एजकेल 21
21
बिधाते तलबार
1बिधाता बोलअ मुल्है इहअ, 2“मणछा, एरुशलेम नगरी बाखा भाल़, संघा खोज़ मेरी पबित्र ज़ैगे बारै कि तेथ किज़ै खोट आसा। तूह दै मेरअ समाद खोज़ी इज़राईली लै चतैनगी। 3तूह बोल तिन्नां लै कि हुंह बिधाता बोला तिन्नां लै इहअ, ‘हुंह आसा ऐबै तम्हां इज़राईलीओ दुशमण, ऐबै काढणीं मुंह कुछी का आपणीं तलबार, संघा पाणै मुंह तम्हैं धर्मीं अर पापी सोभ मारी। 4दखण दिशा उझै उतरा तैणीं पाणै मुंह सोभ मारी। मुंह निं तम्हां मांझ़ै कोह ज़िऊंदअ छ़ाडणअ, च़ाऐ सह धर्मीं होए च़ाऐ पापी। 5तेखअ लागणअ सोभी का थोघ कि हुंह आसा बिधाता। सह आसा हुंह ज़ुंण तम्हां आपणीं तलबारा करै सज़ा दैंदअ आसा लागअ द। सह हेरी मंऐं काढी, ऐबै निं हुंह तैहा कुछी बापस डाहंदअ।’
6“मणछा, तूह लाऐ ज़ोरै-ज़ोरै ढाहा, सोभी लोगै लोल़ी तूह भाल़अ कि तूह आसा खास्सअ दुखी हुअ द। 7लोगा पुछ़णअ तूह, ‘तूह किल्है आसा इहअ दुखी हुअ द?’ तूह खोज़ै तिन्नां का, ‘ज़ुंण शणांईं शुण्हनी, हुंह आसा तेता लै दुखी हुअ द। तम्हां सोभी बी डरनै तेता शूणीं खास्सै। तम्हां छ़ुटणैं हाथ ल्हिथल़ै अर ज़ांघा छ़ुटणअ दर्छ़णअ। सह धैल़ी गई मुंहां सेटा पुजी।’” ईंयां गल्ला बोली मालक बिधाता।
8बिधाता बोलअ मुल्है भिई इहअ, 9“मणछा, मेरअ समाद खोज़ लोगा का। तूह लअ तिन्नां का खोज़ी कि हुंह थारअ परमेशर बिधाता बोला तिन्नां लै इहअ,
‘मेरी तलबार भाल़ा! अह आसा तिछी अर च़मकदी लागी दी।
10अह आसा काटणा लै पल़ैई दी,
एता का आसा बिज़ल़ी ज़िहअ च़लकार लागअ द!
एता शूणीं निं खुश हंदै लागी! किल्हैकि
तम्हैं मेरी परज़ा निं मेरी सज़ा अर चतैनगीओ अदर किअ।
11तलबार आसा पल़ैई हेरी दी कि
ऐहा हाथै च़की सके।
अह आसा पल़ैई करै च़स करदी किई दी ताकि
मारनै आल़अ एता करै काटे।
12मणछा, हिक्का-पटाक्की ला ज़ोरै-ज़ोरै ढाहा, तूह कर शोग, किल्हैकि
मंऐं च़की अह आपणीं तलबार मेरी आपणीं इज़राईली परज़ा अर
तिन्नां प्रैंदै राज़ करनै आल़ै इज़राईली सैणैं मारना लै।
मंऐं आसा तिंयां एता करै खतम लाऐ दै करी।
13हुंह आसा मेरी परज़ा परखदअ लागअ द,
ज़ै तिंयां आपणअ मन्न नांईं बदल़े,
तै रहणीं ईंयां सोभै गल्ला तिन्नां लै हई।’”
ईंयां गल्ला बोली परमेशर बिधाता।
14“मणछा, तैही लअ तूह मेरअ समाद खोज़ी लोगा लै चतैनगी दैई। तूह रह आपणैं हाथा पटाक्कदअ लागी। मेरी तलबार लोल़ी तिन्नां लै भिई-भिई पल़ी। तिन्नां लै पल़णअ मुंह सोभी बाता चुटी। 15तेता करै लागणीं तिन्नां डरै काम्मणीं। तिन्नां मांझ़ै बधल़णैं खास्सै धरनीं। मेरी तलबार आसा तिन्नां नगरीए हर प्रऊल़ी मारना लै उझ़ुई गई दी। सह आसा मंऐं काटणा लै च़स करदी डाही दी पल़ैई अर तेता का आसा बिज़ल़ी ज़िहअ च़लकार लागअ द। 16‘मेरी तलबारै! तूह हअ दोहरी बाखा तिछी! संघा काट दैहणीं बाखा, बाऊंईं बाखा। ज़ेथ बाखा बी तूह फिरे तेथ बाखा काट। 17मुंह बाज़णीं ताल़ी अर तेखअ हणअ मेरअ रोश्श फांभअ। अह गल्ल बोली मंऐं बिधाता।’”
बाबेल देशे राज़ेए तलबार
18बिधाता बोलअ मुल्है भिई इहअ, 19मणछा, “तूह बणाऊं दूई बाते नक्षै ताकि तेस्सी बाती बाबेल देशे राज़ेए सैना तलबारा पाई एछी सके। दुहै बाता लोल़ी तेऊ ई देशा का निखल़ी दी हुई। ज़िधा का तिंयां बाता नगरी बाखा लै फिरे, तिधी डाहै तूह नगरी बाखा बाता खोज़णेंओ नछ़ैण लाई। 20एक बात डाहै तूह ज़ुंण अमोनी देशे राज़धानी रबाह नगरी लै डेओआ अर दुजी बात डाहै तूह यहूदा मुल्खे राज़धानी एरुशलेम नगरी लै खोज़ी। ताकि बाबेल देशे सैना तलबारा पाई तेस्सी एछी सके। 21बाबेल देशो राज़अ एछणअ तैहा ज़ैगा तैणीं ज़िधा का बाता दूई बाखा लै डेओआ। तेऊ पाणीं तिधी प्रशण कि कहा बाता डेऊणअ। तेऊ पुछ़णअ तिधी आपणैं कतीर झ़ल़ाऊई करै आपणैं देअ-देबी का अर तेऊ का शुझणअ तिधी बल़ीदान किऐ दै पशूओ काल़ज़अ। 22तेऊए दैहणीं बाखा बाता कतीरा ज़िहअ नछ़ैण हणअ एरुशलेम नगरी बाखा डेऊणे बात अर तेऊ करनअ आपणीं सैना लै हुकम कि तैहा बाता डेऊई मारा तिधी सोभी लोगा। तेऊए सैना गोटणी नगरी फेरा-फेर, गहल़े दुआली ढोल़णा लै करनै तेऊ चेच खल़ै अर फेर डाहणीं खाल़्ही खण्हीं। 23एरुशलेम नगरीए लोगै आसा बाबेल देशे राज़ेए गलामी मनी दी। तैही सोठा तिंयां कि तेऊ निं तिन्नां संघै जुध छ़ेल़णअ। पर तेऊ खोज़णअ तिन्नां का आप्पै कि तिन्नों किज़ै कशूर आसा। तेता पिछ़ू निंणै तेऊ तिंयां कैद करी।”
24तैही बोला मालक बिधाता इहअ, “एरुशलेम नगरीए लोगो, थारै पाप शुझुऐ सोभी का। सोभी का लागअ थोघ कि तम्हैं किहै ज़ुल्म करनै आल़ै आसा। ज़ुंण बी तम्हैं करा, तेता करै शुझिआ थारै पाप पठी। तम्हैं आसा दोशी अर तम्हैं दैणैं मुंह थारै दुशमणा कैद करनै।
25“ताल्है बोला हुंह, ज़ुंण तूह इज़राईलो कदुष्ट राज़अ आसा। ऐबै गई तेरी खिरी सज़ा दैणें धैल़ी पुजी।” 26हुंह थारअ परमेशर बिधाता बोला, “राज़ेए मुंडा का काढा साफअ अर मुगट पोर्ही। ऐबै निं आजू इहअ रहणअ। रैनै-गरीबो कर अदर अर ज़ुंण राज़ करनै आल़ै आसा तिन्नां काढा पदबी का पोर्ही।#भज. 75:7 27बरैबाद हुई! ज़ाथी हुई पठ बरैबाद! मुंह करनी नगरी बरैबाद। अह हणअ तेभै ज़ेभै सह नगरी लै सज़ा दैंदअ एछणअ ज़ुंण मंऐं छ़ांटअ द आसा। तेखअ दैणअ मुंह ऐहा नगरीओ सारअ हक तेऊ लै।”
तलबार अर अमोनी लोग
28 #
जेर. 49:1-6; एज. 25:1-7; आम. 1:3-15; सप. 2:8-11 बिधाता बोलअ इहअ, “मणछा, तूह लअ अमोनी लोगे बारै मेरअ समाद खोज़ी। तूह खोज़ कि ज़ुंण अमोनी इज़राईले बेइज़ती करदै आसा लागै दै, तिन्नां लै बोला हुंह मालक बिधाता इहअ,
‘तलबार आसा काटणा-मारना लै च़स करदी पल़ैई हेरी दी,
तेथ आसा पाण दैई हेरी दी अर तेथ आसा बिज़ल़ी ज़िहअ च़लकार लागअ द।
29“‘ज़ुंण तम्हां धैन हुअ, सह गल्ल निं शुची आथी, ज़ुंण तम्हैं अटकल़ लाआ कि आजू हणअ इहअ, तिंयां गल्ला बी आसा झ़ुठी। तम्हैं आसा बूरै अर कदुष्ट। तम्हां लै सज़ा दैणें धैल़ै गऐ पुजी। तम्हैं काटणै तलबारा करै।
30“‘तलबार! ऐबै हट तूह पिछ़ू! मुंह करनअ तेरअ नसाफ बाबेल देशै ई ज़िधी तूह बणाईं ती अर ज़हा ज़ैगा तेरअ ज़ल्म हुअ त। 31ताल्है दैणअ मुंह ऐबै आपणअ रोश्श तरैल़ी, तूह हणीं मेरै आगी ज़िहै रोश्शा करै दझ़ी खतम। मुंह दैणीं तूह तिन्नां लोगा लै ज़हा हत्या करना लै धख बी झ़िह निं लागदी। ज़ुंण मणछा मारना लै मशूर आसा। 32तूह करनी आगी जैंदरी दहई पठी खतम। तेरअ लोहू पोछणअ तेरै आपणैं देशै। तेरी निं आजू कहा आद बी रहणीं तुबी थिई होए। अह गल्ल डाही मंऐं बिधाता बोली।’”
Currently Selected:
एजकेल 21: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
