2 शमूएल 12
12
दाबेदा लै नातान गूरो समाद#भज. 51
1बिधाता छ़ाडअ आपणअ गूर नातान दाबेद राज़ै सेटा। तेऊ सेटा डेऊई बोलअ नातान गूरै इहअ, “एकी नगरी थिऐ दूई मणछ, एक त सेठ अर दुजअ त गरीब। 2सेठ मणछा का थिई खास्सी भेडा-बाकरी अर गाऊई-बल्दे हेल़्ही, 3पर तेऊ गरीब मणछा का थिई होछ़ी ज़ेही एक्कै गाभी अर सह थिई तेऊ मोलै आणी दी लई। सह धाची-पाल़ी तेऊ आपणैं घअरै आपणैं लान्हैं-सुन्हैं संघै। सह दैआ त तैहा लै आपणैं थाल़ू का रोटी अर आपणैं प्रिहै का पाणीं झुटणा लै। सह रहा ती तेऊए भोसल़ै सुत्ती। सह गाभी ती तेऊ लै तेऊए शोहरी ज़ेही। 4एकी धैल़ै आअ एक मसाफर सेठ मणछे घअरै। सह निं आपणैं घअरे चैणें हेल़्ही मांझ़ै कोही खोणअ च़ाहंदअ त कि तेऊ प्राहुणैं लै शिखा लै काटे। तेऊ निंईं तेऊ गरीब मणछे सह गाभी संघा बणाईं आपणैं प्राहुंणैं लै तेते शिखा!”
5इना गल्ला शूणीं हुअ दाबेद तेऊ सेठ मणछा लै रोश्शै लाल-पिंऊंल़अ अर तेऊ बोलअ नातान गूरा लै इहअ, “हुंह खाआ ज़िऊंदै परमेशर बिधाते सोह, ज़ुंणीं अह इहअ किअ सह निं मुंह ज़िऊंदअ छ़ाडणअ! 6तैहा गाभीए बदल़ै बी लागणअ तेऊ च़ार गुणा दैणअ भरी, तेऊ भाल़ किहअ घोर कदुष्ट काम किअ, तेऊ धख झींण बी निं फिरी!”
7तेखअ बोलअ नातान गूरै दाबेदा लै, “सह मणछ आसा तूह ई। इज़राईलो परमेशर बिधाता बोला ताल्है इहअ, ‘मंऐं बच़ाऊअ तूह राज़ै शाऊला का संघा बणाअं अभिषेक करी इज़राईला प्रैंदै राज़अ। 8तेऊओ राज़, तेऊए बेटल़ी दैनी मंऐं ताल्है! तूह बणाअं मंऐं यहूदा अर इज़राईल दुही मुल्खा प्रैंदै राज़अ। ज़ै ताह अह थोल़अ गअ त, तै दैंदअ हुंह ताल्है एतो दुगणअ होर! 9ज़िहअ मंऐं बोलअ तंऐं तिहअ किल्है निं किअ, मेरअ बैण किल्है पाअ तंऐं बृथा? तंऐं अह कदुष्ट काम किल्है किअ? तंऐं बझ़ैल़अ हित्ती उरियाह जुधा दी अमोनी लोगे हाथै ज़ोरा-ज़ोरी मारनै! 10एतो दोश लागणअ तेरै खिंबा लै अर तेरी आद-लुआदा मांझ़ै बी मरनै कई इहै ई तलबारा करै किल्हैकि तंऐं समझ़अ हुंह बृथा अर हित्ती उरियाहे लाल़ी आप्पू लै डाही किअ तंऐं बूरअ। 11#2 शमू. 16:22ऐबै शुण, बिधाता बोला इहअ कि तेरै ई टबरा मांझ़ै हणअ कुंण इहअ ज़हा ताल्है आफ़त करनीं खल़ी। एतो थोघ लागणअ ताखा तेभै, ज़ेभै मुंह तेरी आछी सम्हनै तेरी बेटल़ी कहा होरी लै दैणीं अर तिंयां करनीं तिन्नां धैल़ी दपहरै नांगी-बल़िंगी। 12तंऐं ता किअ अह काम च़ुप्प-च़ुप्पै, पर मुंह दैणअ ताल्है इहअ धैल़ी दपहरै सोभी इज़राईली नदरी हणैं।’”
13तेखअ बोलअ दाबेदै नातान गूरा लै, “मंऐं किअ बिधाता लै पाप!”
नातानै दैनअ ज़बाब, “हाँ, पर बिधाता किअ तूह पापा का दूर, मरनै का जाणअ तूह बच़ी। 14पर एऊ कामां करै रहैऊअ तंऐं इहअ कि ताह निं बिधाते परबाह आथी कि सह किज़ै च़ाहा! तैही ज़ुंण तेरअ शोहरू हणअ, सह मरनअ।”
15तेखअ लागअ नातान आपणैं घअरा लै हांढदअ।
दाबेदो शोहरू मूंअ
तेखअ ज़ुंण उरियाहे बेटल़ी बेतशेबा का दाबेदो शोहरू हुअ, बिधातो दोश लागअ तेऊ शोहरू लै अर सह शोहरू हुअ बाख दुबल़अ अर रोगी। 16दाबेदै किई बिधाता सेटा खास्सी अरज़ कि सह शोहरू लोल़ी नरोगअ हुअ। सह रहअ ब्रतू अर हर धैल़ै सारी राची रहा त सह आपणीं पांडा धरनीं बधल़ूई। 17तेऊए मैहलै रहणैं आल़ै कार-करिंदै डेऊए तेऊ धरना का खल़ै झ़ैऊंदै तेऊ सेटा, पर सह निस्सअ उझ़ुई अर नां तेऊ तिन्नां संघै रोटी खाई। 18खिरी मूंअ सह शोहरू सातुऐ धैल़ै अर दाबेदे कार-करिंदै डरै दाबेदा का ऐहा गल्ला खोज़णैं। तिन्नैं बोलअ इहअ, “ज़ेभै शोहरू ज़िऊंदअ थिअ, तेभै निं एऊ म्हारी गल्ला शूणीं ज़बाब दैनअ! ऐबै किहअ करै खोज़णअ हाम्हां कि एऊओ शोहरू गअ मरी? इहअ शूणीं निं लोल़ी एऊ लै किज़ै होर आफ़त पल़ी!”
19दाबदै भाल़ै कि तेऊए कार-करिंदै आसा एकी-दुजै संघै च़ुप्प-च़ुप्पै गल्ला करदै लागै दै अर तेऊ हेरअ ज़ाणीं कि शोहरू गअ हणअ मरी। तेखअ लागअ दाबेद तिन्नां का पुछ़दअ, “शोहरू मूंअ भाल़ी?”
तिन्नैं दैनअ ज़बाब, “हाँ माहा राज़अ, शोहरू गअ ज़ांऐं।”
20दाबेद उझ़ुअ धरना का खल़अ संघा न्हैऊअ, मुंडे शराल़ करिशै संघा बदल़ै आपणैं झिकल़ै। तेखअ डेऊअ सह बिधाते भबना लै संघा टेक्कअ माथअ। ज़ांऊं सह आपणैं मैहला लै बापस फिरअ, तेऊ मांगी खाणां लै रोटी। ज़ेही तेऊ लै रोटी दैनी तेऊ खाई तिंयां। 21तेखअ लागै तेऊए कार-करिंदै इहअ बोल्दै, “हाम्हां निं अह गल्ल समझ़ ई आई कि ज़ेभै तेरअ शोहरू ज़िऊंदअ थिअ, तूह रहअ भुखअ-नचिशअ तेऊ लै लेरा लांदअ लागी, पर ज़ेतरी सह मूंअ निं तूह उझ़ुअ खल़अ संघा लागअ रोटी खांदअ!”
22दाबेदै दैनअ ज़बाब, “हाँ, ज़ेभै तैणीं शोहरू ज़िऊंदअ थिअ, हुंह रहअ भुखअ-नचिशअ लेरा लांदअ लागी। मंऐं ज़ाणअ झ़ाणीं बिधाता मुल्है झींण फिरे अर तेऊ शोहरू मरनै नांईं दैए। 23ऐबै गअ सह मरी, तै ऐबै किल्है रहूं हुंह ब्रतू? हुंह निं तेऊ शोहरू भिई ज़िऊंदै करी सकदअ! ज़िधा लै सह डेऊअ, एकी धैल़ै डेऊणअ हुंह बी तिधी तेऊ सेटा पर सह निं ऐबै मुंह सेटा बापस फिरदअ।”
सुलैमानो ज़ल्म
24तेखअ हैऊई-बतैऊई दाबेदै आपणीं लाल़ी बेतशेबा, संघा डेऊअ तैहा सेटा भिई संघा हुई सह सुंदी अर बादा का हुअ तेसो एक शोहरू, दाबेदै डाहअ तेऊ शोहरू नाअं सुलैमान। तेऊ शोहरू लै झ़ूरअ बिधाता खास्सअ 25अर बिधाता किअ नातान गूरा लै हुकम कि तेऊ शोहरू नाअं डाहै जदिदयाह, किल्हैकि बिधाता झ़ूरा त तेऊ लै खास्सअ।
दाबेदै किअ रबाह नगरी कबज़अ
(1 इतिहास 20:1-3)
26एसी त जोआब रबाह नगरी जुधा लै आपणीं सैना संघी टेक्की रहअ द। सह थिई अमोनीए राज़धानी अर तेता त जोआब तेतरी ज़ितणैं ई आल़अ। 27जोआबै छ़ाडै दाबेदा सेटा जुधे हाल खोज़णा लै दूत, “मंऐं आसा रबाह नगरी लै गोट दैनअ द, ज़िधा का नगरी लै पाणीं डेओआ सह ज़ैगा हेरी मंऐं आपणैं कबज़ै करी। 28ऐबै करै झाल़ै आपणीं बाकी सैना संघा कर नगरी मारी तेथ कबज़अ। हुंह निं च़ाहंदअ कि ऐहा नगरी दी मेरै नाओंऐं ज़ीत होए।” 29दाबेदै झाल़ी आपणीं सैना संघा डेऊअ रबाह नगरी लै, तिंयां पल़ै नगरी मारदै चुटी संघा किअ तेथ कबज़अ। 30तेखअ काढअ तिन्नैं अमोनी राज़ै मोलके बडी मुहुर्तीए मुंडा का तेऊओ मुगट उंधै सह थिअ तोली करै कोई पैंईंती किलू सुन्नेंओ अर तेथ ती किम्मती मणीं लागी दी। दाबेदै लाई तेता का तिंयां मणीं आपणैं मुगटा दी संघा लुटी तिन्नैं सह नगरी पठी। 31तिधी बस्सै दै लोगा का बझ़ैल़अ दाबेदै नगरी फेरो गहल़ आरै, कदाल़ी अर खराल़ै करै ढोल़णैं। तेखअ डाहै तिंयां ईंटा बणाणें कामां लाई। अमोनी लोगे होरी नगरी संघै बी किअ तेऊ इहअ ई। तेखअ आऐ तिंयां एरुशलेम नगरी लै बापस फिरी।
Currently Selected:
2 शमूएल 12: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
