2 इतिहास 2
2
बिधाता लै भबन बणाणें तैरी
(1 राज़ै 5:1-18)
1राज़ै सुलैमानै सोठअ इहअ कि तेऊ बणाणअं बिधाता लै एक भबन अर आप्पू लै एक मैहल। 2सुलैमानै डाहै सत्तर हज़ार मज़दूर काठ-पात्थरा ढोंदै बगारू लाई। अश्शी हज़ार मणछ डाहै धारा बाखे मुल्खै काठा काढदै लाई अर तिन्नां सोभी प्रैंदै डाहै चअन हज़ार छ़ह शौ मेट।
3राज़ै सुलैमानै दैनअ सूर देशे राज़ै हिरामा लै समाद, “तूह दै मुल्है बी केल़ुईए काठ मोलै ज़िहै तंऐं मेरै बाब राज़ै दाबेदा लै तधू दैनै तै ज़धू सह आपणैं मैहला बणाऊंदअ त लागअ द। 4मंऐं आसा लाअ द आपणैं परमेशर बिधाता लै भबन बणाईं। अह हणीं पबित्र ज़ैगा तिधी एछणैं मेरै लोग इज़राईले परमेशर बिधाता सेटा माथै टेक्कदै, धूप ज़ाल़दै, खुशबूदार मसालै, भोज़न छ़ाडी पूज़ा-गाज़ा करदै। तिधी करनअ धैल़ दोत्ती-उडै, बशैघे धैल़ी, पुनूंईए धैल़ी अर होरी तिह-थैरे धैल़ी बिधाता लै हूम। म्हारै परमेशर बिधाता आसा हुकम किअ द कि हाम्हैं लोल़ी सदा इहअ ई करदै रहै। 5अह हणअ सोभी का महान भबन किल्हैकि म्हारअ परमेशर बिधाता आसा सोभी देअआ का महान।
6“असली दी निं बिधाता लै घअर कोहै बणाईं सकदअ किल्हैकि तेऊ रहणा लै आसा सारअ भ्रमंड बी थोल़अ! मंऐं लाअ सिधअ एतरअ करी कि हुंह बणाऊं तेऊ लै भबन ज़िधी हाम्हैं तेऊ लै बल़ीदान करी सके। 7तूह छ़ाड मुंह सेटा इहै ज़ाण-प्रबीण आदमी ज़ुंण सुन्नैं, च़ंदी, कांस्सै अर लोहै दी खेल़्तर पाई सके अर निलै, बैंज़णीं अर इहै बूणती करनै आल़ै ज़ुंण लाला झिकल़ै दी खेल़्तर पाई सके। तिन्नां करनअ यहूदा अर एरुशलेम नगरीए तिन्नां कारीगीरा संघै काम ज़ुंण मेरै बाब राज़ै दाबेदै आसा छ़ांटै दै। 8मुखा आसा थोघ कि तेरै आदमी आसा गरान-पछान करना लै सज़ाण अर मशूर। तूह दै मुल्है लाबानोन बणां का केल़ुई, कैलीए अर च़ंदने काठ काढी। तेरै तिन्नां आदमी संघै कामां करना लै छ़ाडूं हुंह इधा का आपणैं आदमी बी, 9ताकि तिंयां खास्सै काठ काढी सके। किल्हैकि ज़ुंण भबन मुंह बिधाता लै बणाणअं, सह हणअ खास्सअ बडअ अर महान। 10तेरै गरानी-पछानी लै दैंऊं हुंह एक-बिह हज़ार कुंटल़ कणक अर बिह हज़ार ज़ौ, दूई शौ हज़ार बाटी दाखो रस अर एतरअ ई जैतूनो तेल।”
11सूर नगरीए राज़ै हिरामै दैनअ सुलैमाना लै च़िठी लिखी बापस ज़बाब, “हुंह ज़ाणा कि बिधाता झ़ूरा आपणीं परज़ा लै खास्सअ अर तैही बणाअं तेऊ तूह तिन्नां प्रैंदै राज़अ। 12हुंह करा इज़राईले परमेशर बिधातो शूकर ज़ुंणी सारअ भ्रमंड बणाअं! तेऊ दैनअ राज़ै दाबेदा लै इहअ अक्ली आल़अ शोहरू, ज़ुंण इहअ ज़ाण-प्रबीण अर समझ़कार आसा अर ज़ुंणीं बिधाता लै भबन अर आप्पू लै मैहल लाअ बणाईं। 13मंऐं लाअ ताह सेटा लै हिराम-आबी छ़ाडी। अह आसा ज़ाण-प्रबीण कारीगीर। 14एऊए ईज थिई इज़राईली मांझ़ै दान गोत्रा का अर बाब आसा एऊओ सूर देशा का। अह आसा सुन्नैं, च़ंदी, कांस्सै, लोहै, काठ अर किम्मती पात्थरो मशूर कारीगीर। एता का लाऊआ ज़ाणा अह हर लाल, निलै, बैंज़णीं हर रंगे झिकल़ै अर बाछे झिकल़ै दी बूणती अर खेल़्तर पाई। एऊ दै आपणैं सज़ाण कारीगीरा संघै अर तिन्नां संघै काम करनै ज़ुंण तेरै बाब राज़ै दाबेदा लै काम करा तै। 15मेरै मालक, ऐबै दै तूह तेता ज़ुंण तंऐं हाम्हां लै कणक, ज़ौ, दाखो रस अर जैतूनो तेल दैणअ किअ त। 16हाम्हैं दैऊंमै ताल्है लाबानोन बणां का ज़ेतरै ताह लोल़ी तेतरै केल़ुईए काठ काढी। तिंयां दैणैं हाम्हां बान्हीं करै समुंदरे पाणीं दी बहाऊई करै जोपा नगरी समुंदरे बाढै तैणीं पजैल़ी। तिधा का निंयैं तूह तिन्नां एरुशलेम नगरी लै।”
सुलैमान लागअ बिधाता लै भबन बणाऊंदअ
(1 राज़ै 6:1-38)
17राज़ै सुलैमानै किई तिन्नां सोभी परदेसी आदमीए तेही ई गणांई ज़ुंण इज़राईल देशै तै बस्सै दै ज़ेही तेऊए बाब राज़ै दाबेदै किई ती। तिंयां निखल़ै पठी एक लाख त्रुंजा हज़ार छ़ह शौ। 18तिन्नां मांझ़ै छ़ांटै तेऊ सत्तर हज़ार काठा बगारू, अश्शी हज़ार डाहै धारा पात्थरा काढदै लाई अर चअन हज़ार छ़ह शौ डाहै तिन्नां प्रैंदै मेट बणाईं कि तिंयां कामों धैन-खैल करे।
Currently Selected:
2 इतिहास 2: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
