2 शमूएल 10
10
दाबेद ज़ितअ अमोनी अर अरामी का
(1 इतिहास 19:1-19)
1पिछ़ू मूंअ अमोनी लोगो राज़अ नहाश अर आजू बणअ तेऊओ शोहरू हनून तेऊए ज़ैगा राज़अ। 2दाबेदै सोठअ इहअ कि ज़िहअ मुल्है नहाश झ़ूरा त, तिहअ ई रहणअ आजू मुंह संघै तेऊओ शोहरू हनून बी। दाबेदै छ़ाडै आपणैं कार-करिंदै हनूना सेटा लै अमोनी देशै चिंजदै कि दाबेदा हुअ राज़ै नहाशा मरनैओ खास्सअ दुख। 3पर अमोनी राज़े कार-करिंदै लागै हनूना लै इहअ बोल्दै, “तूह कै सोठा, आपणैं कार-करिंदै चिंजदै छ़ाडी कै दाबेदै तेरै बाबो अदर किअ? ज़ाथी निं किछ़! तेऊ आसा ईंयां म्हारी नगरी लै भेख लंदै छ़ाडै दै ताकि बादा का सह एथ कबज़अ करी सके!”
4हनूनै किऐ दाबेदे कार-करिंदै कैद संघा डाही तिन्नें एकी बाखा दाल़्ही-मुछ़ा काटी अर पिछ़ू बाखा गूल़ी पाऐ तिन्नें च़ोल़ै अर ज़ांघिऐ दी छिझै पाई नांगै! तेखअ दैनअ तिन्नां डेऊणैं! 5तिन्नें निस्सअ शरमैं आपणैं देशा अर घअरा बाखा हांढुई बी। ज़ांऊं ऐहा गल्लो थोघ राज़ै दाबेदा का लागअ कि इहअ हुअ, तेऊ छ़ाडै जेरिहो नगरी तैणीं तिन्नां लै समाद पजैल़ै, “ज़ेभै तैणीं थारी दाल़्ही निं बझ़े, तेभै तैणीं रहै तम्हैं इधी जेरिहो नगरी अर तेता बाद लागै तम्हैं एछदै।”
6अमोनी का गअ ज़ाण्हुंई कि ऐबै पाई तिन्नैं दाबेदा संघै ज़ीद, तिन्नें शदाऊऐ बेथ-रहोब अर सोबा नगरी का बिह हज़ार अरामी#10:6 अरामी सिरीया सपाही, तोब नगरी का बारा हज़ार अर माकाहा नगरीओ राज़अ आअ एक हज़ार सपाही संघा लई। 7दाबेदा का गअ इना गल्लो थोघ लागी अर तेऊ छ़ाडअ तिन्नें मकाबलै लै जोआब सारी सैना संघी। 8अमोनी निखल़ै जुधा लै बागै संघा बान्हीं आपणीं राज़धानी रबाह नगरीए प्रऊल़ी आजू जुधा लै लगैग अर सोबा अर रहोब नगरीए अरामी बान्हीं आपणीं लगैगा आजू खुल्ही-बिरली सऊंई ज़ैगा। तोब अर माकाहा नगरीए सैना बी थिई तिन्नां का ज़ुदी ज़ेही लगैग बान्हीं दी।
9ज़ांऊं जोआबै भाल़अ कि तिन्नां आजू-पिछ़ू आसा दुही बाखा दुशमणे सैने लगैग, जोआबै छ़ांटै इज़राईली मांझ़ै खास-खास जोधै संघा बान्हीं तिन्नें लगैग अरामी बाखा स्मोहरी। 10बाकी सैनो दलपति बणाअं तेऊ आपणअ भाई अबीशै अर तिन्नें लगैग लाई तेऊ अमोनी बाखा। 11जोआबै बोलअ अबीशै लै, “ज़ै अरामी का हुंह हारदअ शुझिए, तै लोल़ी तूह मेरी मज़त करदअ आअ, अर ज़ै मुखा अमोनी का तूह हारदअ शुझिए, तै आअ हुंह तेरी मज़त करदअ कि तेरअ बल बढे। 12तूह डाहै हैअ, हिम्मत निं हारी! हाम्हां करनअ आपणैं लोगा अर आपणैं परमेशरे नगरी लै पूरअ ज़ोर लाई जुध। आजू आसा बिधाते मरज़ी, तेऊ ज़िहअ करनअ होए हणअ सह तिहअ।”
13जोआब अर तेऊए सैना डेऊई अरामी संघै मकाबलै करना लै नेल़ अर अरामी ठुर्है तिन्नां सेटा का दूर! 14अमोनी भाल़अ कि अरामी गऐ जुधा का ठुर्ही, तिंयां बी ठुर्है अबीशै सम्हनै का पिछ़ू संघा पेठै नगरी भितरी। तेखअ आअ जोआब आपणीं सैना संघी बापस एरुशलेम नगरी लै फिरी।
15ज़ांऊं अरामी का ज़ाण्हुंअ कि तिंयां हारै इज़राईली का, तिन्नैं झाल़ी भिई आपणीं सारी सैना। 16राज़ै हदादेज़ेरै छ़ाडै दूत संघा शादै फरात दरैऊआ पार पुर्बा बाखा बस्सै दै अरामी, तिन्नैं बणाअं आपणअ सैनापति शबाक संघा पुजै हेलाम। सह थिअ राज़ै हदादेज़ेरो सैनापति।
17ज़ांऊं दाबेदा का इना सोभी गल्लो थोघ लागअ, तेऊ झाल़ी आपणीं इज़राईली सैना संघा डेऊअ जरदण पार टपी हेलाम। तिधी आई अरामी सैना लगैग बान्हीं दाबेदा संघै जुधा लै, 18पर इज़राईली खद्रेल़ै अरामी पिछ़ू। तधू पाऐ दाबेद अर तेऊए सैना अरामीए सात शौ रथ, च़ाल़्ही हज़ार शुंआर मारी अर तिन्नों सैनापति शबाक किअ इहअ ज़खमी कि सह मूंअ तिधी। 19ज़ेतरै राज़ै हदादेज़ेरे गलामी करा तै, ज़ांऊं तिन्नैं भाल़अ कि तिंयां हारै इज़राईली का, तिन्नैं किई तेखअ इज़राईली संघै मेल़-ज़ोल़े करार संघा लागै दाबेदे गलामी करदै। तेखअ डरै अरामी खास्सै संघा निं तिंयां अमोनीए मज़त करदै भिई आऐ।
Currently Selected:
2 शमूएल 10: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
