समान एज्रा का एरुशलेम भबने च़ाकरी लै दैनअ, तेता करै तिधी परमेशरा सेटा भैंट। 20एता का लाऊआ बिधाते भबना ज़ै ज़रुरत होए, तेता सका तिंयां तिधी राज़े खज़ानैं का मांगी।
21“हुंह अर्तक्षत्र माहा राज़अ करा इहअ हुकम कि ज़ुंण फरात दरैऊआ पार पछ़मा बाखा मेरै खज़ाने भढारी आसा, तिंयां दैऐ स्वर्गे परमेशरे बधाने ज़ाणकार शास्त्री एज्रा लै ज़िहअ अह मांगे तिहअ तेभी। 22तम्हैं सका चऊती कुंटल़ तैणीं च़ंदी, एक शौ कुंटल़ तैणीं कणक, दूई हज़ार बाटी तैणीं दाखो रस अर एक हज़ार बाटी जैतूनो तेल दैई। लूंण सका तम्हैं ज़ेतरअ मांगे तेतरअ दैई। 23स्वर्गे परमेशरा बाखा ज़िहअ बी हुकम होए, तिन्नां च़िज़ा दैऐ तम्हैं तेभी भबनै पजैल़ी। ऐहा गल्लो डाहै धैन हेरे सह परमेशर निं लोल़ी मुखा अर मुंह बाद राज़ करनै आल़ै मेरै शोहरू का रुश्शअ। 24तम्हां लै करा हुंह हुकम कि परमेशरे भबनै प्रोहत, लेबी, गाज़ै-बाज़ै आल़ै, पहरी, च़ाकरी करनै आल़ै अर होर ज़ुंण भबने कामां-काज़ा होए, तिन्नां का निं कारअ गराही।
25“तेखअ आसा एज्रा लै मेरअ इहअ हुकम कि ज़ुंण अक्ल ताह परमेशरा का आसा भेटी दी, तैहा अक्ल लाई छ़ांटै तूह फरात दरैऊआ पछ़मा बाखा सारै मुल्खै सैणैं ज़ुंण लोगे पांच़ी करी सके। ईंयां सैणैं लोल़ी परमेशरे बधाना ज़ाणनै आल़ै हुऐ ज़ुंण होरी बी शखैल़ी सके ज़हा का थोघ निं आथी। 26ज़ुंण बी परमेशरो बधान अर माहा राज़ैओ हुकम नांईं मने, तिन्नां लै निं धख बी झींण हणीं, तिन्नां सका, मौते सज़ा, देश नकाल़अ, ज़ैदाते कुल़की या कैदखाने सज़ा हई।”
एज्रा किई परमेशरे ज़ै-ज़ैकार
27एज्रा बोलअ इहअ, “आपणैं दादा-बाबे परमेशर बिधाते करा ज़ै-ज़ैकार! तेऊ पाई फारसी राज़ेए मन्नैं एही कि सह एरुशलेम बिधाते भबनो अदर करे। 28बिधातो जश हुअ इहअ कि माहा राज़ेए बज़ीर अर तेऊए बलबान कार-करिंदै बी लअ मेरअ पक्ष। परमेशर बिधाता दैनी मुल्है एही हिम्मत अर तेऊ किअ हुंह इज़राईले टोली मांझ़ा का खास्सै सैणैं आप्पू संघै एरुशलेम आणना लै सफल।”
Currently Selected:
एज्रा 7: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
