लुआह 25
25
पबित्र ज़ैगे बारै बधान
(लुआह 35:4-9)
1बिधाता बोलअ मोसा लै, 2सोभी इज़राईली का खोज़ इहअ कि तम्हैं आणै मुल्है भैंट। ज़ुंण मुल्है आपणैं दिला का च़ाहा भैंट दैणीं, तिन्नां का ढाकै तूह ज़रूर मुल्है भैंट।
3तूह ढाकै लोगा का सुन्नअ, च़ंदी, कांस्सअ, 4निलै, बैंज़णीं अर लाला रंगे च़ादरा, बाछे च़ादरा, शेली, 5लाला रांगा करै रांगी दी गाभूए खाला, बाकरे खाला#25:5 खाला इब्रानी दी समुंदरे गाऊईए खाला, पर असली दी निं एतो मतलब थोघै आथी , किक्करे काठ, 6सदीऐ ज़ाल़णा लै जैतूनो तेल, पबित्र ज़ैगे प्रतिष्ठा अर प्रोहतो अभिषेक करना लै तेल अर धूपा जैंदरी राल़णा लै खुशबूदार च़िज़ा।
7“माहा प्रोहते सदरी अर च़ौकी दी लाणा लै सुलैमानी किम्मती पात्थर अर मणीं।#25:7 सदरी बान्हां त माहा प्रोहत सोभी झिकल़ै बागै। च़ौकी हआ त एक खास नौ इंच़ च़कोर थैल्लू ज़ुंण सदरी बागै हआ त चघअ द, एथ भितरी हआ ती प्रशणा डाही दी ज़ेता लै ऊरीम-तूरीम बोला, तेता करै पाआ माहा प्रोहत बिधाता सेटा प्रशण। च़ौकी दी हआ तै बारा किम्मती पात्थर बी लाऐ दै। 8हुंह च़ाहा इहअ कि मुल्है बणाऐं एक पबित्र ज़ैगा ज़िधी हुंह मेरै आपणैं लोगा मांझ़ै रही सकूं।#लुआ. 28:6-14; 28:15-30
9“तेता बणाऐं ठीक तिहअ ई ज़िहअ-ज़िहअ मंऐं पबित्र खिम्भ अर तेते समान ऐबै ताखा रहैऊई लाऐ।
करारो मणशू
(लुआह 37:1-9)
10“किक्करे काठा करै बणाऐं एक मणशू, सह लोल़ी ढाई हाथ लाम्मअ, डेढ हाथ उछ़टअ अर डेढ हाथ बिरलअ बणअ। 11तेखअ महल़ै तेता बागा-भितरा का च़ोखै सुन्नैं करै अर मणशू प्रैंदै लाऐ च़ऊ बाखा सुन्नें काणस। 12सुन्नें च़ार कल़ोलै बणाईं लाऐ तिन्नां मणशूए च़ऊ पाऊआ दी। 13तेखअ बणाऐं किक्करे काठे दूई लोहल़ी अर तिन्नां बी महल़ै सुन्नैं करै। 14तिन्नां लोहल़ी पाऐ मणशू दी दुही बाखा लाऐ दै तिन्नां कल़ोलै दी, तेता करै हणअ सह मणशू कान्हा च़कणा लै। 15एकी बारी ज़ांऊं तिंयां लोहल़ी कल़ोलै दी लाई हेरी, तेखअ निं तिन्नां मणशू का पोर्ही काढी।
16“ज़ुंण शिला मुंह ताखा दैणीं, तेथ हणअ मेरअ बधान अर हुकम लिखअ द, तिन्नां डाहै तेऊ मणशू भितरी।
17“तेखअ बणाऐं तेऊ मणशू लै ढाई हाथ लाम्मअ अर डेढ हाथ बिरलअ ढक्कण#25:17 ढक्कण आसन, तेऊ बी महल़ै च़ोखै सुन्नैं करै।#इब्रा. 9:5
18-19“तेखअ बणाऐं सुन्नअ गल़ाऊई-ढल़ाऊई करै दूई फैंखा आल़ै करूब नाओंए स्वर्ग दूत, संघा लाऐ तिन्नां ओर्ही-पोर्ही ढक्कणे दोहरै मुंडै। 20तिन्नां करूबे फैंख बणाऐं मणशूए ढक्कणा प्रैंदै इहै कि तिन्नें फैंख लोल़ी मणशूए ढक्कणा प्रैंदै सारै दी फुआरुऐ दै हुऐ अर तिंयां करूब लोल़ी ढक्कणा बाखा स्मोहरै रहै। 21तेखअ तिंयां शिला ज़ेथ मंऐं हुकम आसा लिखै दै, तिंयां दैणीं मुंह ताखा, तिन्नां डाहै मणशू भितरी संघा लाऐ तेऊ ढक्कणा मणशू प्रैंदै। 22तेखअ करनअ मुंह तेऊ करारे मणशू प्रैंदै तिन्नां दूई करूबा जैंदरी एछी, संघा खोज़णअ ताखा मुंह सारअ बधान कि मेरै इज़राईली मणछा किज़ै करनअ अर किज़ै निं करनअ।
पबित्र रोटी लै पलग
23“तेखअ बणाऐं किक्करे काठा करै एक पलग, सह लोल़ी दूई हाथ लाम्मअ, एक हाथ बिरलअ अर डेढ हाथ उछ़टअ हुअ। 24-25तेखअ महल़ै तेऊ च़ोखै सुन्नैं करै संघा लाऐ तेथ च़ऊ बाखा सुन्नेंओ चकठ तेथ लाऐ च़ार आंगल़ बिरली सुन्नें काणस।
26-28“सुन्नें बणाऐं च़ार कल़ोलै बी, संघा लाऐ तिन्नां तेऊ पलगे च़ऊ पाऊआ दी झ़ालरा हेठै।
“तिन्नां कल़ोलै दी लाऐ किक्करे काठा करै बणाईं दी लोहल़ी अर तेता करै हणअ सह पलग कान्हा च़कणा लै।
29-30“तेऊ पलगा डाहै पबित्र ज़ैगा दी, तेखअ धैल़ ज़ुंण भोज़न छ़ाडणअ, तेता डाहै तेथ प्रैंदै।#लेब. 24:5-8
“डबरी, झ़ारी, धनैरअ, कल़छ़ै, प्रिहै बणाऐं च़ोखै सुन्नें।
सुन्नेंओ सदीअ
(लुआह 37:17-24)
31“एक बणाऐं च़ोखै सुन्नेंओ सदीअ। तेऊ सदीएओ पाअ, डैंढअ, फूल अर डोडी लोल़ी सुन्नें एकी ई फाल़ी गल़ाऊई-ढल़ाऊई करै कपींड बणे। 32प्रैंदा का लोल़ी तेथ दोहरी बाखा चअन-चअन डिंढी हुई लागी दी। 33सदीऐ दी लागी दी तिन्नां छ़हा डिंढी दी लोल़ी बदामे फूला ज़िहै चअन-चअन फूल तेते डोडी अर पाची संघी हुऐ। 34सदीए मांझ़लै डिंढै दी बणाऐं च़ार फूल तेते डोडी अर पाची संघी। 35मांझ़लै डिंढै, ज़िधा का तिंयां छ़ह डिंढी होए लागी दी, तिधी बी लोल़ी दूई-दूई डिंढीए गोधै एक-एक डोडी हुई लागी दी। 36सदीअ बणाऐं तेते डिंढी, फूल अर डोडी संघी च़ोखै सुन्नें एकी ई फाल़ी गल़ाऊई-ढल़ाऊई करै कपींड।
37“तेखअ ज़ाल़ै सदीऐ प्रैंदै सात दीऐ ताकि तेता करै सदीऐ आजू सम्हनै प्रैश्शअ होए।
38“दिऊए बाती काटणें कात अर सदीऐ हेठे थाल़ बी बणाऐं च़ोखै सुन्नें।
39“सदीअ लोल़ी तेते सोभी च़िज़ा संघी पैंईंती किलू च़ोखै सुन्नैं करै बणअ। 40पर ऐहा गल्ला डाहै धैन, तेता बणाऐं ठीक तिहअ ई ज़िहअ मंऐं ताखा इधी धारा प्रैंदै रहैऊअ।”#शधा. 7:44; इब्रा. 8:5
Currently Selected:
लुआह 25: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
