बधान 1
1
कताबे बारै
1-5ऐहा कताबा दी आसा तिंयां गल्ला, ज़ुंण मोसा तधू खोज़ी ती ज़धू इज़राईली मोआब देशै, जरदण नदी पुर्बा बाखा रेगीस्तानै शूप नगरी नेल़ अराबा थिऐ डेरै पाऐ दै। ज़िधी इज़राईली थिऐ, तिन्नां एकी बाखा थिई परान नगरी अर दुजी बाखा थिई तोपेल, लाबान, हसेरोत अर दीजाहाब नगरी।
एता का आजी हेरअ त मोसा अमोरीओ राज़अ सिहोन हारी ज़ुंण हेशबोन नगरी राज़ करा त, बाशानो राज़अ ओग ज़ुंण अशतरोत रहा त सह पाअ त अद्रोई नगरी मारी।#गण. 21:21-35
एही ता लागा होरेब धारा का कादेश-बर्ना पुजणा लै पैदल हांढी सिधै गैरा धैल़ै ज़ै सेईर धारे बाता आऐ हंदै। पर ईंयां गल्ला निं मिसर#1:1-5 मिसर इज़राईली जाणैं तै जाणैं तै मिसर देशा का निखल़ी कनान देशै छ़ेक्कै पुजी, पर ज़ै तिन्नैं बिधाता संघै हठ निं किई हंदी। देशा का निखल़णैं का बाद च़ाल़्ही साला तैणीं खोज़ी आथी ती।
पैहली इतिहासे गल्ला ज़ुंण मोसा खोज़ी
बिधाता खोज़अ इज़राईली लै मोसा का बधान। च़ाल़्हुई साला साज़ै माघा पोर्ही लागअ मोसा इना गल्ला खोज़दअ।
6मोसा बोलअ इहअ, “इज़राईलीओ, ज़धू हाम्हैं होरेब धारा गोधै थिऐ डेरै पाऐ दै, तधू बोलअ म्हारै परमेशर बिधाता हाम्हां लै इहअ, ‘तम्हां गऐ ऐहा धारा नेल़ रहंदी खास्सै धैल़ै हई।
7“‘आपणैं खिम्भ खोल्हा, ऐबै गअ थारअ आजू डेऊणेओ बगत एछी। तम्हैं डेओआ तेऊ देशा लै ज़िधी अमोरी लोग रहा। तम्हैं बस्सै तेस्सी सारै देशा दी। मतलब, जरदण नदीए खागा बाती सारै देशै, तेऊ देशे सारै धारा बाखे मुल्खै अर सऊंऐं मुल्खा दी, दखणा बाखा सारै देशै अर मांझ़ समुंदरे बाढे देशा दी। कनान देशै बस्सै तम्हैं लाबानोन धारा पोर्ही माहा नदी फरात तैणीं।
8“‘मुंह दैणअ अह सारअ देश तम्हां लै ज़ेता दैणें करार मंऐं बिधाता आप्पै थारै दाद-बाब आबराम, इसहाक अर याकबा का आसा किई दी। ऐबै डेओआ, संघा गिम्मा तेऊ सारै देशे ज़ैगा आप्पू लै।’
मोसा छ़ांटै पांच़
(लुआह 18:13-27)
9“ज़िहअ ई बिधाता हाम्हां लै सीनाई धारा का आजू डेऊणेओ हुकम किअ, तधू बोलअ त मंऐं तम्हां लै इहअ, ‘इज़राईलीओ, हुंह निं तम्हां एतरै ज़ण्हैं कल्ही ज़ण्हअ सभाल़ी सकदअ। 10किल्हैकि बिधाता दैनी हाम्हां लै एही बर्गत कि हाम्हैं हुऐ ऐबै इहै खास्सै ज़िहै सरगै तारै आसा। 11बिधाता आसा हाम्हां लै एही ज़बान दैनी दी कि तेऊ दैणीं हाम्हां लै हज़ार गुणा बर्गत अर मेरी आसा म्हारै दादा-बाबे कुल़ज बिधाता का एही अरज़ कि इहअ ई लोल़ी त हुअ बी। 12पर हुंह निं कल्ही ज़ण्हअ थारी परशैनी दूर करी सकदअ।
13“‘तम्हैं छ़ांटा आप्पै हर गोत्र आप्पू मांझ़ा का इहै मणछ ज़हा राम्बल़ी समझ़-बुध होए अर ज़ुंण सोभी लै मनै-तनै दै होए। हुंह बणाऊं तिन्नां थारै सैणैं।’
14“तम्हैं दैनअ त तधू मुल्है इहअ ज़बाब, ‘अह बोली बै काईदे गल्ल।’ 15तेखअ बणाऐं मंऐं ईंयां मणछ थारै सैणैं ज़ुंण समझ़-बुधा आल़ै अर सोभी लै मनै-तनै दै आसा। तिन्नां मांझ़ै सभाल़ी कोई का हज़ारा लोगे ज़िम्मैंबारी, कोई लै शौआ, कोई लै पज़ाह अर कोई लै दसा लोगे ज़िम्मैंबारी। हर गोत्रा लै बी डाहअ एक-एक सैणअ। 16तधू ज़ुंण तम्हां मांझ़ै पांच़ बणै, तिन्नां लै बोलअ त मंऐं तधू इहअ, ‘ज़ेभै तम्हैं कसरै मकदमैं लै नसाफ दैए, तेता लै लोल़ी तम्हैं धर्मीं रहै, तेथ निं लोल़ी तम्हैं आपणअ बगैनअ भाल़अ, च़ाऐ सह कहा इज़राईलीओ मकदमअ होए, या कहा परदेसी मणछो ज़ुंण थारै देशै तम्हां जैंदरी आसा बस्सअ द। 17ज़ेभै तम्हैं पांच़ी करे, तेभै निं कोही संघै भेदभाब करी, च़ाऐ थारी दालता दी गरीब मणछ एछे या सेठ, परमेशरा हेरनी तम्हां लै नसाफ करना लै मज़त करी। ज़ै कुंण मकदमअ खास्सअ कठण होए, तेता आणै तम्हैं मुंह सेटा लै, तिन्नें गल्ला शूणूं हुंह आप्पै।’
18“तिन्नां पांच़ा का ईंयां गल्ला करी खोज़अ मंऐं तम्हां का इहअ कि थारअ काम अर ज़िम्मैंबारी किज़ै आसा।
कनान देशा लै भेख लणैं आल़ै मणछ
(गणांई 13:1-33)
19“ज़िहअ बिधाता हुकम किअ, तिहै ई लागै हाम्हैं होरेब धारा का घोर डरैऊंणै रेगीस्ताना बाती अमोरी लोगे धारा बाखे मुल्खा लै हांढदै। ज़ांऊं हाम्हैं कादेश-बर्ना पुजै, 20-21तेभै खोज़अ त मंऐं तम्हां का इहअ, ‘हाम्हैं गऐ धारा बाखे मुल्खै पुजी। एऊ देशै आसा एभै अमोरी लोग बस्सै दै, पर म्हारै परमेशर बिधाता दैणअ अह देश हाम्हां लै। अह आसा सह ई बिधाता ज़हा म्हारै दाद-बाब मना तै अर तेऊ ई आसा हाम्हां लै ऐहा ज़ैगा लै डेऊणा लै बोलअ द। ऐहा ज़ैगा गिम्मै पठी आप्पू लै तम्हैं नां तिधी डेऊणैं का पिछ़ू हटी अर नां डरी आथी।’
22“तधू आऐ तै तम्हैं सोभै मुंह सेटा संघा बोलअ त तम्हैं इहअ, ‘तेऊ देशा का डेऊणैं का आजी छ़ाडणैं हाम्हां आपणैं ज़ाण-प्रबीण आदमी तेऊ देशे भेख लंदै। तिंयां सका हाम्हां का तेऊ देशै बारै खोज़ी कि तेथ केही नगरी आसा अर तेऊ देशै डेऊणा लै कुंण ज़ेही बात रहणीं ठीक।’
23“अह गल्ल गम्मी मुंह बी अर मंऐं छ़ांटै इज़राईले बारा गोत्रा का बारा ज़ण्हैं। 24तिंयां डेऊऐ धारा बाखे मुल्खा बाती संघा आऐ एशकोल#1:24 एशकोल अह खाग आसा बडी-बडी दाखा लै मशूर नाओंए गाडा तैणीं तेऊ देशो भेख लई, 25तिन्नैं आणै तै आप्पू संघै तेऊ देशे पज़ैआ मांझ़ै फल़ बी संघा। तिन्नैं बी खोज़अ त हाम्हां का अह ई समाद, ‘ज़ुंण देश बिधाता हाम्हां लै आसा लाअ द दैई, सह आसा खास्सअ रज़दअ-पज़दअ।’
इज़राईली निं बिधातो हुकम मनअ
(गणांई 14:1-45)
26“तम्हैं हुधूऐ तै तेऊ देशै डेऊणैं का अर इहअ करै निं तम्हैं बिधातो हुकम मनअ त।#बधा. 9:23; इब्रा. 3:16 27तम्हैं रहै आपणैं डेरै दी पल़ी संघा लागै इहअ बोली बखर्दै, ‘बिधाता करा हाम्हां का नफरत, तेऊ आणै हाम्हैं मिसर देशा एते तैणीं कि हाम्हैं अमोरी लोगे बशै पल़ी खतम होए! 28ऐबै केस्सी डेऊणअ हाम्हां? म्हारै ईंयां भाई-बंध ज़ुंण तेऊ देशो भेख लंदै थिऐ डेऊऐ दै, तिन्नैं पाअ म्हारै मन्नैं इहअ बोली होर बी हैल़अ कि तेऊ देशै आसा बडी-बडी नगरी अर तेता फेर-फिरदै आसा उछ़टै-उछ़टै गहल़ अर तेऊ देशे लोग आसा हाम्हां का लाम्मै अर खास्सै ज़ोरा आल़ै अर अनाक#1:28 अनाक बडै-बडै दैंत्तर मणछ ज़ुंण इज़राईली का आजी तेथ रहा हंदै खिंबे लोग बी आसा तिधी। हाम्हां निं तेऊ देशा लै डेऊणअ आथी।’
29“मंऐं बोलअ त तधू इहअ, ‘तम्हैं निं डरा आथी। 30म्हारअ परमेशर बिधाता रहणअ आप्पै हाम्हां आजू-आजू अर हाम्हां बाखा करनअ तेऊ आप्पै तिहअ ई जुध ज़िहअ तेऊ मिसर देशै तम्हां नदरी किअ। 31तम्हां का इहअ बी आसा थोघ कि शुन्नैं रेगीस्ताना बाती पजैल़ै बिधाता हाम्हैं इधी राज्ज़ी-राम्बल़ै, ज़िहअ कि बाब आपणैं होछ़ै लान्हैं आपणीं कान्हा आणा च़की।#शधा. 13:18
32“‘पर तम्हैं निं तज़ी बी बिधातो विश्वास किअ!#इब्रा. 3:19 33पर बिधाता रहअ तज़ी बी कबल्लअ हाम्हां संघै। धैल़ी रहा त बिधाता बादल़ा दी रही हाम्हां आजू नढैऊंदअ लागी अर हाम्हां का खोज़ा त सह कि किधी करनै डेरै खल़ै करी बशैघ। राची रहा त बिधाता आगीए थाम्हा दी ताकि तम्हां का आजू डेऊणे बात शुझिए।
34“#इब्रा. 3:18तम्हैं ठैऊई बिधाता लै रोश्श, तैही बोलअ बिधाता तेखअ इहअ, 35‘तम्हैं ऐहा पोस्तीए लोग आसा खास्सै बूरै, तम्हां मांझ़ै निं हुंह एकी बी तेऊ रज़दै-पज़दै देशै पुजणैं दैंदअ, ज़ेता दैणें ज़बान मंऐं थारै दादा-बाबा का आसा दैनी दी। 36थारी पोस्ती दी आसा यपुन्नेंओ शोहरू कालेब कल्ही इहअ ज़ुंण तेऊ देशै पुजणअ। तेऊ किअ तिहअ ई ज़िहअ हुंह बिधाता च़ाहा त, मुंह दैणअ सह देश तेऊ अर तेऊए आजू आद-लुआदा लै ज़हा देशे सह भेख लई आअ त।’
37“तम्हां पिछ़ू किअ त मुल्है बी बिधाता रोश्श, संघा बोलअ त इहअ, ‘तूह बी निं तेऊ देशै पुजदअ, 38ज़ुंण ताह संघै नूनो शोहरू ज़ैहसू आसा, एऊ लै दै हैअ, एऊ बणाणैं इज़राईली तेऊ देशे मालक।’
39“तेखअ बोलअ बिधाता तम्हां लै इहअ, ‘इज़राईलीओ, तम्हैं बोला इहअ कि थारै लान्हैं सुन्हैं डेऊणैं तेऊ देशा लै जुधा करदी गलामी दी! पर एक धैल़ी एछणी एही कि मुंह दैणअ सह देश तिन्नां लै अर तिंयां हणैं तेऊ देशे मालक।
40“‘ऐबै फिरा तम्हैं पिछ़ू संघा डेओआ रेगीस्ताना बाती लाल समुंदरे बाढा बातीए बाता।’
41“तेखअ बोलअ त तधू तम्हैं मुखा इहअ, ‘हाम्हैं किअ पाप कि हाम्हैं निं बिधातो हुकम मनअ, ऐबै करनअ हाम्हां तिहअ ई ज़िहअ बिधाता हाम्हां लै बोले। हाम्हैं आसा धारा बाखे मुल्खै डेऊई जुधा करना लै तैर ज़िहअ बिधाता हाम्हां लै बोला।’ तम्हैं उझ़ुऐ तधू आपणैं अस्त्र-शस्त्र लई इहै कि धारा बाखो मुल्ख ज़ितणअ आसा तम्हां लै सान काम।
42“पर बिधाता खोज़अ तधू मुखा इहअ, ‘मोसा, इना लै बोल इहअ कि उझै धारा बाखे मुल्खा लै निं डेऊई। हुंह निं हेरे जुधा लै इना बाखा आथी, इहअ निं हआ कि ईंयां दुशमणा का जुध हारे।’
43“मंऐं हेरअ त तधू तम्हां का खोज़ी कि बिधाता बोला इहअ, पर तम्हैं निं मेरी गल्ला शूणीं। तम्हैं निं बिधाते गल्ल मनी अर तम्हैं डेऊऐ द्रोह करी उझै धारा बाखे मुल्खा लै आपणैं छ़ैहै इहै कि तम्हैं आसा खास्सै महान! 44पर ज़ांऊं धारा बाखे मुल्खै रहणैं आल़ै अमोरी तम्हां लै फेरा-फेर गोट दैनअ, तम्हैं ठुर्है तिन्नां सेटा का इहै कि तम्हां पिछ़ू आसा माहूँओ गअण पल़अ द। अमोरी दरल़ाऊऐ तम्हैं रुटदी-भल़ाकदी सेईर देशे होर्मा नगरी तैणीं। 45तेखअ पुजै तम्हैं कादेश-बर्ना मेल़-ज़ोल़े खिम्भा सेटा फिरी, संघा लागै तिधी लेरा लांदै, पर बिधाता निं तम्हां बाखा भाल़अ बी।
इज़राईली रहै खास्सी साला रेगीस्तानै
46“कादेश-बर्ना रहंदी हुअ त हाम्हां खास्सअ बगत, तेखअ ज़िहअ बिधाता हुकम किअ, तेते साबै फिरै हाम्हैं पिछ़ू रेगीस्ताना बाखा संघा लागै लाल समुंदरे बाढा बातीए बाता आजू हांढदै।”
Currently Selected:
बधान 1: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
