2 राज़ै 3
3
इज़राईला दी राज़अ जेहोराम
1यहूदा मुल्खै थिअ राज़ै जहोशापातो राज़, तेऊए राज़ा दी ठार्हुई साला बणअ अहाब राज़ैओ शोहरू जोराम इज़राईल मुल्खो राज़अ। तेऊ किअ सामरी नगरी का बारा साला तैणीं राज़। 2तेऊ बी किअ तिहअ ई ज़ेता बिधाता नांईं च़ाहंदअ त कि सह करे। पर सह नांईं त आपणैं ईज-बाब अहाब अर जज़बेला सान बूरअ आथी। ज़ुंण बाल देअए डौंड पूज़णा लै तेऊए बाबै तै खल़ै किऐ दै, तिंयां काढै तेऊ पोर्ही। 3पर तज़ी बी रहअ सह तिन्नां तिहै पाप करदअ लागी ज़ुंण तेऊ का आजी नबाते शोहरू जरोबामै किऐ तै अर इज़राईली का बी कराऊअ पाप।
इज़राईल अर मोआब देशो जुध
4मोआब देशे राज़ै मेशा का थिई खास्सी भेडा-बाकरी डाही दी। सह दैआ त इज़राईल देशे राज़ै लै हर साल एक लाख होछ़ै मिम्मूं अर एक लाख गाभे ऊन कारअ। 5ज़ांऊं इज़राईलो राज़अ अहाब मूंअ, तेखअ किअ मोआब देशे राज़ै इज़राईला लै द्रोह। 6तिन्नां ई धैल़ै डेऊअ राज़अ जोराम राज़धानी सामरी का संघा झाल़ी सारै इज़राईला का सैना। 7तेऊ दैनअ यहूदे राज़ै जहोशापाता लै इहअ समाद, “मोआब देशे राज़ै किअ मुल्है द्रोह, तेऊ संघै लाअ मंऐं जुध छ़ेल़ी, तूह बी च़ाल्लअ मुंह संघै कि नांईं?”
राज़ै जहोशापातै दैनअ ज़बाब, “हुंह आसा ताह बाखा अर मेरै घोल़ै अर मेरी सैना बी आसा ताह बाखा। 8पर तूह खोज़ मुखा इहअ कि हाम्हां जुधा लै कहा बाता डेऊणअ?”
जोरामै खोज़अ, “हाम्हां डेऊणअ एदोम रेगीस्ताना बाती।”
9तेखअ डेऊऐ इज़राईलो राज़अ जोराम, यहूदो राज़अ अर एदोम देशो राज़अ चअन ज़ण्हैं आपणीं सैना संघी मोआब देशा संघै जुधा लै। ज़ांऊं तिन्नां हांढदी-हांढदी सात धैल़ै हुऐ, तिन्नां का निं सैना लै अर तिन्नां संघै पशू लै पाणीं झुटणा लै रहअ। 10तेखअ बोलअ इज़राईले राज़ै जोरामै, “अह हुई ऐबै आफ़त! बिधाता किऐ ज़िहै हाम्हैं चअन राज़ै एते तैणीं कठा कि मोआबी हाम्हां कैद करे!”
11पर जहोशापात राज़ै बोलअ, “इधी कुंण बिधातो गूर निं आथी ज़हा का हाम्हैं पुछ़ी सके?”
इज़राईल मुल्खे राज़े एकी दरोगै बोलअ इहअ, “एक आसा इधी, शापातो शोहरू एलिशा। सह करा त एलियाह गूरे च़ाकरी।”
12जहोशापातै बोलअ, “सह आसा असली गूर, तेऊ हेरनअ हाम्हां का खोज़ी कि बिधाता किज़ै च़ाहा।” तेखअ डेऊऐ इज़राईलो राज़अ जोराम, जहोशापात अर एदोम देशो राज़अ तिंयां चिहै ज़ण्हैं एलिशा सेटा।
13एलिशा बोलअ इज़राईले राज़ै जोरामा लै, “तूह किल्है आअ मुंह सेटा? तूह डेऊ तिन्नां गूरा सेटा ज़हा पुछ़दै तेरै ईज-बाब डेओआ तै।”
जोरामै बोलअ इहअ, “आरा इहअ निं बोलै! सह आसा बिधाता ज़ुंणीं हाम्हैं चअन राज़ै एते तैणीं किऐ कठा कि मोआबी हाम्हां कैद करे।”
14एलिशा बोलअ, “स्वर्गे सारी सैने मालक बिधाता ज़हा का सारअ बल आसा, हुंह करा तेऊए च़ाकरी, हुंह खाआ तेऊए सोह, ज़ै मेरै दिलै ताह संघै ज़ुल़ै दै यहूदे राज़ै जहोशापाता लै अदर निं हंदअ, तै निं मुंह ताह बाखा भाल़णअ बी आथी त! 15ऐबै आणा मुंह सेटा लै कुंण इहअ मणछ ज़ुंण राग-बाज़ बाज़ी ज़ाणा।”
तिन्नैं आणअ तिहअ मणछ लोल़ी ज़ांऊं सह राग-बाज़ बाज़दअ लागअ, तेखअ आअ बिधातो बल एलिशा लै। 16एलिशा बोलअ, “बिधाता बोला तम्हां लै इहअ, ‘एऊ नाल़ै ओरी-पोरी डाहा सारै दी कोफरी खण्हीं। 17थारी आछी सम्हनै हणअ इहअ कि नां बागरी लागणीं अर नां सरग हणअ, तज़ी बी हणअ तम्हां अर थारै पशू लै एऊ नाल़ै एतरअ पाणीं कि तम्हैं निं झुटी-झुटी मुक्कणैं।’ 18इहअ करनअ आसा बिधाता लै एक माल़ी ज़ेही गल्ल, बिधाता दैणीं तम्हां लै मोआबी का ज़ीत बी। 19तिन्नें सोभी खास-खास बधिया-बधिया नगरीओ करै तम्हैं बनाश। तम्हैं पाऐ तिन्नें फल़ा दैणैं आल़ै डाल़ा-बूटा छ़ांबी, तिन्नें पाणींए सोभी सोबल़ा करै बंद संघा डाहै तिन्नें रज़दै-पज़दै खेचै गल़ू-पात्थर शोटी बरैबाद करी।”
20दुजै धैल़ै दोत्ती नाज़ बल़ी करने बेला बगी एदोम देशा बाखा पाणींए गाड अर तैहा ज़ैगा भर्हुअ सारै दी पाणीं।
21ज़ांऊं मोआबी का थोघ लागअ कि राज़ै आऐ तिन्नां संघै जुधा लै, तिन्नां मांझ़ै होछ़ै का प्रोढै तैणीं ज़ेतरै जुध ज़ाणा तै करी, तिंयां हुऐ कठा संघा खल़्हुऐ आपणीं सिऊंआं सेटा। 22ज़ांऊं दोत्ती तिंयां उझ़ुऐ, सुरज़ो धुप्पअ पल़अ तेऊ पाणीं प्रैंदै इहअ कि मोआबी का शुझुअ तैहा गाडो पाणीं लोधल़ै ज़िहअ लाल। 23तिंयां लागै आप्पू मांझ़ै बोल्दै, “लै अह आसा लोधल़अ! चिई राज़े सैना झ़ाणीं आप्पू मांझ़ै च़िखुऐ होए संघा पाऐ एक-दुजै मारी! च़ाल्ला हाम्हां डेऊणअ मोआबीए डेरै लुटदै!”
24पर ज़ांऊं तिंयां चिई राज़े डेरै नेल़ पुजै, इज़राईली पल़ै तिन्नां मारदै चुटी। मोआबी ठुर्है तिधा का बापस अर इज़राईली किअ तिन्नों पिछ़अ अर तिंयां पुजै तिन्नां मारदी-मारदी तिन्नें मोआब देशै। 25तिधी पुजी किई तिन्नें नगरी बरैबाद, ज़ांऊं इज़राईली तिन्नें रज़दै-पज़दै खेचा बाती डेऊऐ, तिन्नैं डाहै सोभी तेथ गल़ू-पात्थर शोटी। तिन्नें पाणींए कुहै अर बाऐ बी डाही तिन्नैं बुदरी, फल़ा दैणैं आल़ै सोभ डाल़-बूट डाहै तिन्नैं छाम्बी। खिरी बच़ी मोआबीए राज़धानी कीर-हेरेस नगरी अर तेथ बी दैनअ तिन्नैं फेर-फिरदअ गोट संघा शोटै तेता लै फर्णैक्की करै पात्थर।
26ज़ांऊं मोआबी का ज़ाण्हुंअ कि तिंयां च़ाल्लै जुध हारी! मोआबी राज़ै निंयैं आप्पू संघै सात शौ तलबारा आल़ै शूर-बीर संघा लागअ एदोम सैने लगैगा खद्रेल़दअ कि एदोम देशे राज़ै सेटा पुजे पर सह निं इहअ करी सकअ। 27तेखअ तेऊओ ज़ुंण ज़ेठअ शोहरू तेऊए ज़ैगा आजू राज़अ बणनैं आल़अ थिअ, सह किअ तेऊ नगरीए गहल़ा प्रैंदै हूम बल़ी। तेता करै डरै इज़राईली अर तिंयां हटै तैहा नगरी का पिछ़ू संघा पुजै आपणैं देशै बापस फिरी।
Currently Selected:
2 राज़ै 3: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
