2 पतरास 2

झ़ुठै गूरू

1ज़िहै खास्सी साला पैहलै झ़ुठै गूर निखल़ै तै, तिहै ई निखल़णैं झ़ुठै गूरू तम्हां मांझ़ै। तिन्‍नां पाणै लोग झ़ुठी शिक्षा करै मसीहा दी विश्वास करनै का कबाता। तिन्‍नां झ़ुठी गूरू निं ईशू मसीहा आपणअ मालक मंदै ज़ुंणी तिंयां पापे शगती का आज़ाद किऐ। इहअ करै हणैं तिंयां आप्पू ई नभैऊशै बरैबाद। 2कई ज़ुंण ईशू मसीहा दी विश्वास करनैओ दखाअ करा। तिन्‍नां बी करनी कंज़री बाते नकल ज़िहअ तिन्‍नां झ़ुठी गूरूओ बभार आसा। होर लोग ज़ुंण विश्वासी निं आथी तिन्‍नां करनी सत्ते साबै ज़िन्दगी ज़िऊंणें बी निंदा।#रोम. 2:24; एज. 36:22

3ईंयां गूरू हणैं मांण करनै आल़ै, तिन्‍नां पाणै तम्हैं आपणीं बणाईं दी कथ्या खोज़ी कबाता ताकि तम्हां का तिन्‍नां ढब्बै भेटे। परमेशरै आसा खास्सी साला पैहलै हेरअ द इने बारै सोठी कि तेऊ दैणीं इना लै सज़ा अर सह आसा एता करना लै तैर। तेऊ करनै पाक्‍कै दी तिंयां बरैबाद।

4परमेशरै दैनी तिन्‍नां पापी स्वर्ग दूता लै तोही सज़ा ज़ुंणीं तेऊओ हुकम निं मनअ। तेऊ डाहै तिंयां शांघल़ी करै बान्हीं डुघी खाल़्ही न्हैरी जम्परी पाई। तिंयां रहणैं तैहा धैल़ी तैणीं तिधी ज़ेभै परमेशरा नसाफ करनअ। 5तम्हां का आसा इहअ बी थोघ कि ज़धू तिंयां लोग ज़ुंण खास्सी साला पैहलै रहा तै, तिन्‍नां निं परमेशरे डअर रही ती। परमेशरै निं तिन्‍नें कदुष्ट काम भाल़ै नां भाल़ै किऐ ज़ुंण तिंयां करदै तै लागै दै। पर तेऊ दैनी सारी पृथूई दी पाणीं करै प्रल़या करी तिन्‍नां लै सज़ा अर तिंयां सोभै डुबै तेथ। पर तेऊ बच़ाऊऐ आठ लोग ज़ेथ नूह बी त ज़ुंणी परमेशरा संघै धर्मीं हणैंओ प्रच़ार किअ त।#मूल. 6:5-8; 7:23

6तम्हां का इहअ बी आसा थोघ कि ज़ुंण सदोम अर अमोरा नगरी अर तेता नेल़ होरी नगरी रहा तै। तिंयां लोग तै हर रंगे कंज़रैई करै भर्हुऐ दै। परमेशरै ज़ाल़ै तिंयां आगी करै पठी ज़ेभै तैणीं छ़ार निं बणअ। तिंयां बणाऐं तेऊ तिन्‍नां मणछा लै चतैनगी कि तिन्‍नां मणछा लै किज़ै हणअ ज़ुंण परमेशरो हुकम नांईं मना।#जोह. 1:7; मूल. 19:24

7लूत ज़ुंण धर्मीं आसा त, सदोम नगरीओ बनाश करनै का आजी लअ तेऊ लै बोली कि ऐहा नगरी का डेऊ दूर अर इहअ करै बच़ाऊअ परमेशरै लूत। किल्हैकि सदोम नगरीए मणछ करा तै कदुष्ट काम अर तिंयां निं परमेशरे बधाने साबै ज़िन्दगी ज़िऊंदै तै।#मूल. 19:12-13,15

8लूत त धर्मीं मणछ, पर सह रहा त तिन्‍नां कदुष्ट मणछा जैंदरी धैल़, तेऊओ भलअ दिल हआ त तिन्‍नां बूरी गल्‍ला भाल़ी अर शूणीं दुखी। 9ईंयां सोभै गल्‍ला किई परमेशरै पैहलै जुगै हाम्हां का ऐहा गल्‍ला रहैऊंणा लै कि परमेशरा करनी ज़रूर तिन्‍नां लोगे फाज़त ज़ुंण धर्मीं ज़िन्दगी ज़िऊआ। पर कदुष्ट मणछ डाहणैं तेऊ सज़ा दैणा लै नसाफ हणें धैल़ी लै बच़ाऊई।

10परमेशरा दैणीं सोभी कदुष्ट मणछा लै सज़ा पर तेऊ दैणीं खासकर तिन्‍नां लै सज़ा ज़ुंण हर बारी तिहै कंज़रै काम करा ज़िहअ तिन्‍नों दिल च़ाहा, ज़ुंण इहअ निं च़ाहंदै कि प्रभू बी तिन्‍नां प्रैंदै हक डाहे अर ज़ुंण हठू अर घमंडी आसा। तिंयां करा स्वर्गे महान स्वर्ग दूते बी नथोघी निंदा! 11एही ता आसा स्वर्ग दूत तिन्‍नां दखाअ करनै आल़ै झ़ुठै गूरू का खास्सै बला आल़ै पर तज़ी बी निं तिंयां परमेशरा सम्हनै तिन्‍नें निंदा करदै अर नां दोश लांदै।

झ़ुठी गूरू आसा भ्रष्ट हुऐ दै

12ईंयां झ़ुठै गूरू करा बणें पशू ज़िहअ बभार ज़ुंण तिहअ करा ज़िहअ तिन्‍नें देही च़ाहा अर ज़ुंण पैईदा ई आसा एते तैणीं हुऐ दै कि तिंयां लोगा कैद करे अर मारी पाए। ज़ुंण गल्‍ला इना समझ़ निं एछदी तेता लै करा तिंयां निंदा। परमेशरा करनै ईंयां तिहै बरैबाद ज़िहै लोग बणें पशू मारा। 13ज़ुंण तिन्‍नैं ज़ुल्म किऐ, तेता लै आसा तिन्‍नों बरैबाद हणअ ई तिन्‍नों नांम। तिंयां च़ाहा धैल़ी दपहरै कंज़रैई करनी। तिंयां आसा तम्हां मांझ़ै दोश अर दाग। तिंयां रहा तम्हां संघै भोज़ खाई करै बी धोखै दैणा लै खुश। 14तिंयां च़ाहा हर बेटल़ी संघै कंझ़रनअ ज़ुंण बी तिन्‍नां का शुझिआ। तिंयां हआ हर बगत इहै पाप करने मोक्‍कै लोल़ै लागै दै। तिंयां पाआ तेऊ मणछा कबाता ज़ुंण मसीहा दी पाक्‍कअ विश्वास निं करदअ अर तिंयां कराऊआ तिन्‍नां का बी पाप। तिन्‍नों मांण निं कधि खतम हंदअ, परमेशरा दैणीं तिन्‍नां लै सज़ा। 15तिन्‍नैं आसा भलअ करनअ छ़ाडी हेरअ द अर तिंयां लागै तिहै ई पाप करदै ज़ुंण खास्सी साला पैहलै बोरे शोहरू बलाम गूरै किअ त, झ़ूरअ त ढब्बै पिछ़ू तिहअ ई काम करना लै ज़ुंण गलत थिअ।#गण. 22:5-7

16पर परमेशरै बझ़ैल़अ सह तेऊए गाधी करै तेऊए गलत कामां पिछ़ू नैरनै। एही ता निं गाधै गल्‍ला करी सकदै, पर ज़ांऊं बलाम तैहा प्रैंदै शुंआर हई राज़ै सेटा मिलदअ त च़ाल्‍लअ द, तैहा गाधी किई बलाम गूरा संघै मणछा ज़ेही गल्‍ला अर सह तैहा घल़ी रोक्‍कअ गलत काम करनै का।#गण. 22:26-31

17ईंयां झ़ुठै गूरू आसा एही बाऐ ज़िहै बृथा ज़ुंण शुक्‍की दी आसा। तिंयां आसा इहै बादल़ा ज़िहै ज़ुंण बाझ़ी बरशै बागरी करै दूर डेओआ। परमेशरै आसा तिन्‍नां लै एक ज़ैगा डाही दी ज़िधी घोर न्हैरअ आसा।

झ़ुठी गूरू पाआ लोगा कबाता

18ज़ांऊं तिंयां लोगा लै शिक्षा दैआ, तिंयां बोला घमंडी अर बृथा बोल। तिंयां बोला लोगा लै इहअ कि तिंयां सका तिहै नबिज़तै काम करी ज़ेही तिन्‍नें देही च़ाहा। तिंयां पाआ तिन्‍नां मणछा का पाप कराऊई भिई कबाता ज़ुंण अज़ी एभै एही बूरी ज़िन्दगी छ़ाडी मसीहा ईशू दी विश्वास किअ। 19तिंयां झ़ुठै गूरू बोला लोगा लै इहअ कि ज़िहअ तम्हैं च़ाहा तिहअ करना लै आसा तम्हैं आज़ाद। तिंयां आसा आप्पू ई गलामा ज़िहै किल्हैकि तिन्‍नों पापी सभाब करा तिन्‍नां पापी कामां करना लै मज़बूर। तम्हैं हआ तेते गलाम ज़ुंण च़ीज़ तम्हां काबू करा।

20लोग हआ संसारे बूरी गल्‍ला का दूर ज़ेभै तिंयां ईशू मसीहा आपणअ प्रभू अर उद्धार करनै आल़अ मना। पर ऐबै पल़ै तिंयां भिई इना कदुष्ट कामां दी अर ईंयां कदुष्ट काम करा तिन्‍नां काबू। ऐबै हुई खिरी तिन्‍नें एही हालत कि तिन्‍नैं हेरअ मसीहा छ़ाडी अर ज़िहै तिंयां विश्वास करनै का आजी तै, तिन्‍नें हुई तेता का बी बूरी दशा। 21तिन्‍नां लै हणीं ती अह गल्‍ल भली कि तिन्‍नां का ऐहा गल्‍लो थोघ ई निं हंदअ कि धर्में बाता केही ज़िन्दगी लागा ज़िऊंणीं। पर परमेशरा दैणीं तिन्‍नां लै होर बी खास्सी सज़ा किल्हैकि तिन्‍नैं निं परमेशरे तिंयां पबित्र गल्‍ला मनी ज़ुंण हाम्हैं तिन्‍नां सेटा पजैल़ी।

22ज़ेऊ साबै तिंयां बभार करा, तेऊ साबै आसा गल्‍ल शुची ज़िहअ लोग बोला, “तिंयां आसा कुक्‍करा ज़िहै ज़ुंण हुकरी करै तेता च़ाटदअ भिई डेओआ” अर “तिंयां आसा सुंगरा ज़िहै ज़ुंण न्हैऊई-धोहुई बी च़िक्‍करै ई जैंदरा लै डेओआ।”#सैणीं. 26:11

Currently Selected:

2 पतरास 2: OSJ

Highlight

Copy

Compare