कुलूस्सी 3

1तै ज़ै ऐबै तम्हैं परमेशरै मसीहा संघै ज़िऊंदै किऐ, तै रहा तिन्‍नां गल्‍ला लोल़ै लागी ज़ुंण परमेशरै तम्हां लै स्वर्गै आसा डाही दी अर ज़िधी मसीहा आप्पू परमेशरे दैहणीं बाखा सोभी का बडी पदबी दी आसा बेठअ द।#मोत्त. 6:20

2पृथूईए निं पर स्वर्गे गल्‍ला दी लाआ मन्‍न। 3किल्हैकि तम्हैं गऐ ऐबै संसारे पाप करने सभाबा लै मरी अर थारी ज़िन्दगी आसा मसीहा संघै परमेशरा दी लुक्‍की दी। 4मसीहा ज़ुंणी हाम्हां लै नऊंईं ज़िन्दगी दैनी ज़ेभै सह पृथूई लै फिरी एछणअ तेभै हणैं तम्हैं बी तेऊ संघै अर तेऊए प्रतप्पा दी साझ़ू।

पराणीं अर नऊंईं ज़िन्दगी

5तैही निं तम्हैं ऐबै आपणैं पराणैं पाप करने सभाबे बशै रहा, मतलब-कंज़रैई, छ़ोता, बूरी सोठ, कंज़री आछ अर मांण निं करा ज़ुंण मुहुर्ती पूज़ा बराबर हआ। 6इना ई बूरी गल्‍ला करै पल़ा नभैऊशै परमेशरो प्रकोप तेऊ लै ज़ुंण हुकम नांईं मना। 7तम्हैं बी ज़धू इना बूराई दी काटा तै आपणीं ज़िन्दगी, एते ई साबै काम बी करा तै। 8पर ऐबै छ़ाडा तम्हैं बी इना सोभी गल्‍ला मतलब रोश्श, ज़ीद-मिश, निंदा, गाल़ी दैणैं ज़ेही इना सोभी बूरी गल्‍ला करने पाआ छ़ाड।#इफि. 4:23-24

9एकी-दुजै का निं झ़ुठअ बोला, किल्हैकि तम्हैं हेरअ आपणअ पाप करनै आल़अ बूरअ सभाब अर सोभै कदुष्ट काम करनै छ़ाडी। 10ऐबै आअ तम्हां दी नऊंअ भलअ सभाब अर परमेशर रहा हर बगत तम्हां आप्पू ज़िहै भलै का भलै बणाऊंदअ लागी ज़िहै तेऊ हाम्हैं आप्पू ज़िहै बणाऐं तै। 11ऐहा नऊंईं ज़िन्दगी दी नां कुंण यूनानी रह, नां यहूदी, नां खतैर आल़अ नां खतैर नांईं किऐ दै, नां बणें नां परदेसी, नां दास, नां गलाम, पर सिधअ मसीहा आसा सोभ किछ़ अर सह आसा तम्हां सोभी दी ज़िऊंदअ।

12तै आसा परमेशरै तम्हैं आपणैं पबित्र लोग हणां लै छ़ांटै दै अर सह करा तम्हां लै झ़ूरी, बडी झींण, भलाई, शरीफ, मानदार, झ़ूरी अर सबर करनै आल़ै। 13ज़ै कहा लै दोशा लाणैंओ किज़ै कारण होए, तेता बी काढै ज़िरी अर होरीए ज़ुल्म बी करा माफ, ज़िहै प्रभू थारै ज़ुल्म माफ किऐ, तिहै ई करा तम्हैं बी।

14सोभी का ज़रूरी गल्‍ल आसा एही कि एकी-दुजै संघै करनी झ़ूरी किल्हैकि एता करै हआ तम्हां सोभिओ कठा मेल़-ज़ोल़। 15सह आसा मसीहा ई थारअ परमेशरा संघै अर एकी-दुजै संघै मेल़-ज़ोल़ करा, थारअ सभाब लोल़ी तिहअ शांती दी रहअ। तम्हैं आसा तेऊ एते ई तैणीं एक देही हणां लै शादै दै। कबल्‍लै रहा परमेशरो शूकर करदै लागी।

16ज़ुंण तम्हैं मसीहा का आसा शिखल़अ द, तिन्‍नां हर गल्‍ला मनी ज़िऊआ आपणीं ज़िन्दगी परमेशरे मरज़ी दी। एकी-दुजै लै दैआ आपणीं अक्ल करै समझ़ाऊंणी अर सखाऊंणी ज़ुंण तम्हां परमेशरा का आसा भेटी दी। भज़न, गाऊंण अर आत्मिक गिहा करै रहा परमेशरे स्तोती अर शूकर करदै लागी। 17बैणा करै या कामां करै ज़ुंण बी तम्हैं करा, सोभै करा प्रभू ईशूए नाओंए, अर प्रभू ईशू करै करा परमेशरो शूकर।

टबरा मांझ़ै नऊंईं ज़िन्दगीओ बधान

18ओ बेटल़ीओ, आपणैं-आपणैं मर्धे डरा हेठै रहा किल्हैकि तम्हैं आसा प्रभू ईशू दी विश्वास करनै आल़ै।#इफि. 5:22

19ओ मर्धो, आपणीं-आपणीं लाल़ी संघै करा झ़ूरी अर तिन्‍नां लै निं काठै रहा बणी।

20ओ शोहरूओ, सोभी गल्‍ला दी हआ आपणैं ईजा-बाबे शुणनै मनणै आल़ै ज़िहै तिंयां तम्हां लै बोला किल्हैकि प्रभू हआ तेता करै खुश।

21ओ लान्हैं आल़ैओ, आपणैं शोहरू-माठै निं हर गल्‍ला पिछ़ू कबल्‍लै च़िक्‍कदै-मारदै निं लागा, इहअ निं हआ कि तिंयां हिम्मत हारी तिन्‍नों दिल चुटे।

22ए दासो, ज़ुंण पृथूई दी थारै मालक आसा तम्हैं करा तिहअ ई ज़िहअ तिंयां बोला। सिधअ तिन्‍नें मुंहां सम्हनै निं पर पिठी पिछ़ू बी मनणी तिन्‍नें हर गल्‍ला दिला का किल्हैकि तम्हैं करा प्रभू ईशूओ अदर। 23ज़ुंण किछ़ बी तम्हैं करा, तेता करा तन मना संघै, इहअ समझ़ी कि अह निं मणछा लै लाई करी पर एता आसा हाम्हैं परमेशरा लै लागै दै करदै। 24किल्हैकि तम्हां का आसा थोघ कि तम्हां भेटणअ एते बदल़ै प्रभू का खास फल, तम्हैं करा प्रभू मसीहे च़ाकरी।

25किल्हैकि ज़ुंण बूरअ करा, तेऊ भेटणीं परमेशरा का तेते सज़ा, परमेशरा सेटा निं कोही लै पक्षपात हंदअ।#शधा. 10:34; रोम. 2:11

Currently Selected:

कुलूस्सी 3: OSJ

Highlight

Copy

Compare