लुआह 16
16
बिधाता दैनअ इज़राईली लै सरगा का खाणां लै
1तेखअ लागी सारी इज़राईलीए सोभै टोली एलीम मुल्खा का आजू हांढदी। मिसर देशा का निखल़णें दुजै भिन्नें पंद्रुई धैल़ी पुजै तिंयां सीन नाओंए रेगीस्तानै ज़ुंण एलीम अर सीनाई नाओंए धारा मांझ़ा-मांझ़ी आसा।
2सीन रेगीस्तानै पुजी लागै इज़राईले टोली मांझ़ै कई मोसा अर हारणा लै इहै बखर्दै, 3“एता का हणअ त भलअ कि बिधाता हाम्हां मिसर देशै पांदअ मारी। तिधी धरनीं बेशी शिखा ता थिई खाणां लै अर रोटी ता थिई रज्ज़ी खाणां लै। पर तंऐं आणै हाम्हैं सोभै इधी रेगीस्तानै भुखै मरदै!”
4बिधाता बोलअ मोसा लै, “खाणां लै दैंऊं हुंह ऐबै तम्हां सोभी लै सरगा का पाणीं ज़िहअ बरशाऊई। तिन्नां लागणअ धैल़ आपणैं डेरै का बागै निखल़ी सिधअ तैहा धैल़ी जोगी खाणां लै कठा करनअ। इहअ करै जाणीं तिन्नें परख बी हई कि तिंयां मेरअ हुकम मना कि नांईं।”#जोह. 6:31
5“पर छ़हुई धैल़ी शुकरै उडै झाल़ै तम्हैं हर हबतै दुगणअ अर तेता डाहै पठी खाणां लै सटेऊई।”
6मोसा अर हारणै खोज़अ इज़राईली का, “आझ़ उडै लागणअ तम्हां का थोघ कि ज़ुंणी तम्हैं मिसर देशा का काढी आणै सह आसा बिधाता। 7दोत्ती शुझणअ तम्हां का बिधातो महान बला आल़अ धुप्पअ, किल्हैकि तम्हैं हेरै बिधाता शूणीं कि तम्हैं आसा तेऊ लै बखर्दै लागै दै! हाम्हैं किज़ै आसा? तम्हैं किल्है आसा हाम्हां लै बखर्दै लागै दै।”
8आजू बोलअ मोसा इहअ, “तम्हां का लागणअ थोघ कि बैल़ी लै सका बिधाता तम्हां लै शिखा अर क्लारी लै सका ज़ेतरी तम्हां खाणीं तेतरी रोटी दैई! असली दी आसा तम्हैं बिधाता लै बखर्दै लागै दै। हाम्हैं निं किछ़ै आथी, पर बिधाता हेरअ शूणीं कि तम्हैं आसा बखर्दै लागै दै।”
9मोसा फिरअ हारणा बाखा लै संघा बोलअ इहअ, “इज़राईली बोल सोभी टोला लै इहअ, ‘बिधाता सेटा करा झाल़अ, किल्हैकि तेऊ हेरै तम्हैं बखर्दै शूणीं।’”
10तेखअ हुअ इहअ कि हारण त इज़राईली टोली का इना गल्ला खोज़दअ लागअ द, ज़ांऊं सोभी रेगीस्ताना बाखा भाल़अ, तिन्नां का शुझुअ बिधाता का लागदअ द धुप्पअ बादल़ा दी।
11बिधाता बोलअ तेखअ मोसा लै, 12“मंऐं हेरअ शूणीं कि इज़राईली आसा बखर्दै लागै दै। ऐबै बोल इना लै इहअ, ‘बैल़ी दैणीं मुंह तम्हां लै कबल्ली शिखा अर क्लारी लै दैणीं ज़ेतरी तम्हैं खाई सका तेतरी रोटी।’ तेखअ लागणअ तिन्नां का थोघ कि हुंह आसा तिन्नों परमेशर बिधाता।”
13तेखअ हुअ इहअ कि समुंदरे बाढा का आऐ होछ़ै-होछ़ै च़ेल्लू इज़राईलीए खिम्भे डेरै फेर सारै दी, संघा बेठअ तिन्नों छ़ुंढ तिधी। दुजै धैल़ै भाल़ी तिन्नैं आपणैं खिम्भे डेरै फेर सारै दी ओश पल़ी दी। 14ज़ांऊं ओश शुक्की, तेखअ शुझुऐ तिन्नां का शुन्नैं रेगीस्तानै तेऊ मुल्खै तै सारै दी पाल़े शाका ज़िहै भींन शल़ेफल़ै पल़ै दै। 15एही च़ीज़ निं लोगै तधा का आजी कधि भाल़ी ती। सोभै इज़राईली लागै आप्पू मांझ़ै एकी-दुजै का पुछ़दै, “अह किज़ै च़ीज़ आसा?” #1 इति. 10:3
मोसा दैनअ तेखअ तिन्नां लै एतो ज़बाब, “अह आसा सह खाणें च़ीज़ ज़ुंण बिधाता तम्हां लै खाणां लै दैनी। 16बिधाता आसा इहअ हुकम किअ द कि एता झाल़ै सोभै तेतरअ ज़ेतरी तम्हां ज़रुरत आसा, मतलब एकी मणछे बांडै लोल़ी एक पाथअ आअ, तेखअ ज़सरै डेरै दी ज़ेतरै मणछ आसा एते साबै करै तिन्नां लै कठा।”
17ज़िहअ मोसा बोलअ, सोभी इज़राईली किअ तिहअ ई ज़सरै थोल़ै टबर थिऐ तिन्नैं झाल़अ थोल़अ अर खास्सै टबरा आल़ै झाल़अ खास्सअ। 18ज़ांऊं तिन्नैं सह खाण नापअ सह निखल़अ पूरअ। खास्सै टबरा आल़ै ज़ुंणी खास्सअ झाल़अ, तेऊ लै निं किछ़ खास्सअ निखल़अ अर थोल़ै टबरा आल़ै ज़ुंणी थोल़अ झाल़अ, तेऊ लै निं घट निखल़अ। किल्हैकि तिन्नैं झाल़अ त तेतरअ ई ज़ेतरी तिन्नां तैहा धैल़ी ज़रुरत थिई।#2 इति. 8:15
19मोसा बोलअ तेखअ तिन्नां लै, “एता का निं दोत्ता लै किछ़ै डाही।” 20तिन्नां मांझ़ै निं कई मोसे अह गल्ल मनी अर तिन्नैं डाहअ धख-धख खाण दोत्ती लै बच़ाऊई। ज़ांऊं तिन्नैं दुजै धैल़ै दोत्ती भाल़अ, तेथ तै किल़ै पल़ै दै अर शल़ैन्ह लागी दी। मोसा आई इहअ करनै पिछ़ू तिन्नां लै रोश्शै।
21दोत्ती-दोत्थी झाल़ा तै धैल़ इज़राईली आपणैं खाणैं जोगी अर बाकी ज़ुंण धरनीं बच़ा त सह खाण गल़ा त सुरज़े धुप्पै करै पठी।
22तेखअ हुअ इहअ कि हबते छ़ऊऐ धैल़ै झाल़अ सोभी ज़ण्हैं दुगणअ मतलब हर मणछे बांडै लोल़ी दूई लोहदी आई। सोभी टोलीए सैणैं खोज़अ एते बारै मोसा का।
23मोसा बोलअ तिन्नां लै, “अह किअ तम्हैं राम्बल़अ, बिधाता बोलअ त इहअ ई, ‘काल्ला आसा मेरी बशैघे पबित्र धैल़ी। तम्हैं सोभै करा खाणां लै कठा, तेखअ च़ाऐ तेता सिज़दै डाहा, च़ाऐ बुआल़ी डाहा, पर थारै लोल़ी खाणां लै काल्ला संघी बच़अ।’”#लुआ. 20:8-11
24ज़िहअ मोसा बोलअ, सोभी इज़राईली डाहअ खाणां लै दुजै धैल़ै तैणीं बच़ाऊई, एभकी बारी नां तेथ शल़ैन्ह लागी अर नां किल़ै पल़ै।
25दुजै धैल़ै बोलअ मोसा सोभी इज़राईली लै, “ज़ुंण खाण थारै हिझ़ा का आसा रहअ द, आझ़ खाऐ तेता ई, आझ़ आसा बिधाता लै बशैघ अर आझ़ निं तम्हां झाल़णां लै किछ़ै भेटणअ। 26हबतै दी छ़हा धैल़ी लागै तम्हैं खाणां लै धैल़ झाल़दै, पर सातुऐ धैल़ै आसा बशैघ तेभै निं तम्हां किछ़ै भेटणअ।”
27तज़ी बी डेऊऐ कई लोग सातुऐ धैल़ै लोल़ै पर तिन्नां निं किछ़ भेटअ।
28तेखअ बोलअ बिधाता मोसा लै, “तम्हां मणछा केभै तैणीं निं मेरै हुकम अर बधाना दी धैन दैणअ? 29आद करा, सह आसा हुंह बिधाता ज़ुंणी तम्हां लै बशैघे धैल़ी दैनी, तैही करा हुंह छ़ऊऐ धैल़ै कबल्लअ एतरअ खाण दैई कि सह थारै दुही धैल़ै लै होए। बशैघे धैल़ी ज़ुंण ज़िधी आसा सह रहै तिधी, आपणैं घअरा का बागै निं डेऊई।”
30तधा बाद किअ सोभी लोगै सातुऐ धैल़ै बशैघ। 31इज़राईली डाहअ तैहा खाणें च़िज़ा नाअं खाण#16:31 खाण मतलब खाणें च़ीज़, पर एता नाअं किज़ै आसा, सह निं थोघै। अह त भुगल़े दाणैं ज़िहअ अर मखीरा करै ल्हुशै दै पातल़ै बाबरू ज़िहअ।#गण. 11:7-8
32तेखअ बोलअ मोसा इज़राईली लै, “बिधाता किअ इहअ हुकम, ‘एक पाथअ#16:32 पाथअ इब्रानी दी “ओमेर” एक होछ़अ पाथअ हआ डेढ किलू, अर बडअ पाथअ हआ दूई किलू भर खाण डाहा आगली पोस्ती लै डाही, किल्हैकि हुंह च़ाहा इहअ कि पोस्ती दर पोस्ती लोल़ी थारी आद-लुआदा का बी थोघ लागअ कि मिसर देशा का काढी उज़र रेगीस्तानै मंऐं तम्हां का किहअ खाण खैऊअ त।’”
33तेखअ बोलअ मोसा हारणा लै, “एकी भांडै दी भर एक पाथअ भर खाण, संघा डाह तेऊ पबित्र ज़ैगा बिधाता सम्हनै आगली पोस्ती लै।” 34ज़िहअ बिधाता मोसा का हुकम किअ त, हारणै किअ तिहअ ई, अर तेऊ डाहअ एक पाथअ खाण करारे#16:34 करारे अह आसा बिधाते तैहा गल्लो मणशू ज़ेथ तिंयां गल्ला आसा डाही दी ज़ेथ बिधाते करार आसा। मणशू सेटा डाही।#मूल. 25:10-12
35-36कनान देशे सिऊंआं पुजी बस्सणै का आजी रहै इज़राईली मणछ च़ाल़्ही साला तैणीं तेऊ खाण खांदै लागी। दसा बडै पाथैओ हआ त आधअ मण#16:35-36 आधअ मण इब्रानी बोली दी “एपा।” आधअ मण हआ बिह किलू।#ज़ैह. 5:12
Currently Selected:
लुआह 16: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
