2 इतिहास 15
15
राज़ै आसाहे खास काम
1थोल़ै धैल़ै बाद किई बिधाता ओदेदे शोहरू अजर्याह संघै गल्ला। 2अजर्याह डेऊअ तेभी आसाह राज़ै सेटा संघा खोज़अ इहअ, “आसाह राज़ैआ, यहूदा अर बिन्यामीन गोत्रे सोभी लोगो, मेरी गल्ला दी दैआ धैन! बिधाता रहणअ तेभै तैणीं तम्हां संघै अर तेऊ रहणअ तेभै तैणीं थारी मज़त करदै लागी ज़ेभै तैणीं तम्हैं तेऊ संघै अर ज़िहअ सह हुकम करा तिहअ करदै रहे। ज़ै तम्हैं तेऊ छ़ाडी दूर होए, तै डाहणैं तेऊ बी तम्हैं शोटी। 3एकी ज़मानै रहै इज़राईली खास्सी साला तैणीं, असली परमेशरा बाझ़ी, नां तिन्नां लै शिक्षा दैणैं आल़अ प्रोहत थिअ अर नां तिंयां बिधाते बधाना मंदै तै। 4पर ज़ांऊं आफ़त पल़ी तेखअ फिरै तिंयां इज़राईले परमेशर बिधाता बाखा अर तेखअ पल़ी तिन्नां बिधाते छोद। 5तिन्नां धैल़ै निं इज़राईला मांझ़ै कोहै राज्ज़ी आथी त किल्हैकि सारै देशै ती आफ़त अर सोभी जैंदरी त झाख पल़अ द। 6देश-देश तै एकी-दुजै बरैबाद करदै पल़ै दै। हर ज़ैगा तै एकी नगरीए लोग दुजी नगरी हारदै-मारदै लागै दै। सह हुअ इहअ करै कि बिधाता दैनअ तिन्नां प्रैंदै आफ़त पल़णै। 7पर तम्हैं डाहा हिम्मत अर हैअ निं चोल़ी। बिधाते साबै ज़िन्दगी ज़िऊंणेंओ भलअ फल जाणअ तम्हां भेटी।”
8बिधाता ज़ुंण गल्ला ओदेदे शोहरू अजर्याह गूरा का प्रगट किई ती, तेता शूणीं आई राज़ै आसाह होर बी हिम्मत। तेऊ किई यहूदा, बिन्यामीन अर एप्रैम धारा बाखे मुल्खै तिन्नां सोभी नगरी का मुहुर्ती पूज़ा ज़ेही च़िल़्हखरी च़िज़ा दूर। बिधाते बेदीए बी किई तेऊ भिई मराम्मत ज़ुंण बिधाते भबने खोल़ै थिई।
9एप्रैम, मनिश्शे अर शमौन गोत्र ज़ुंण यहूदा तै बस्सै दै, तिंयां बी हुऐ राज़ै आसाहे पक्षा लै। किल्हैकि तिन्नां का शुझुअ कि राज़ै आसाह संघै आसा बिधाता। आसाह किऐ यहूदा अर बिन्यामीन गोत्रा संघै तिंयां सोभै इज़राईली बी कठा। 10तिंयां हुऐ राज़ै आसाहे राज़ा दी पंद्रुई साला ज़ेठै राज़धानी एरुशलेम कठा। 11तैहा धैल़ी किअ तिन्नैं बिधाता लै तेता मांझ़ै सात शौ बल्द अर सात हज़ार भेडा-बाकरी बल़ीदान ज़ुंण डागै-चैणें हेल़्ही तिन्नैं लुटी ती आणी दी। 12तिन्नैं खाऐ सोभी सोह संघा किई एही करार कि हाम्हां करनी तत्त-दिला का आपणैं दादा-बाबे परमेशर बिधाते पूज़ा-गाज़ा। 13ज़ुंण बी तिन्नां मांझ़ै होछ़अ-प्रोढअ, मर्ध-बेटल़ी, इज़राईले परमेशर बिधाता नांईं मने, सह पाणअ हाम्हां मारी। 14तिधी आऐ दै सोभै लोग हुऐ तेता लै राज्ज़ी कि ज़िहै हाम्हैं सोह खाऐ, हाम्हां करनअ तिहअ ई। तेखअ किई तिन्नैं ज़ोरै-ज़ोरै बिधाते ज़ै-ज़ैकार संघा लागै नर्शिंगै बाज़दै। 15यहूदा मुल्खे सारी परज़ा ती खुश किल्हैकि तिन्नैं किई तधू तत्त-दिला का बिधाता संघै करार। बिधाता बी दैनी तेते बदल़ै तिन्नां लै बर्गत कि तिन्नां भेटअ तिन्नें सोभी दुशमणा का राम।
16राज़ै आसाह काढी आपणीं दादी माकाहा राज़ माए पदबी का पोर्ही किल्हैकि तैहा ती सह अशेरा देबीए च़िल़्हखरी मुहुर्ती बणाईं दी। राज़ै आसाह फाल़ी सह मुहुर्ती संघा पिशी भींन, संघा डाही किद्रोन नाल़ै दहई। 17तज़ी बी निं राज़अ आसाह यहूदा मुल्खा का इज़राईली मांझ़ै सोभी मुहुर्ती पूज़ा करने गान-स्ताना खतम करी सकअ। पर आप्पू रहअ सह आपणीं ज़िऊंदी ज़िता बिधाता लै शुचअ-पाक्कअ। 18ज़ुंण सुन्नअ-च़ंदी अर भांडै तेऊए बाब राज़ै अबियाह बिधाता लै थिऐ अर्पण किऐ दै, तिंयां डाहै तेऊ बिधाते भबनै। ज़ुंण च़िज़ा तेऊ आपणीं बाखा दैनी, तिंयां बी डाही बिधाते भबनै। 19राज़ै आसाहे राज़ा दी निं पैंईंती साला तैणीं कोही संघै जुध हुअ।
Currently Selected:
2 इतिहास 15: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
