ज्ञैन 3
3
हर गल्लो हआ बगत
1एऊ संसारै आसा हर गल्लो बगत अर आपणीं ऋत।
2हणैंओ बगत अर मरनैओ बी बगत,
बऊंणैंओ बगत अर लऊंणेओ बी बगत,
3मारनैओ बगत अर तारनेओ बगत,
ढोल़ी पाणैओ बगत अर भिई च़िणीं डाहणेंओ बी बगत,
4लेरनैओ बगत अर हास्सणैंओ बी बगत,
शोग करनैओ बगत अर खुशी मनाऊंणेओ बी आसा बगत,
5पात्थरा छिंगणेंओ बी बगत अर पात्थरा झाल़णैंओ बी बगत,
मल़्हैची दैणैंओ बगत अर दूर हणैंओ बी आसा बगत,
6शोठणैंओ बगत अर तेता भेटणेंओ बी बगत,
हाल़्है डाहणेंओ बगत अर पोर्ही दैणैंओ बगत,
7धेल़्हणेंओ बगत अर सिऊंणेओ बगत,
च़ुप्पी रहणैंओ बगत अर गल्ला करनैओ बी हआ बगत,
8एक बगत हआ ज़ीद डाहणेंओ अर एक बगत झ़ूरनैओ,
झ़गल़ैओ बी हआ बगत अर मेल़-ज़ोल़ करनैओ बी हआ बगत।
बिधाता किज़ै बोला करना लै
9ज़ुंण मणछ भांती-भांतीए काम करी खास्सी मैन्थ करा, तिन्नां तेता करै किज़ै पुआज़अ भेटा? ज़ाथी निं किछ़! 10मुखा शुझुअ इहअ कि बिधाता भाल़ मणछे पिठी किहअ गर्कअ भर्टू आसा दैनअ द। 11तेऊ आसा सोभी गल्ला लै बगत डाहअ द। तज़ी बी निं हाम्हां मांझ़ै कोहै तेऊए सोभी कामां कधि समझ़ी सकदै, सह पाआ मणछे मन्नैं पिछ़ू हुई-बिति दी गल्ला अर आजू हणैं आल़ी गल्ले बारै सोठ। 12मुखा ज़ाण्हुंअ इहअ कि मणछा लै निं भलाई करी राज्ज़ी-मौज़ी ज़िन्दगी ज़िऊंणै का सुआई किछ़ै राम्बल़अ आथी, 13मुखा इहअ बी ज़ाण्हुंअ कि सोभी लागा खाई-पिई अर आपणैं कामां दी राज्ज़ी-मौज़ी नंद रहणअ, ईंयां ई आसा तिंयां च़िज़ा ज़ुंण परमेशर हाम्हां मणछा लै दैआ।
14मुखा आसा थोघ कि परमेशर किअ द काम हआ अटल़, तेता का नां कुंण किज़ै चोल़ी सकदअ अर नां तेथ कुंण ज़ोल़ी सकदअ। बिधाता करा इहअ एते तैणीं कि हाम्हां तेऊए डअर रहे।
15ज़ुंण एभै आसा हंदअ लागअ द
अर ज़ुंण आजू आसा हणैं आल़अ,
सह आसा आझ़ा का पैहलै बी हई मुक्कअ द।
परमेशर रहा एकी गल्ला धराऊंदअ लागी।
आजू कै हणअ तेतो निं कोही का थोघै
16होर ज़ाण्हिंआं मुखा इहअ कि संसारै ज़िधी भलाई अर नसाफ लोल़ी त हुअ, तेते ज़ैगा हआ कदुष्ट काम ई। 17हुंह लागअ इहअ सोठदअ, “बिधाता करनअ धर्मीं अर कदुष्ट दुहीओ नसाफ, किल्हैकि हर गल्ला अर हर काम हणैं आपणैं-आपणैं बगतै।” 18तेखअ सोठअ मंऐं आपणैं दिलै इहअ, “बिधाता आसा हाम्हां ऐहा गल्ला रहैऊंणा लै परखदअ लागअ द कि मणछ आसा पशू ई ज़िहै।” 19किल्हैकि मणछे दशा बी हआ पशू ई ज़ेही, मणछ बी मरा अर पशू बी मरा। तिंयां आसा दुहै एकी रंगे ज़ीब अर शाह बी हआ दुही एक्कै ज़िहअ! मणछ निं पशू का बढकर आथी, ईंयां आसा सोभै गल्ला बृथा ई। 20सोभै ज़िऊंदै ज़ीब डेओआ एकी ई ज़ैगा माट्टै जैंदरी, तिंयां आसा तेता ई का बणाऐं दै अर तिंयां दुहै डेऊणैं तेता ई लै फिरी! 21ऐहा गल्ला कुंण सका खोज़ी कि मरी करै मणछो शाह डेऊअ परमेशरा बाखा उझै सुरगा लै अर पशूओ शाह डेओआ उंधै पैईताल़ा लै? 22मुखा ज़ाण्हिंआं इहअ कि सोभी का राम्बल़ी गल्ल आसा मणछा लै एही कि हाम्हां लागा आपणैं कामां लै मगन रहणअ, तेता का सुआई निं हाम्हैं होर किछ़ै करी सकदै। ऐहा गल्लो थोघ निं किछ़ू गल्ला करै लागी सकदअ कि हाम्हां मरनै बाद आजू किज़ै हणअ।
Currently Selected:
ज्ञैन 3: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
