शधाणूं 25

पल़सीए माहा राज़ेए दुहाई दैणीं

1कैसरिया पुजी पदबी सभाल़णैं का बाद डेऊअ फेस्तुस चिई धेल्‍लै बाद एरुशलेम नगरी लै। 2तिधी छ़ेल़ी बडै प्रोहतै, यहूदी सैणैं तेऊए सम्हनै पल़सीए गल्‍ला। 3तिन्‍नैं किई तेऊ का एही मांग कि पल़सी छ़ाड एरुशलेम नगरी लै। किल्हैकि तिंयां च़ाहा तै पल़सी बातो-बात मारनअ।

4फेस्तुस राज़पालै दैनअ ज़बाब, “पल़सी आसा कैसरिया कैद खानै, मुंह डेऊणअ आप्पै तिधा लै छ़ेक्‍कै। 5तम्हां मांझ़ै ज़ुंण ऐहा गल्‍ला लै सैणैं आसा तिंयां च़ाल्‍ला मुंह संघै, ज़ै तेऊ मणछा दी किज़ै गलती होए तै सका तम्हैं तेऊ लै तिधी मकदमअ करी।”

6आठ-दस धैल़ै बाद डेऊअ फेस्तुस कैसरिया लै फिरी अर दुजै धैल़ै नसाफ करने गाद्दी दी बेशी शादअ पल़सी तेऊ दालता लै। 7ज़ांऊं पल़सी तिधी पुजअ, एरुशलेम नगरी का आऐ दै यहूदी सैणैं खल़्हुऐ तेऊ फेर, अर तिन्‍नैं लाऐ तेऊ लै खास्सै इहै दोश ज़ेते तिंयां कोई सबूत बी निं दैई सकदै तै।

8पर पल़सी दैनअ ज़बाब, “मंऐं निं यहूदी बधाने खलाफ किछ़ै ज़ुल्म किअ अर नां भबने अर माहा राज़ेए खलाफ डेऊअ।”

9तेखअ पुछ़अ फेस्तुस राज़पालै यहूदी सैणैं खुश करने तैणीं पल़सी का एक सुआल, “तूह कै इहअ च़ाहा कि एरुशलेम नगरी डेऊई तिधी मेरै सम्हनै तेरै मकदमैंओ फैंसलअ होए?”

10पल़सी दैनअ ज़बाब, “हुंह आसा माहा राज़ेए दालता दी खल़्हुअ द, मेरै मकदमैंओ फैंसलअ लोल़ी इधी हुअ। ज़िहअ कि ताखा बी आसा थोघ कि मंऐं निं यहूदी लै किछ़ै ज़ुल्म किअ। 11ज़ै मंऐं किज़ै ज़ुल्म किअ बी अर ज़ै मेरी सज़ा मौत बी होए, हुंह आसा तेता लै बी राज्ज़ी। पर ज़हा गल्‍लो ईंयां मुल्है दोशा लांदै आसा लागै दै, ईंयां गल्‍ला निं शुची आथी, ऐहा गल्‍लो हक निं कोही का आथी कि मुंह इना यहूदी मारना लै दैए, हुंह दैआ इधी ऐबै एही अरज़ कि मेरै मकदमैंओ फैंसलअ लोल़ी माहा राज़ेए दालता दी हुअ।”

12तेखअ दैनअ फेस्तुस राज़पालै माहा सभा राऐ करी ज़बाब, “तंऐं किई माहा राज़ेए दालता दी डेऊणे अरज़ अर ऐबै छ़ाडणअ मुंह तूह माहा राज़ै सेटा।”

राज़ै अग्रिप्पा सेटा पल़सीए पेशी

13थोल़ै धैल़ै बाद आअ अग्रिप्पा राज़अ आपणीं बैहणी बिरनिके संघै राज़पाल फेस्तुस सेटा कैसरिया नगरी मिलदअ। 14तिधी खास्सै धैल़ै रहणैं का बाद खोज़ी फेस्तुस राज़पालै पल़सीए बारै तिन्‍नां का सारी गल्‍ला, “एक मणछ आसा ज़ुंण राज़पाल फेलिक्सै इधी कैद खानै आसा छ़ाडअ द। 15ज़धू हुंह एरुशलेम नगरी थिअ, तधू किई बडै प्रोहत अर यहूदी सैणैं तेऊए गल्‍ला। तिंयां च़ाहा इहअ कि पल़सी लै दैआ मौते सज़ा।

16“पर मंऐं दैनअ तिन्‍नां लै ज़बाब कि रोम राज़े बधाने साबै लोल़ी दोशी अर मकदमैं करनै आल़ै दुहै पेशी लै आऐ अर मुंहां सम्हनै लोल़ी तिन्‍नें सुआल-ज़बाब हुऐ। ज़हा लै मकदमअ आसा किअ द तेऊ लोल़ी आपणीं गल्‍ला खोज़णेंओ मोक्‍कअ भेटअ तेभै तैणीं निं कोही लै सज़ा दैई सकदै।

17“ज़ांऊं तिंयां इधी कठा हुऐ, मंऐं निं बल़ैग पाई अर मंऐं शादअ दुजै धैल़ै पल़सी दालता लै। 18ज़ांऊं तेऊ दी मकदमैं करनै आल़ै खल़ै हुऐ, तिन्‍नैं बी निं तेतरी बूरी गल्‍लो दोश लाई ज़िहअ हुंह समझ़ा त। 19तिंयां थिऐ आपणैं रबाज़ा पिछ़ू झ़घल़दै लागै दै अर ईशू नाओंए कोई मणछे बारै ज़ुंण मूंअ त अर अह पल़सी खोज़ा तेऊ ज़िऊंदै, ऐहा गल्‍ला पिछ़ू तै ईंयां हठल़दै लागै दै।

20“हुंह त इहअ झाखुअ द कि इना गल्‍लो थोघ किहअ करै लाऊं? तैही पुछ़अ मंऐं एऊ का इहअ कि तूह एरुशलेम नगरी लै च़ाल्‍लअ कि तिधी तेरै मकदमैंओ फैंसलअ होए? 21पर एऊ पल़सी किई एही अरज़ कि मेरअ नसाफ माहा राज़ेए दालता दी हुअ। मंऐं दैनअ हुकम कि ज़ेभै तैणीं हुंह एऊ माहा राज़ै सेटा निं पजैल़ी लऊं, तेभै तैणीं करा एऊए कैद खानै हेर-सभाल़।”

22तेखअ बोलअ अग्रिप्पा राज़ै फेस्तुस राज़पाला का, “हुंबी च़ाहा तेऊ मणछे शुणनअ कि सह कै बोला?”

फेस्तुस राज़पालै बोलअ, “काल्‍ला शूणैं तूह भाल़ै।”

23दुजै धेल्‍लै पुजै राज़अ अग्रिप्पा तेऊए बैहण बिरनिके बडी ज़ै-ज़ैकारा मांझ़ै सपाही दले सरदारा अर नगरीए बडै लोगा संघै दरबारै। फेस्तुस राज़पालै दैनअ इहअ हुकम कि पल़सी आणा ओर्ही।

24फेस्तुस राज़पालै बोलअ, “हे माहा राज़अ अग्रिप्पा, अर इधी हाम्हां संघै सोभी मणछो, तम्हैं भाल़ा एऊ मणछा ज़सरै बारै खास्सै यहूदी एरुशलेम नगरी अर इधी बी लैल़ा, लाई-लाई करै मुखा अरज़ किई कि अह ज़िऊंदअ डाहणअ निं ठीक आथी। 25पर मुखा गअ थोघ लागी कि एऊ निं इहअ किछ़ै किअ ज़ेता लै एऊ मौते सज़ा होए। ऐबै ज़ै एऊ आप्पै ई माहा राज़ेए दालता लै डेऊणे अरज़ किई, मंऐं लाअ अह रोम नगरी दैई पजैल़ी।

26“पर मुखा निस्सअ एऊ लै सज़ा दैणैं जोगी किछ़ै दोश शुझुई कि आपणैं मालका सेटा लै किज़ै लिखूं? तैही आणअ मंऐं तम्हां सेटा, खासकर राज़ै अग्रिप्पा सेटा कि एऊए पुछ़-ज़ाच़ करनै का बाद मुंह माहा राज़ै लै लिखी दैणा लै किज़ै सबूत भेटे। 27किल्हैकि कैदी दी किज़ै दोश आसा तेते बारै लिखै बाझ़ी कैदी ताह सेटा लै छ़ाडणअ ज़ाण्हिंआं मुखा बृथा।”

Currently Selected:

शधाणूं 25: OSJ

Highlight

Copy

Compare