बधान 9
9
ज़िहअ करै बिधाता थारी मज़त करनी
1“इज़राईलीओ, मेरी गल्ला शूणां! ऐबै आसा तम्हैं जरदण नदी टपी पार तिन्नां मणछा तेऊ देशा का काढदै च़ाल्लै दै डेऊई ज़ुंण तेथ आसा बस्सै दै। तिंयां आसा तम्हां का खास्सै अर बलबान। तिन्नें नगरी फेर आसा धारा ज़िहै उछ़टै-उछ़टै गहल़ च़िणैं दै। 2तेऊ देशै आसा अनाक#9:2 अनाक ईंयां थिऐ रपाई ज़िहै दैंत्तर मर्ध, अनाके आजू आद-लुआद खिंबे मणछ बी, तम्हां का आसा थोघ कि तिंयां किहै लाम्मै अर ज़ोरा आल़ै आसा, तिन्नें बारै आसा तम्हैं शूणअ द कि तिन्नां का निं कोहै ज़िती सकदअ। 3पर आझ़ जाणअ तम्हां का आप्पै थोघ लागी कि थारअ परमेशर बिधाता आसा आप्पै तम्हां का आजू प्लुशदी आगी ज़िहअ। तेऊ हेरनै तम्हां पुजणैं का आजी तिंयां हारी, तेखअ हणैं तम्हां लै तिंयां तैहा ज़ैगा का पोर्ही काढणैं सान अर तेखअ निं तम्हां तिन्नां खतम करना लै किछ़ै बल़ैग हणीं। ज़िहअ बिधाता तम्हां लै बोली आसा डाहअ द।
4-6“ज़ांऊं बिधाता तिन्नां ज़ाती तम्हां करै पठी खतम करी हेरे अर तिन्नों सारअ देश गिम्मी तैहा ज़ैगे मालक तम्हैं बणी जाए, एता लै निं तम्हैं इहअ समझ़ी कि तम्हैं आसा आप्पू बडै भलै मणछ अर तैही किअ बिधाता तम्हां लै एतरअ। तम्हैं निं भलै आथी, नां तम्हैं धर्मीं आथी! तम्हैं आसा द्रोही, पर बिधाता लाई थारी मज़त तज़ी बी करी किल्हैकि तेऊ देशै बस्सी दी तिंयां ज़ाती आसा कदुष्ट हुई दी। दुजी गल्ल आसा एही कि बिधाता च़ाहा आपणीं तैहा करारा पूरी करनअ ज़ेते तेऊ थारै दाद-बाब आबराम, इसहाक अर याकबा लै ज़बान आसा दैनी दी।
7“ऐहा गल्ला निं तम्हैं बिस्सरी कि उज़र रेगीस्तानै तम्हैं किहै ज़िधूऐ तै बिधाता लै अर बिधाता हुअ त रोश्शै तम्हां का नराज़। ज़हा धैल़ी तम्हैं मिसर देशा का निखल़ै, तैहा धैल़ी ओर्ही इधी पुजणैं तैणीं रहै तम्हैं बिधाता लै द्रोह करदै लागी।
8“होरेब धारा नेल़ आणी ती तम्हैं बिधाता लै एतरी रोश्शै कि तेऊ लाऐ तै तम्हैं पठी खतम करी। 9-11ईंयां गल्ला हुई ती तधू, ज़धू हुंह च़ाल़्ही धैल़ी अर च़ाल़्ही राची भुखअ-नचिशअ सीनाई धारा प्रैंदै थिअ। बिधाता शादअ हुंह आप्पै उझै धारा लै ताकि सह तैहा करारा मुखा दैए, ज़ुंण तेऊ हाम्हां संघै आसा किई दी। ऐहा करारा दी थिऐ तिंयां ई दस हुकम ज़ुंण तेऊ तधू तम्हां संघै सीनाई धारा प्रैंदै आगी मांझ़ा का गल्ला करदी बोलै तै। बिधाता लिखै तिंयां दस हुकम पात्थरे दूई शिला दी आपणैं हाथा करै। पर ज़ांऊं बिधाता दस हुकम लिखी तिंयां दूई शिला मेरै हाथै दैनी,#लुआ. 24:18 12तेऊ बोलअ मुल्है इहअ, ‘मोसा, तूह होथ छ़ेक्कै धारा का उंधै, संघा डेऊ तिन्नां लोग सेटा लै ज़ुंण तंऐं मिसर देशा का इधी पजैल़ै। ज़ुंण हुकम मंऐं तिन्नां लै किअ त, तिंयां गऐ तेता का कबाता पेशी। तिन्नैं किअ मुहुर्ती बणाईं करै घोर पाप!
13“‘हुंह आसा इज़राईली भाल़अ लागअ द, मुखा शुझिआ इहअ कि ईंयां आसा खास्सै हठू अर नर्दैई मणछ। 14ऐबै निं तूह मुंह रोक्कदअ लागी! ईंयां लाऐ मंऐं ऐबै पठी खतम करी अर इनो निं धरती दी नाअं-नशाण बी रहणअ कि इहै मणछ बी थिऐ कधू। तेखअ बणाणअं मुंह तेरी आद-लुआदा का इना इज़राईली का बी खास्सअ बलबान देश।’
15“ज़ांऊं हुंह सीनाई धारा का उंधै त होथदअ लागअ द, धारा प्रैंदै ती खास्सी आग भकी दी अर मेरै हाथै ती बिधाते दस हुकम लिखी दी करारे तिंयां दूई पात्थरे शिला। 16मंऐं बी भाल़अ कि तम्हैं मुक्कै आपणैं परमेशर बिधातो हुकम बिस्सरी घोर पाप करी। तम्हैं तै तिधी बाछ़ू ज़ेही शक्ले सुन्नें मुहुर्ती बणाईं तेते पूज़ा करदै लागै दै। 17तेखअ शोटी मंऐं रोश्शै तिंयां दूई शिला आपणैं दोहरै हाथा का तम्हां नदरी ज़ोरै धरनीं अर तेते हुऐ फुटी करै ठोर-ठोर।
18-20“तेखअ टेक्कअ मंऐं उटअ पल़ी बिधाता सेटा माथअ। संघा किई बिधाता सेटा च़ाल़्ही धैल़ी-राची भुखअ-नचिशअ रही प्राथणां। किल्हैकि तम्हैं किअ त तैहा मुहुर्ती बणाईं घोर पाप अर बिधाता हुई तेता पिछ़ू तम्हां लै नफरत। तेऊ ती तम्हां लै एतरी रोश्शै आई दी कि तम्हैं लाऐ तै तेऊ पठी खतम करी अर हारण बी लाअ त बिधाता मारी पाई। तेखअ किई मंऐं तम्हां सोभी अर हारणा बच़ाऊंणा लै बिधाता का खास्सी अरज़, ज़िहअ हुंह पैहलै बी करदी आअ त अर तधू बी शूणीं बिधाता मेरी अरज़।#इब्रा. 12:21
21“अह पाप किअ त तधू तम्हैं तैहा बाछ़ू ज़ेही शक्ले मुहुर्ती बणाईं करै अर मंऐं किई तेखअ सह मुहुर्ती आगी जैंदरी दहई पठी खतम। तेखअ किअ मंऐं तैहा मुहुर्तीओ सुन्नअ पिशी करै छ़ारा ज़िहअ भींन संघा शोटअ सह छ़ार तैहा धारा का बगदी गाडा।
22“तबेरा, मस्सा अर किब्रोतहत्ताबा नाओंए ज़ैगा बी ठैऊई तम्हैं बिधाता लै रोश्शै, तम्हैं तै तिधी बिधाता पटंकदै लागै दै।#लुआ. 17:7; गण. 11:3,34 23तेखअ ज़ांऊं कादेश-बर्ना बिधाता तम्हां लै इहअ बोलअ त, ‘ज़ुंण ज़ैगा मुंह तम्हां लै दैणीं, तम्हैं डेओआ तिधा लै, संघा गिम्मा तैहा ज़ैगा आप्पू लै!’ तधू बी किअ तम्हैं बिधाता लै द्रोह, नां तम्हैं तेऊओ विश्वास किअ अर नां तम्हैं तिहअ किअ ज़िहअ तेऊ तम्हां लै हुकम किअ त।#गण. 17:13; बधा. 1:21,26; इब्रा. 3:16 24मंऐं ता भाल़अ इहअ कि ज़धा ओर्ही हुंह तम्हां ज़ाणा#9:24 हुंह तम्हां ज़ाणा च़ाल़्ही साला का बी आजी ओर्ही ज़धू मोसा इज़राईली मिसर देशा का आणै काढी।, तधा ओर्ही आझ़ तैणीं आऐ तम्हैं बिधाता लै द्रोह करदी।
25“थारी तैहा बाछ़ू ज़ेही शक्ले मुहुर्ती बणाणैं का बाद हेरअ त बिधाता इहअ बोली कि तम्हैं लाऐ तेऊ पठी खतम करी। तेखअ रहअ हुंह थारी तैणीं बिधाता सेटा उटी बाखा माथअ टेक्की च़ाल़्ही धैल़ी-राची भुखअ-नचिशअ पल़ी।
26“संघा किई मंऐं बिधाता का एही अरज़, ‘म्हारै मालक बिधाता, ज़ीबाण, इना लोगा निं मारी आथी, ईंयां आसा तेरै आपणैं। तंऐं आणै ईंयां आपणैं महान बला करै मिसर देशा का बच़ाऊई संघा बणाऐं ईंयां तंऐं आपणीं खास परज़ा। 27इना इज़राईलीए दाद-बाब आबराम, इसहाक अर याकब रहै तेरै हुकम मनणा लै शुचै-पाक्कै। तूह सोठ तिन्नें बारै, इना इज़राईलीए हठ, कदुष्ट काम अर पापा निं भाल़ै आथी। 28ज़ै तूह इना लोगा पठी खतम करे, मिसरी लोग सका तेखअ इहअ बोली, “इज़राईलीए परमेशर बिधाता तिन्नां लै ज़हा देशे ज़ैगा दैणें ज़बान दैनी ती, तेऊ निं सह पूरी किई, नां सह करी सकदअ त। किल्हैकि सह करा तिन्नां का एही नफरत कि तेऊ निंयैं तिंयां उज़र रेगीस्तानै संघा पाऐ तिंयां मारी!” 29पर तूह आसा म्हारअ परमेशर बिधाता अर तंऐं आसा इज़राईली आपणैं महान बला करै मिसर देशा का बच़ाऊई आणै दै ताकि तिंयां तेरी आपणीं खास परज़ा होए।’”
Currently Selected:
बधान 9: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
