बधान 31
31
ज़ैहसू बणाअं सोभी इज़राईलीओ सैणअ
1इना गल्ला खोज़ी बोलअ मोसा सोभी इज़राईली लै इहअ, 2“मेरी अमर गई ऐबै एकी शौआ बिहा साले हई, ऐबै निं हुंह इधा आजू तम्हां संघै थारअ सैणअ हणअ। बिधाता बी हेरअ मुल्है इहअ बोली कि हुंह निं ऐबै जरदण नदी पार टपी डेऊई सकदअ।#गण. 20:12
3-5“पर बिधाता बोलअ इहअ कि ज़ैहसू हणअ ऐबै मेरी ज़ैगा थारअ सैणअ अर तेऊ निंणै तम्हैं जरदण नदी पार बाखा, ताकि तिधी पुजी तम्हैं तेऊ देशै बस्सै दै तिन्नां मणछा संघै जुध छ़ेल़ी फेरा-फेर गोटे। बिधाता डेऊणअ तिधी तम्हां का आजू आप्पै अर तेऊ करनै तेऊ देशै बस्सै दै तिंयां लोग तिहै खतम ज़िहै तेऊ अमोरी लोगो राज़अ सिहोन अर ओग तिन्नें सारै देशा संघी खतम किऐ। तम्हैं डाहणीं सिधी अह गल्ल आद कि ज़हा ज़ैगा ज़िती तम्हैं आप्पू लै गिम्मे, तिधी बस्सै दै सोभी लोगा करै तम्हैं पठी खतम।#गण. 21:21-35
6“तम्हैं निं आपणअ हैअ चोल़ी! नां तम्हैं जरदण पार बस्सै दै तेऊ देशे लोगा का डरी आथी। किल्हैकि बिधाता हणअ सदा तम्हां बाखा आप्पै अर सह निं तम्हां कल्ही छ़ाडदअ”
7तेखअ शादअ मोसा ज़ैहसू संघा बोलअ तेऊ लै सारी इज़राईली टोली नदरी इहअ, “ज़ैहसू, तूह डाह हैअ अर हिम्मत कर, ताह लागणै ईंयां सोभै तेऊ देशै पजैल़णैं ज़ेता दैणें करार बिधाता इने दादा-बाबा का आसा किई दी। सह बगत गअ ऐबै पुजी अर तूह दैऐ तैहा ज़ैगा इना लै बांडी तेते मालक बणाईं। 8बिधाता पजैल़णैं तैहा ज़ैगा तम्हैं आप्पै अर तेऊ निं तम्हैं कल्ही छ़ाडणैं, तूह निं आपणैं दुशमणा का डरी अर नां हैअ चोल़ी।”#ज़ैह. 1:5; इब्रा. 13:5
हर सातुई साला खोज़ै सोभी का बधान पहल़ी करै
9मोसा डाहै बिधाते बधान अर बिधी लिखी, संघा दैनी तिंयां लिखी दी पोथी इज़राईली टोलीए सैणैं अर प्रोहता का। बिधाते करारे मणशू च़कणें ज़िम्मैंबारी थिई लेबी गोत्रा मांझ़ै प्रोहता का सभाल़ी दी। 10-11मोसा बोलअ इना प्रोहता अर इज़राईली टोलीए सैणैं लै, “हर साल करै सोभै इज़राईली बिधाते तैहा पबित्र ज़ैगा झाल़अ ज़ुंण बिधाता आप्पै छ़ांटे, संघा मनाऊंऐं छ़ानींओ थैर। हर सातुई साला ज़ेभै तिन्नों ऋण माफ हआ तेभै खोज़ै छ़ानींए थैरा दी बिधातो बधान अर बिधी पहल़ी करै सोभी लोगा का।#बधा. 15:12; 16:13-15
12-13“तेऊ थैरे जाचा लै लोल़ी सोभै मर्ध-बेटल़ी होछ़ै-प्रोढै अर थारी नगरी रहणैं आल़ै परदेसी संघी सोभै आऐ। ताकि बिधातो बधान अर बिधी सोभै शुणें अर थारै परमेशर बिधातो अदर करनअ शिखल़े अर तेता शुचै-पाक्कै रही मने। इहअ करै लागणअ थारी नऊंईं पोस्ती का बी थोघ ज़ुंणी आझ़ तैणीं बधान निं शूणअ अर तिंयां बी तेते साबै तैहा ज़ैगा आपणीं ज़िन्दगी ज़िऊए, ज़ेते मालक तम्हैं जरदण नदी पार डेऊई आसा हणैं आल़ै।”
बिधाता डाहअ मोसा का खोज़ी
14तेखअ बोलअ बिधाता मोसा लै, “तेरअ एऊ संसारा छ़ाडणेंओ बगत गअ ऐबै पुजी। तूह आण ज़ैहसू मेल़-ज़ोल़े खिम्भा सेटा लै अर तिधी दैंऊं हुंह तेरी पदबी तेऊ लै कि ऐबै तेरी ज़ैगा सह सोभी इज़राईली प्रैंदै सैणअ होए।”
मोसा अर ज़ैहसू डेऊऐ तेखअ मेल़-ज़ोल़े खिम्भा सेटा लै, 15बिधाता हुअ तिधी घणैं बादल़ा जैंदरी मेल़-ज़ोल़े खिम्भे प्रऊल़ी आजू प्रगट। 16संघा बोलअ बिधाता इहअ, “मोसा, तेरअ एऊ संसारा छ़ाडणेंओ बगत गअ ऐबै पुजी अर तूह डाहणअ ऐबै तेरै दादा-बाबा ज़िहअ ई दाबी। पर इज़राईली च़ाल्लै ऐबै तैहा ज़ैगा लै डेऊई ज़िधी होरी देअआ-देबीए पूज़ा हआ, इज़राईली मांझ़ै बी डेऊणैं खास्सै मुंह छ़ाडी इना देअआ पूज़दै! इहअ करै करनी तिन्नां अह करार खतम ज़ुंण मंऐं इना संघै आसा किई दी!
17“ज़ांऊं इहअ होए, तेभै पल़णअ मेरअ कोप इना लै अर तेखअ छ़ाडणैं ईंयां मुंह बी, अर मुंह बी डाहणीं इना बाखा आपणीं पिठ फरेऊई। इना लै एछणी तेखअ घोर नबिज़री बमारी अर आफ़ता, संघा हणैं ईंयां पठी बरैबाद। इहअ हणैं बाद जाणअ इना का ज़ाण्हुंई कि हुंह बिधाता निं इना संघै आथी! तैही पल़ी इना लै ईंयां सारी आफ़ता।
18“तेखअ करनी इना मुखा अरज़, पर मुंह डाहणीं इना बाखा पिठ फरेऊई, किल्हैकि तिंयां थिऐ कदुष्ट हुऐ दै अर तिंयां डेऊऐ मुंह छ़ाडी होरी देअआ पूज़दै।
19“मोसा, ज़ैहसू, मंऐं लाऐ तम्हां दुही का नऊंईं गिहे बोल खोज़ी, तेता डाहा लिखी संघा सखाऊऐ तेता सोभी इज़राईली का। ज़ै तिंयां तैहा गिहा शिखल़े, तै जाणअ तिन्नां का थोघ लागी कि मेरै दिलै तिन्नां लै किज़ै आसा, तेखअ निं तिन्नां का मुखा दूर हणैंओ किछ़ै भान्नअ हणअ। 20मंऐं लाऐ ईंयां तैहा ज़ैगा पजैल़ी ज़ेते मंऐं इने दादा-बाबा संघै करार आसा किई दी। अह ज़ैगा आसा एही रज़दी पज़दी ज़ेही कि तेऊ देशै बगा दुधा मखीरे गाडा। तिधी हणअ इना लै ज़िहअ च़ाहे तिहअ रज्ज़ी खाणां लै। पर खाई-पिई रहणैं ईंयां इहै धिर्हुई कि इना फरेऊंणी मुंह बाख पिठ, संघा लागणै होरी देअआ पूज़दै। इना करनअ हुंह नकदरअ अर इहअ करै करनी इना सह करार खतम ज़ुंण मंऐं इना संघै किई ती।
21“तेखअ ज़ांऊं मुंह इना इज़राईली अर इने आद-लुआदा लै नबिज़री बमारी अर आफ़ता पाई सज़ा दैणीं, तेभै फरेऊंणी मुंह तिन्नां का तैहा गिहे बोल आद ज़ुंण तिन्नैं शिखल़ी दी आसा, ताकि तिन्नां का मुखा दूर हणैंओ किछ़ै भान्नअ नां होए।
“मुंह हेरनै ईंयां तैहा ज़ैगा पजैल़ी ज़ेते मंऐं इना लै ज़बान आसा दैनी दी, पर मुखा आसा तेता का आजी ई थोघ कि ईंयां किज़ै-किज़ै सोठा अर आजू किज़ै हणअ।”
22मोसा डाहै तैहा गिहे बोल तेभी लिखी, संघा खोज़ी सह गिह सोभी इज़राईली का।
23“बिधाता किई तेखअ नूने शोहरू ज़ैहसू संघै गल्ला संघा बोलअ इहअ, ज़ैहसू, तूह डाहै हैअ अर भरोस्सअ! हुंह करूं इज़राईली तैहा ज़ैगा पजैल़णां लै तेरी आप्पै मज़त ज़ेते मंऐं करार आसा किई दी।”#गण. 27:23; ज़ैह. 1:6
24मोसा डाहै बिधाते ईंयां बधान अर बिधी कताबा दी लिखी, 25तेखअ डेऊअ मोसा लेबी गोत्रा सेटा लै ज़हा का करारे मणशू च़कणें ज़िम्मैंबारी थिई सभाल़ी दी। संघा किअ तेऊ तिन्नां लै इहअ हुकम, 26“ऐहा कताबा दी आसा बिधातो बधान, ऐहा कताबा डाहै आपणैं परमेशर बिधाते करारे मणशू सेटा, ताकि अह इज़राईलीए शाजत होए। 27मुखा आसा थोघ कि तम्हैं अर होर सोभै इज़राईली किहै हठू अर नशूंण आसा। मंऐं भाल़ी आपणीं ज़िऊंदी ज़िता सोभै गल्ला कि तम्हैं बिधाता लै किहअ-किहअ द्रोह किअ! पर मेरै मरनै बाद हणीं ईंयां गल्ला एता का बी खास्सी बूरी।
28“तम्हैं करा इज़राईली गोत्रे सोभी सैणैं अर कार-करिंदैओ झाल़अ ताकि हुंह ऐहा कताबा का बिधाते हरेक बैण तम्हां का पहल़ी करै खोज़ूं अर सरग अर धरती बणाणैं मुंह ऐहा गल्ले शाजत कि तम्हां सोभी का गअ थोघ लागी कि तम्हां किज़ै लागा करनअ।
29“किल्हैकि मेरअ गअ एऊ संसारा छ़ाडणेंओ बगत पुजी अर मुखा इहअ बी आसा थोघ कि मेरै मरनै बाद हणैं लोग बूरै अर तिन्नां छ़ाडणीं तिंयां गल्ला मनणी ज़ुंण मंऐं सखाऊई। एक बगत एछणअ इहअ कि तिन्नां लै पल़णअ बिधातो इहअ कोप कि तिन्नां लै एछणी घोर आफ़ता, किल्हैकि तिन्नां करनअ तिहअ काम ज़ेता लै बिधाता नांह आसा किई दी।”
मोसे गिह
30मोसा किअ सोभी इज़राईलीओ झाल़अ, ताकि सह बधाने कताबा का बिधाते हरेक बैण तिन्नां का पहल़ी करै खोज़ी सके ज़ुंण तेऊ का बिधाता खोज़ै तै। बिधाते तिंयां बैण तै इहै:
Currently Selected:
बधान 31: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
