एजकेल 1
1
परमेशरै खोज़ी एजकेले धैनै गल्ला
1-3हुंह बूज़ीओ शोहरू एजकेल थिअ बिधातो प्रोहत। यहूदा मुल्खे राज़ै जेहोकीना गई ती बाबेल देशे गलामी लै निंईं पांज़ साला बिति। हुंह त होरी यहूदी संघै बाबेल देशै कबार दरैऊए बाढै बस्सअ द ज़ुण कैद करी थिऐ निंयैं दै। मेरी अमरे तिहुई साला पांज़ा शाल़्है भाल़अ मंऐं धैनै-सुपनै इहअ कि बिधाता घुआल़अ उझै का सरग संघा खोज़अ मुखा आपणअ समाद। तिधी रहैऊई बिधाता मुखा आपणीं शगती।#प्रका. 19:11; 2 राज़. 24:10-16; 2 इति. 36:9,10
4हुंह लागअ उझै बाखा भाल़अ अर मुखा शुझुअ इहअ कि उतर दिशा बाखा आई बडी ढिश-बागरी! घणैं बादल़ा मांझ़ा का थिई बिज़ल़ीए च़पराल़ै लागै दै अर सारै सरगै ती झ़प्प-तल़प्पी लागी दी। ज़ेसी बिज़ल़ीए च़पराल़ै लागा तै, तेथ शुझिआ त किज़ै कांस्सै ज़िहअ। 5#प्रका. 4:6बडी ढिश-बागरी मांझ़ै शुझुऐ मुखा च़ार ज़ीब निखल़ै, तिंयां ज़ाण्हिंआं तै मणछा ज़िहै, 6पर तिन्नें तै हरेकीए च़ार-च़ार मुंह अर च़ार-च़ार फैंख। 7तिन्नें ज़ांघा ती आज़री अर तिन्नें खूर तै बाछ़ूए गोछ़ै ज़िहै अर तिन्नें तिंयां गोछ़ै तै बान्नी लाऐ दै कांस्सै ज़िहै च़मकदै लागै दै। 8हरेकी ज़ीबे फैंखा हेठै थिऐ मणछा ज़िहै च़ार-च़ार हाथ मतलब हर फैंखा हेठै एक-एक हाथ। 9तिन्नैं तै आपणैं फैंख एकी दुजै संघै छुंआऊंई च़कोर पाअ द। तिंयां दैआ तै कठा डैअ अर आजू-पिछ़ू ओर्ही-पोर्ही डेऊंणा लै निं तिन्नां फेरअ दैणें ज़रुरत हंदी ती।
10तिन्नां च़ऊ ज़ीबे तिंयां च़ार मुंह तै च़ऊ भांतीए, आजू बाखा त मणछो मुंह, दैहणीं बाखा त सिहो मुंह, बाऊंईं बाखा बल्दो मुंह अर तुंबी बाखा त मुक्षरलै ज़िहअ मुंह।#एज. 10:14; प्रका. 4:7 11दूई फैंख तै तिन्नैं फुआरी करै एकी-दुजै संघै छ़ुंआऊंऐ दै अर बाकी दूई फैंख झाल़ी करै ती तिन्नैं आपणीं देही बुदरी डाही दी। 12तिन्नें सोभिए तै च़ऊ बाखा मुंह, तैही सका तै तिंयां ज़ेथ बाखा लै तिन्नों शाह बोला तेथ बाखा लै डैअ दैई, तेता लै निं तिन्नां फेरअ दैणें ज़रुरत पल़दी ती।
13तिंयां ज़ीब शुझिआ तै ज़िहै ज़ल़दै कोइलै ज़िहै, मुखा शुझुअ तिन्नां मांझ़ै आसा ज़ल़दै मसाल्लै ज़िहअ सह करा तिन्नां पिछ़ू अर आजू हटी प्रैश्शअ करी। तेऊ मसाल्लै दी करा उझै आग भकी संघा हआ तेता का बिज़ल़ी ज़ेही झ़प्प-झ़प्प लागी दी।#प्रका. 4:5; 11:1 14तिंयां ज़ीब बी सिक्का आजू-पिछ़ू बिज़ल़ी ज़िहै छ़ेक्कै।
15 #
एज. 10:9-13
हुंह त तिन्नां च़ऊ ज़ीबा भाल़अ लागअ द कि मुखा शुझुऐ तिन्नां च़ऊ ज़ीबे मुंहें सिधा दी धरनीं च़ार घरेट, 16तिंयां च़ार घरेट तै पेरोज़ नाओंए किम्मती पात्थरा ज़िहै च़मकदै लागै दै, तिंयां तै, तिंयां तै ज़ाथी सोभै ज़ाती एकी रंगे अर बराबर। तिंयां घरेट ज़ाण्हिंआं तै इहै बणाऐं दै कि एक घरेट आसा दुजै घरेटा मांझ़ै। तिंयां घरेट तै एकी दुजे सिधा दी। 17तिन्नां घरेटा बी निं आजू-पिछ़ू, ओर्ही-पोर्ही हांढणा लै फेरअ दैणें ज़रुरत आथी ती। 18तिन्नां घरेटे बाघलै घेरै थिऐ बडै-बडै डरैऊंणै अर तेथ शुझुई मुखा फेर-फिरदी आछी लागी दी।#प्रका. 4:8; प्रका. 4:6 19ज़िधा लै बी तिंयां ज़ीब डेओआ तै, तिंयां घरेट ठुर्हा तै धरनीं तिन्नां संघै तिधी लै। ज़ांऊं तिंयां ज़ीब धरना का उझै उझ़िआ तै, तिंयां घरेट बी उझ़िआ तै उझै। 20ज़िधा लै बी तिन्नां ज़ीबो शाह करा थिअ, तिंयां बाहा तै तिधा लै डैअ अर तिंयां घरेट डेओआ तै तिन्नां संघै तिधी लै किल्हैकि तिन्नां ज़ीबो शाह त तिन्नां घरेटा दी। 21हर बारी तिंयां ज़ीब उझै ज़ेथ बाखा लै बी हांढा, तेखअ ज़ांऊं तिंयां खल़्हिया, तिंयां घरेट बी करा तै धरनीं तिहअ ई।
22तिन्नां ज़ीबा प्रैंदै ज़ाण्हिंआं त सरगा ज़िहअ छ़तर, तेता का थिअ हीरै ज़िहअ डरैऊंणै आल़अ च़लकार लागअ द।#प्रका. 4:6 23तिंयां ज़ीब तै तेऊ छ़तरा हेठै, तिन्नैं सोभी तै आपणैं दूई फैंख ओर्ही-पोर्ही फुआरी एकी दुजै संघै ज़ोल़ै दै अर आपणैं बाकी दूई फैंखा करै तै तिन्नैं आपणीं-आपणीं देही बुदरी डाही दी। 24ज़ेभै बी तिंयां ज़ीब ओर्ही-पोर्ही डैअ दैआ तै, तिन्नें फैंखा का शुण्हिंआं ती एही छ़ेल़ ज़िहअ समुंदर होए क्रुंगदअ लागअ द, ज़ेही बडी सैना एछणें छ़ेल़, एही छ़ेल़ ज़िहअ कि सह होए परमेशरो बोल ज़हा का सारअ बल आसा। ज़ेभै तिंयां खल़्हिया तै, तेभै झाल़ा तै तिंयां आपणैं फैंख पिछ़ू बाखा लै।#प्रका. 1:4-15; 19:6 25पर तज़ी बी शुण्हुंई मुखा तिन्नां प्रैंदै तेऊ सरगा ज़िहै छ़तरा का छ़ेल़।
26तेथ छ़तरा प्रैंदै शुझुअ मुखा राज़गाद्दी ज़िहअ आसन, सह आसा नीलमणीं किम्मती पात्थरा करै बणाअं द। तेऊ आसना प्रैंदै शुझुअ कुंण बेठअ द, भाल़णा लै थिअ सह ज़ात मणछा ज़िहअ।#एज. 10:1; प्रका. 1:13; 4:2,3 27सह ज़ाण्हिंआं त इहअ कि कुछी उझै मुंडै तैणीं आसा सह बान्नी लाऐ दै कांस्सै ज़िहअ। कुछी उंधै ज़ाण्हिंआं त सह ज़ल़दी आगी ज़िहअ। तेऊ का थिअ घुंढी उझै मुंडै तैणीं झ़ामण लागअ द।#एज. 8:2 28सह झ़ामण त इहअ ज़ेही भराल़ै पाणीं हणैं बाद फणैरी शुझिआ। तेखअ ज़ाणअ मंऐं कि अह आसा मुखा बिधातो झ़ामण लागअ द शुझदअ।
बिधाता काढअ एजकेल आपणअ गूर
ज़ांऊं मुखा इहअ शुझुअ, हुंह पल़अ तिधी धरनीं उटी बाखा, तेखअ शुण्हुंअ मुखा बोल कि मुंह संघै आसा कुंण गल्ला करदअ लागअ द।#एज. 3:23
Currently Selected:
एजकेल 1: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
