लुआह 6
6
1तेखअ बोलअ बिधाता मोसा लै, “ऐबै जाणअ ताखा शुझुई भाल़ै मंऐं मिसर देशे माहा राज़ै लै किज़ै लाअ करी। ज़ांऊं मुंह आपणीं शगती रहैऊंणीं तेखअ दैणअ तेऊ मेरै लोगा डेऊणैं, इधी तैणीं कि तेऊ काढणैं तिंयां ज़ोरा-ज़ोरी आपणैं देशा का बागै।
बिधाता बोलअ मुंह करनै तम्हैं गलामी का आज़ाद
2“हुंह आसा बिधाता, 3सह बिधाता#6:3 बिधाता इब्रानी बोली दी “एलशडाई” ज़हा का सारअ बल आसा, ज़ुंण आबराम, इसहाक अर याकबा लै प्रगट हुअ। पर तिन्नां का निं मंऐं मेरअ पबित्र नाअं बिधाता प्रगट किअ।#मूल. 17:1; 28:3; 35:11; लुआ. 3:13-14
4“ज़धू तिंयां कनान देशै परदेसी थिऐ रहंदै लागै दै, तधू किई ती मंऐं तिन्नां संघै करार। 5ऐबै हेरअ मंऐं भाल़ी कि मिसरी लोगै इज़राईली मणछ किहै हारी-मारी आसा लाऐ दै अर ऐबै फिरी मुंह सह करार आद।
6“ऐबै खोज़ इज़राईली का मेरअ इहअ समाद, ‘हुंह आसा बिधाता, ऐबै दैणीं मुंह आपणीं शगती करै मिसर देशे लोगा लै सज़ा, अर तम्हैं बच़ाऊंणै मुंह तिन्नें गलामी का।#शधा. 13:17
7“‘आजू हणैं ऐबै मेरै आपणैं लोग तम्हैं, हुंह बिधाता हणअ थारअ परमेशर। तेखअ जाणअ तम्हां का थोघ लागी कि सह आसा हुंह ज़ुंणी तम्हैं मिसर देशे लोगे गलामी का आज़ाद किऐ। 8मुंह पजैल़णैं तम्हैं तैहा ज़ैगा ज़ेते ज़बान मंऐं आबराम, इसहाक अर याकबा लै आसा दैनी दी अर तैहा ज़ैगे मालक हणैं तम्हैं। हुंह आसा बिधाता।’”
9ज़ांऊं मोसा ईंयां गल्ला इज़राईली का खोज़ी, तिन्नैं निं इना गल्लो विश्वास किअ किल्हैकि तिन्नैं त गलामीए दाह-दुखा करै ऐबै हैअ चोल़ी हेरअ द।
10तेखअ बोलअ बिधाता मोसा लै इहअ, 11“मिसर देशे माहा राज़ै सेटा डेऊई बोल, ‘इज़राईली दै एऊ देशा का डेऊणैं।’”
12पर मोसा लागअ बिधाता लै इहअ बोल्दअ, “मुंह निं गल्ला करनी एछदी, ज़ै इज़राईली मणछ ई निस्सै मेरी गल्ला शूणीं! तै माहा राज़ै किज़ू लाई मुंह हंकले गल्ला शूणीं?”
13तेखअ बोलअ बिधाता हारणा अर मोसा लै, “मिसर देशे माहा राज़ै अर इज़राईली का एछा मेरअ समाद खोज़ी, ‘हाम्हां लै किअ बिधाता इहअ हुकम कि इज़राईली मणछा आणा मिसर देशा का काढी।’”
मोसा अर हारणो खिंब
14मोसा अर हारणे दादा-बाबे टोलीए सैणैं आसा ईंयां: इज़राईले ज़ेठै शोहरू रूबेने थिऐ च़ार शोहरू हणोक, पालू, हिस्रोन अर कर्मीं।
15शमौने थिऐ छ़ह शोहरू यमूएल, ज़ामन, ओहाद, जाकीन, सोहार अर शाऊल ज़ुंण कनानी बेटल़ी का थिअ हुअ द।
16याकबो शोहरू लेबी रहअ एकी शौआ सैईंती साला ज़िऊंदअ, तेऊए थिऐ चअन शोहरू गर्शोन, कहात अर मरारी।#गण. 3:17-20; 26:57,58; 1 इति. 6:16-19
17गर्शोने तै दूई शोहरू लिब्नी अर शिमी।
18कहाते अमर हुई एकी शौआ तेत्ती साले, तेऊए थिऐ च़ार शोहरू अमराम, इसहार, हेब्रोन अर उज्जीएल।
19मरारीए थिऐ दूई शोहरू महली अर मूशी। ईंयां एतरै थिऐ लेबी टोली दी।
20अमराम ज़िऊअ एकी शौआ सैईंती साला तैणीं, तेऊ त आपणीं बुबी अकबेदा संघै बैह किअ द। तिन्नें हुऐ आजू मोसा अर हारण दूई शोहरू।
21इसहारे थिऐ चअन शोहरू कोराह, नपेग अर ज़िक्री।
22उज्जीएले थिऐ चअन शोहरू मिशेल, एलीसापान अर सितरी।
23हारणै किअ अमीनादाबे शोहरी इलीशिबा संघै बैह ज़ुंण नहशोने बैहण थिई, तिन्नें तै आजू च़ार शोहरू नादाब, अबीहू, एलीआजर अर ईतामार।
24कोराहे थिऐ चअन शोहरू आशीर, एलकाना अर एबीशाप।
25हारणे शोहरू एलीआजरै किअ पूतीएले शोहरी संघै बैह अर तिन्नों शोहरू थिअ पिनहास। ईंयां एतरै ज़ण्हैं थिऐ लेबी गोत्र अर टोलीए सैणैं।
26हारण अर मोसा आसा तिंयां ई ज़हा लै बिधाता इहअ हुकम किअ कि इज़राईले सोभी गोत्र अर टोलीए लोगा निंऊं मिसर देशा का बागै, 27मिसर देशे माहा राज़ै सेटा डेऊई बोलअ मोसा अर हारणै इहअ कि इज़राईली मणछा कर आज़ाद।
बिधाता छ़ाडै भिई मोसा अर हारण मिसर देशे माहा राज़ै सेटा लै
28बिधाता ज़धू मिसर देशै मोसा संघै गल्ला किई, तेऊ बोलअ इहअ, 29“हुंह आसा बिधाता, ज़िहअ हुंह बोला, तिन्नां गल्ला एछ मिसर देशे माहा राज़ै का बोली।”
30पर मोसा दैनअ बिधाता लै इहअ ज़बाब, “ताखा आसा थोघ भाल़ हुंह आसा हंकलअ, राज़ै किधी लाई मेरी गल्ला शूणीं।”
Currently Selected:
लुआह 6: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
