एजकेल 25
25
अमोन नगरीए बारै बिधातो समाद
1 #
जेर. 49:1-6; एज. 21:28-32; आम. 1:13-15; सप. 2:8-11 बिधाता बोलअ मुल्है भिई इहअ, 2“मणछा, अमोन नगरीए बारै लअ तूह मेरअ समाद खोज़ी। 3तूह लअ तिन्नां अमोनी का खोज़ी कि हुंह परमेशर बिधाता बोला तिन्नां लै इहअ, ‘ज़धू मेरअ भबन छ़ोतलअ किअ, ज़धू इज़राईल देश बरैबाद किअ, ज़धू यहूदा मुल्खे परज़ा कैद करी गलामी लै निंयैं, तम्हैं हुऐ तधू बडै भारी खुश! 4ऐबै शूणां तम्हैं! मुंह सभाल़णैं तम्हैं पुर्बा बाखे लोगा का, ताकि तिंयां तम्हां गलाम बणांए। तिन्नें सैना पाणै थारै देशै तम्हां जैंदरी डेरै। तिंयां बस्सणै तम्हां जैंदरी संघा तिन्नां झुटणअ तिन्नां भेडा-बाकरी अर गाऊईओ दुध अर तिन्नां खाणैं तिन्नां डाल़ा-बूटे फल़ ज़ुंण थारै आसा। 5मुंह करनअ इहअ कि थारी राज़धानी रबाह नगरी हणीं एही ज़ैगा ज़ेथ ऊँट हणैं घाह च़रदै लागै दै। अमोन देश हणअ इहअ ज़ेथ सारै देशे भेडा-बाकरीए हेल़्ही हणीं सुत्ती दी। ताकि तम्हां का थोघ लागे कि हुंह आसा बिधाता।’”
6परमेशर बिधाता बोला इहअ, “ज़धू मंऐं इज़राईला लै सज़ा दैनी, तम्हैं तै तधू ताल़ी बाज़दै लागै दै! तम्हैं लाई तैहा खुशी दी छ़ाहल़ा। तम्हैं किई इज़राईल देशे बेइज़ती कि भली हुई। 7ऐबै शूणां तम्हैं! ऐबै दैणी मुंह तम्हां लै सज़ा। मुंह दैणअ होरी देशा थारी किम्मती च़िज़ा लुटणैं। मुंह करनअ थारअ नाअं-नशाण ई खतम, कि आजू थारअ देश रहे ई निं! मुंह करनै तम्हैं पठ बरैबाद! तेखअ लागणअ तम्हां का थोघ कि हुंह आसा बिधाता।”
मोआब देशे बारै समाद
8 #
ईशा. 15:1—16:14; 25:10-12; जेर. 48:1-47; आम. 2:1-3; सप. 2:8-11 परमेशर बिधाता बोला इहअ, “मोआब अर सेईर देश बोला इहअ कि यहूदा मुल्ख आसा होरी देशा ज़िहअ। 9ऐबै शूणां! मुंह दैणअ तिन्नें दुशमणा मोआब देशे सिऊंआं दी बस्सी दी नगरी बाती एछणैं। मुंह दैणअ तिन्नें सोभी का बधिया नगरी बेथ-जासमोत, बाल-मिऊन अर किर्यातैम नगरी दुशमणा कबज़अ करनै ज़ुंण तिन्नें सोभी का खास नगरी आसा। 10अमोनी संघै करनै मुंह मोआब देशे लोग बी पुर्बा बाखा रेगीस्तानै बस्सै दै लोगे गलाम। होरी देशा निं आद बी रहणीं कि अमोन अर मोआब बी थिऐ होए देश! 11इहअ करै दैणी मुंह मोआब देशा लै सज़ा अर तेखअ लागणअ तिन्नां का थोघ कि हुंह आसा बिधाता।”
एदोम देशे बारै बिधातो समाद
12 #
ईशा. 34:5-17; 63:1-6; जेर. 49:7-22; एज. 35:1-15; आम. 1:11,12; ओब. 1-14; मिक. 1:2-5 परमेशर बिधाता बोलअ इहअ, “एदोम देशै काढअ यहूदा मुल्खा लै बडै नर्दैई हई बदल़अ! ज़ुंण तिन्नैं यहूदा मुल्खा संघै किअ, तिन्नां लै आसा तेतो दोश। 13ऐबै बोला हुंह परमेशर बिधाता इहअ कि मुंह दैणीं एदोम देशा लै सज़ा। मुंह पाणै तेऊ देशे सोभ मणछ सोभ मारी, तेथ निं मुंह डागै-चैणैं बी ज़िऊंदै छ़ाडणैं। तेऊ देशे ज़ैगा करनी मुंह पठ शुन्नीं। तिन्नें दुशमणा पाणै तिंयां जुधा दी तेमान नगरी पोर्ही ददान नगरी तैणीं सोभ तलबारा करै मारी। 14मुंह लणअ आपणीं परज़ा इज़राईली करै एदोम देशा का बदल़अ। तेखअ लागणअ एदोमी का थोघ कि मुंह तिन्नां लै केही रोश्शै आसा आई दी अर तिन्नां लै सज़ा दैणैं आल़अ आसा हुंह बिधाता। अह गल्ल डाही मंऐं परमेशर बिधाता बोली।”
पलिश्ती देशे बारै बिधातो समाद
15परमेशर बिधाता बोलअ इहअ, “पलिश्ती आसा इज़राईले आद-लुआद यहूदा मुल्खे परज़ा संघै जुगा-जुगा ओर्ही ज़ीद। सह ज़ीद डाही काढी तिन्नैं इज़राईली लै नर्दैई हई बदल़अ। तिंयां च़ाहा इज़राईला पठ खतम करनअ।#ईशा. 14:29-31; जेर. 47:1-7; जोए. 3:4-8; आम. 1:6-8; सप. 2:4-7; जक. 9:5-7 16ऐबै शुण! हुंह परमेशर बिधाता बोला इहअ कि मुंह दैणीं पलिश्ती लै सज़ा। मुंह पाणै करेती लोग मारी। ज़ुंण समुंदरे बाढै बच़ै दै आसा, तिंयां करनै मुंह खतम। 17मुंह दैणीं तिन्नां पलिश्ती लै घोर सज़ा, मुंह काढणअ तिन्नां का बदल़अ। आपणैं तात्तै रोश्शै दैणअ मुंह तिन्नां लै इहअ सबक कि तिन्नां का थोघ लागे कि हुंह आसा बिधाता।”
Currently Selected:
एजकेल 25: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
