2 इतिहास 12
12
मिसर देशै छ़ेल़अ यहूदा मुल्खा संघै जुध
(1 राज़ै 14:25)
1ज़िहअ ई रहबाम राज़अ बणअ, तेऊ अर तेऊए परज़ा इज़राईली छ़ाडअ बिधातो बधान मनणअ। 2रहबामे राज़ा दी पांज़ूई साला दैनी बिधाता तिन्नां लै सज़ा किल्हैकि तिन्नैं किअ विश्वास घात। बिधाता दैनअ इहअ हणैं कि मिसर देशो राज़अ शिशक आअ 3आपणैं बारा शौ रथ अर शाठ हज़ार घोल़े शुंआरा लई यहूदा मुल्खा संघै जुधा लै। होर तै लिबिया, कूश, सकोती संघी पैदल सपाही एतरै कि तिन्नां निं कुंण गणी सकदअ त। 4तेऊ किअ यहूदा मुल्खे कई गहल़ा आल़ी नगरी दी कबज़अ संघा पुजअ राज़धानी एरुशलेम।
5बिधातो गूर शमयाह डेऊअ रहबाम राज़ै अर यहूदी सैणैं सेटा लै ज़ुंण एरुशलेम नगरी तै कठा हुऐ दै। तेऊ बोलअ तिन्नां लै इहअ, “तम्हां लै बोला बिधाता इहअ, ‘तम्हैं छ़ाडअ हुंह अर ऐबै डाहै मंऐं तम्हैं शोटी कि तम्हैं राज़ै शिशके बशै पल़े।’”
6तेखअ पचताऐ राज़अ रहबाम अर इज़राईली सैणैं कि तिन्नें भलै हुअ पाप। तिन्नैं बोलअ तेखअ इहअ, “बिधाता किअ ठीक ई, हाम्हैं तै एता ई जोगी।”
7इहअ शूणीं बोलअ बिधाता शमयाह गूरा का भिई इहअ, “यहूदा मुल्खे परज़ा पचताऐ दिला का कि तिन्नें भलै हुअ पाप, तै निं मुंह ऐबै राज़ै शिशका तिन्नां पठी बरैबाद करनै दैणअ। एरुशलेम नगरी जाणी ऐबै मेरै रोश्शा का धख बच़ी, 8पर तज़ी बी करनअ राज़ै शिशका तिन्नां प्रैंदै राज़, तेखअ लागणअ तिन्नां का थोघ कि मेरी च़ाकरी करनै अर संसारे होरी राज़े च़ाकरी करनै दी किज़ै फरक आसा।”
9मिसर देशो राज़अ शिशक पुजअ राज़धानी एरुशलेम संघा लुटे राज़े मैहलै अर बिधाते भबने भढार। राज़ै सुलैमानै ज़ुंण सुन्नें ढाल़ा ती बणाईं दी, तिंयां निंईं तेऊ आप्पू संघा। 10तेते ज़ैगा बणाईं तेखअ राज़ै रहबामै तेही ई कांस्से ढाल़ा संघा डाही तिंयां पहरी अर भढारी का सभाल़ी ज़ुंण राज़ दरबारे प्रऊल़ी दी पहरी हआ तै। 11ज़ेभै बी राज़अ बिधाते भबना लै डेओआ त, तेभै-तेभै हांढा तै सपाही तिन्नां ढाल़ा च़की राज़ै संघै अर तेखअ डाहा तै तिन्नां भढारै डाही। 12ज़ांऊं राज़अ रहबाम बिधाता सेटा निंऊंअ फिरअ, तेखअ हुअ तेऊ का बिधातो कोप दूर अर इहअ करै बच़अ सह पठी बरैबाद हणैं का अर यहूदा मुल्खै बी आअ सधेर।
रहबामो राज़ अर मौत
13राज़ै रहबामै किअ राज़धानी एरुशलेम नगरी का यहूदा मुल्खै राज़ अर सह हुअ खास्सअ बलबान। ज़धू सह राज़अ बणअ, तधू ती तेऊए अमर कताल़ी साले अर एरुशलेम नगरी ज़ुंण बिधाता इज़राईलीए सोभी गोत्रा मांझ़ै आप्पू लै थिई छ़ांटी दी, तिधा का किअ तेऊ सतारा साला तैणीं यहूदा मुल्खै राज़। रहबामे ईज थिई नामाह अर सह थिई अमोन नगरी का। 14रहबामै किअ तिहअ काम ज़ेता बिधाता नांईं च़ाहंदअ त कि सह करे। नां तेऊ इहअ समझ़णें कोशिश किई कि बिधाता किज़ै च़ाहा।
15शुरू का खिरी तैणीं राज़ै रहबामै ज़िहै-ज़िहै काम किऐ, तिंयां आसा शमयाह गूर अर ईदू गूरे कताबा दी तेऊए खिंबा संघी लिखी डाहै दै। रहबाम अर इज़राईल मुल्खो राज़अ जरोबाम रहै सारी अमरा आप्पू मांझ़ै जुधा करदै लागी। 16खिरी मूंअ रहबाम संघा डाहअ सह दाबेदपूर नगरी तेऊए दादा-बाबा ज़िहअ दाबी अर तेऊओ शोहरू अबियाह बणअ आजू तेऊए ज़ैगा यहूदा मुल्खो राज़अ।
Currently Selected:
2 इतिहास 12: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
