बधान 4
4
इज़राईली करै तिहअ ई ज़िहअ बिधाता च़ाहा
1मोसा बोलअ इज़राईली लै इहअ, “इज़राईलीओ, ज़ुंण बधान अर बिधी ऐबै मंऐं तम्हां का खोज़ी लाऐ, तिन्नां शूणां धैन दैई। ज़ै तम्हैं तिहअ ई करे, तै रहणैं तम्हैं ज़िऊंदै अर तम्हैं जाणै तैहा ज़ैगे मालक बणी ज़ुंण बिधाता तम्हां लै आसा लाई दी दैई। अह आसा सह ई बिधाता ज़सरी च़ाकरी म्हारै दाद-बाब करा तै, 2ऐबै आसा सह बिधाता थारअ। मंऐं लाई तिंयां सोभै गल्ला तेही ई खोज़ी ज़िहअ तेऊ मुल्है हुकम किअ, तिन्नां गल्ला दी नां हुंह किज़ै आप्पू बाखा ज़ोल़दअ, नां तेता मांझ़ै किज़ै छ़ाडदअ।#प्रका. 22:18,19
3“तम्हां का आसा ऐहा गल्लो राम्बल़ै करै थोघ कि बिधाता किहै पाऐ तै तिंयां सोभै मारी ज़ुंण बाल-पोर नाओंए देअआ पूज़दै डेऊऐ तै।#गण. 25:1-9 4पर तम्हैं सोभै आसा एतरै आझ़ ज़िऊंदै किल्हैकि तम्हैं रहै बिधाता लै शुचै-पाक्कै।
5-8“इहअ देश निं होर कोहै आथी ज़हा का इहअ महान धर्मीं बधान अर बिधी होए, ज़ुंण बिधाता मुल्है तम्हां का खोज़णा लै बोलअ। ज़हा देशा गिम्मी तम्हैं तेते मालक बणें, तैहा ज़ैगा मनै तम्हैं इना बधाना अर बिधी। बधान अर बिधी मनणा लै रहै शुचै-पाक्कै, ताकि होरी देशे लोगा का बी थोघ लागे कि तम्हां केतरी सुंबल़ी बुध आसा। एऊ बधान अर इना बिधी शूणीं बोल़णअ तिन्नां मणछा बी इहअ, ‘एऊ देशे लोगा भाल़ केही समझ़-बुध आसा!’
“अह ई गल्ल बणाआं हाम्हां होरी देशे लोगा का खास कि हाम्हां संघै आसा सह परमेशर बिधाता ज़ुंण हाम्हां संघै रहा अर ज़िधी बी हाम्हैं तेऊ का बोला, सह करा म्हारी मज़त।
9“तम्हैं डाहै ऐहा गल्लो धैन हेरे, तम्हैं निं सारी अमरा तिन्नां गल्ला बिस्सरुई ज़ुंण तम्हैं आपणीं आछी भाल़ी कि बिधाता तम्हां लै किज़ै किअ। आप्पू बी डाहै तम्हैं इना गल्ला आद अर आजू आपणैं शोहरू-माठै अर पोचै का बी डाहै इना खोज़ी। 10खासकर डाहै तैहा गल्ला आद ज़धू तम्हैं होरेब धारा गोधै बिधाता सम्हनै थिऐ खल़ै, तधू बोलअ त बिधाता मुल्है इहअ, ‘मोसा, सोभी इज़राईलीओ कर इधी मुंह सेटा झाल़अ। मंऐं लाई तिन्नां का गल्ला खोज़ी ताकि तिंयां सारी अमरा ज़िहअ हुंह बोला तिहअ ई करे अर तिंयां आपणैं शोहरू-माठै लै बी एही ई शिक्षा दैए।’
11“तधू घोर्हुऐ तै सीनाई धारा फेर काल़ै घणैं बादल़ अर धारा प्रैंदै ती एही आग भकी दी कि तेते लुपल़ै तै उझै सरगै तैणीं लागै दै पूज़दै। थारअ त धारा गोधै झाल़अ हुअ द,#लुआ. 19:16-18; इब्रा. 12:18,19 12संघा किई तधू बिधाता तैहा आगी मांझ़ा का तम्हां संघै गल्ला। तम्हां का थिई आगी मांझ़ा का बिधाते गल्ला शुण्हदी लागी दी अर तम्हैं तिंयां फैल़ी बी हेरी कि बिधाता तम्हां लै किज़ै बोलअ, पर तेऊओ रूप निं तम्हैं आपणीं आछी भाल़अ।
13“बिधाता खोज़अ तम्हां का तधू इहअ कि तेऊ लाई तम्हां संघै करार करी अर इहअ बी खोज़अ तधू कि ऐहा करारा दी तम्हां बाखा करनैओ काम आसा दस हुकम मनणै। तेखअ लिखै बिधाता तिंयां दस हुकम दूई पात्थरे शिला दी।#लुआ. 31:18; 34:28; बधा. 9:10
14“बिधाता किअ मुल्है तधू ई इहअ हुकम कि इना बधाना अर बिधी खोज़ तम्हां का, ताकि तम्हैं इना तेऊ देशै बी मने, ज़हा ज़ैगा कबज़अ करी तम्हैं मालक आसा बणनैं आल़ै।#लुआ. 21:11
मुहुर्ती निं पूज़ी
15“ज़धू होरेब धारा बिधाता तम्हां संघै आगी मांझ़ा का गल्ला किई, तम्हैं निं तधू बिधातो रूप भाल़अ कि सह किहअ आसा। तैही डाहै हेरे तम्हैं आपणअ धैन, 16-18तम्हैं निं मुहुर्तीए पूज़ा करी पाप करी। नां पूज़णा लै कोई मुहुर्ती बणाईं आथी, च़ाऐ मर्धा ज़ेही शक्ले मुहुर्ती होए या कहा बेटल़ी ज़ेही शक्ले, च़ाऐ सह कहा पशूए, च़ेल्लूए या कहा धरती दी कहा रिंगणै आल़ै होरी ज़ीबे या समुंदरे म्हाछ़लीए।#लुआ. 20:4; लेब. 26:1; बधा. 5:8; 27:15; रोम. 1:23
19“ज़ेभै तम्हैं सरगा बाखा भाल़ी सुरज़, ज़ोथ या तारै भाल़े, तम्हैं निं तिन्नां लै माथअ टेक्की। तिंयां आसा बिधाता धरतीए सोभी लोगा लै डाहै दै। 20मिसर देश थिअ तेऊ भैठै ज़िहअ ज़ेथ लोहै गाल़ा,#4:20 ज़ेथ लोहै गाल़ा, मिसर देशे थिऐ इहै बूरै हाल हुऐ दै ज़िहअ भैठै दी लोहअ लाल हआ। बिधाता आसा तम्हैं तेता का काढी आणै दै, ताकि तम्हैं तेऊए आपणीं खास परज़ा होए।#लुआ. 19:5; बधा. 7:6; 14:2; 26:18; तित. 2:14; 1 पत. 2:9
21“पर तम्हां पिछ़ू हुअ बिधाता मुखा बी नराज़ अर तेऊ बोलअ रोश्शै इहअ, ‘हुंह निं ताह ऐबै जरदण नदी पार तेऊ रज़दै-पज़दै देशा लै डेऊणैं दैंदअ ज़ुंण इज़राईले परमेशर मुंह बिधाता तम्हां लै दैणअ।’#लुआ. 20:12 22मुंह ता हुअ ऐबै जरदण नदी आर बाखा रही मरनअ, किल्हैकि हुंह निं ऐहा नदी पार टपी डेऊई सकदअ, पर तम्हैं डेओआ पार टपी तेऊ रज़दै-पज़दै देशा लै संघा बणा तेऊ देशे मालक।
23“तम्हैं डाहै हेरे तैहा करारा आद ज़ुंण बिधाता तम्हां संघै आसा किई दी अर तम्हैं निं किछ़ी गल्ले मुहुर्ती बणाऊंदै लागी ज़ेता लै बिधाता तम्हां लै नांह आसा किई दी। 24किल्हैकि ज़ै तम्हैं इहअ करे, परमेशर बिधाता हणअ तम्हां का नराज़, सह हणअ हेरे तेखअ एही आगी ज़िहअ ज़ुंण सोभै गल्ला खतम करा।#इब्रा. 12:19
25-26“तम्हैं आसा ऐबै जरदण नदी पार डेऊई तैहा ज़ैगा बस्सी च़ाल्लै दै। तिधी खास्सी साला रहंदी हणैं थारै होर शोहरू-माठै, पोचै-पल़पोचै। हई सका कि खास्सी साला बाद थारी आगली पोस्ती दी लोग इना गल्ला बिस्सरी पाए अर मुहुर्ती बणाऊंदै लागे अर तेता करै होए बिधाता तम्हां का नराज़! एता लै दैआ हुंह तम्हां लै आझ़ चतैनगी अर सरग अर धरती आसा ऐहा गल्ले शाजत। ज़ै तम्हैं केभै बी मुहुर्ती बणांए, बिधाता हणअ तम्हां का नराज़ अर एता लै उझ़णीं बिधाता तम्हां लै रोश्शै। तम्हैं मरनै तेखअ छ़ेक्कै किल्हैकि बिधाता छ़ाडणैं तम्हैं सोभै पठी मरदै। 27बिधाता दैणअ तम्हां होरी लोगे देशै छिंघणैं अर ज़हा देशै तम्हैं बिधाता पजैल़णैं तेथ हणैं तम्हैं धख ज़िहै ज़ुंण ज़िऊंदै रहणैं।#बधा. 28:36 28तेथ हणैं तम्हैं तेखअ मणछै आपणैं हाथै बणाऐं दै काठा-पात्थरे देअआ-देबीए पूज़ा करदै ज़ुंण नां भाल़ी सकदै, नां शूणीं सकदै, नां खाई सकदै अर नां शिंघी सकदै।
29-30“पर इना सोभी आफ़ता मांझ़ै बी ज़ै तम्हैं आपणैं परमेशर बिधाते लोल़-तोप करे अर तेऊ बाखा फिरी तेऊओ सारअ बधान मने, तेखअ जाणअ भिई थारअ बिधाता संघै मेल़-ज़ोल़ हई।#जेर. 29:13 31किल्हैकि थारअ परमेशर बिधाता आसा झणैल़ू, सह नां ता तम्हां छ़ाडदअ अर नां बरैबाद दैंदअ हणैं। बिधाता ज़ुंण करार थारै दादा-बाबा संघै आसा किई दी, तेता निं सह कधि बिस्सरदअ आथी।
32-34“ज़धू बिधाता तम्हैं मिसर देशा का आणै, तम्हैं भाल़अ आपणीं आछी कि तेऊ तम्हां पिछ़ू किहअ जुध किअ अर तेऊ किहै किऐ आपणअ महान बल रहैऊई बडै-बडै च़मत्कार। तम्हैं बणाऐं तेऊ आपणीं खास परज़ा अर सीनाई धारा गोधै शूणअ तम्हैं आपणैं कानै कि बिधाता आसा तम्हां संघै खास्सै बडै ज़ल़दै आगीए कूंडा मांझ़ा का गल्ला करदअ लागअ द। तम्हैं आसा तज़ी बी तधा ओर्ही आझ़ तैणीं ज़िऊंदै! ज़धा ओर्ही बिधाता मणछ बणाऐं, तधा ओर्ही आझ़ तैणीं निं एतरी बडी गल्ल कधि शुणना लै भेटी। तम्हैं च़ाऐ सारी धरती दी ज़िधी बी पुछ़े, तम्हां भेटणअ इहअ ई ज़बाब कि इहअ निं कधू हुअ ई आथी। कोही निं आझ़ तैणीं इहअ शूणअ कि कुंणी देअ-देबी आपणैं लोगा लै इहै महान काम किऐ होए ज़ुंण थारै परमेशर बिधाता तम्हां लै किऐ!
35-36“बिधाता च़ाहा तम्हां का ऐहा गल्ला प्रगट करनअ कि सह ई आसा असली परमेशर अर तम्हैं तेऊओ हुकम मने। तैही रहैऊऐ तेऊ तम्हां का आपणैं महान च़मत्कार अर धरती लै प्रल़या करनै आल़ी आग अर तम्हैं शूणैं तैहा आगी बाती सरगा का बिधाते बैण।#मार्क. 12:32
37“बिधाता थिअ थारै दादा-बाबा लै झणैल़ू अर तेऊ किअ तम्हां लै आपणीं खास परज़ा बणाणेंओ बच़ार। तैही आणै बिधाता तम्हैं आपणैं महान बला करै मिसर देशा का काढी। 38ऐबै आसा थारअ मकाबलअ आप्पू का खास्सै बलबान देशा संघै, पर बिधाता आसा गअ द आप्पै तिन्नां तेऊ देशा का पोर्ही काढदअ लागी ताकि तम्हां तेऊ देशो मालक बणाईं सके। ज़िहअ आझ़काला हाम्हां का शुझदअ आसा लागअ द।
39“तैही बोला हुंह तम्हां लै, ऐहा गल्ला डाहै सदा आद उझै सरगै अर उंधै धरती दी आसा एक्कै बिधाता ई अर सह ई आसा असली परमेशर। 40आझ़ खोज़णैं मुंह तेऊए बधान अर बिधी बाढै। ज़ै तम्हैं सदा तेता ई मने, तै रहणैं तम्हैं अर थारी आजू आद-लुआद खास्सी अमरा ज़िऊंदै अर तम्हैं हणैं तैहा ज़ैगा सफल ज़ुंण ज़ैगा बिधाता तम्हां लै दैणीं।”
जरदण नदी पुर्बा बाखा शरण नगरी
41-43 #
जेर. 20:8,9 मोसा बोलअ इहअ, “इज़राईलीओ, जरदण नदी पुर्बा बाखा डाहै तम्हैं चअन शरण नगरी ज़रूर। एक रेगीस्ताने उछ़टी ज़ैगा बेसेर नाओंए नगरी ज़ुंण रूबेन गोत्रे हेस्सै आसा आई दी, दुजी गलाद मुल्खै रामोत नगरी ज़ुंण गाद गोत्रे हेस्सै आसा आई दी अर बाशान मुल्खै गोलान नगरी ज़ुंण मनिश्शे गोत्रे हेस्सै आसा आई दी।
“तिंयां नगरी हणीं एता लै, ज़ै तम्हां मांझ़ै कसरै भलै कहा भाई-बंधे एही हत्या होए कि नां तेऊ मणछा संघै तम्हां ज़ीद आथी ती अर नां तम्हैं सह ज़ाणीं भुझ़ी किई, तै सका सह मणछ इना मांझ़ै कहा एकी नगरी लै ठुर्ही आपणीं ज़ान बच़ाऊई।”
बिधाते बधाना बाढै खोज़णें शुरूआत
44-46मिसर देशा का निखल़ी थिऐ इज़राईली जरदण नदी पुर्बा बाखा बेथ-पोर ज़ैगा नेल़ डेरै पाऐ दै, तधू खोज़ी मोसा ईंयां बिधी अर बधान इज़राईली का। तिन्नें डेरै फेर सारी ज़ैगा थिऐ अमोरी बस्सै दै। तेथ करा त हेशबोन नगरीओ राज़अ सिहोन राज़। पर मोसा अर इज़राईली ज़ितै सिहोन 47अर बाशाने राज़ै ओगा का जुध संघा गिम्मी तिन्नां दुही मुल्खे सारी ज़ैगा आप्पू लै। ईंयां दूई अमोरी राज़ै करा तै जरदण नदी पुर्बा बाखे मुल्खै 48अरोर नगरी ओर्ही अर्नोन गाडा तैणीं अर उतरा बाखा हर्मोन धारा तैणीं राज़। 49जरदण नदी पुर्बा खागा उंधै खार समुंदर#4:49 खार समुंदर इब्रानी बोली दी अराबा समुंदर पिसगा धारे ढल़ाना उंधै अराबा तैणीं सारी ज़ैगा थिअ इनो राज़।
Currently Selected:
बधान 4: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
