1 तिमोथी 6

1ज़ेतरै विश्वासी गलामीए जूँआं दी आसा, तिन्‍नैं लोल़ी हर साबै आपणैं मालको अदर किअ, ताकि होर लोग म्हारी शिक्षा अर परमेशरा नकदरै निं समझ़े। 2ज़हा गलाम विश्वासीओ मालक बी विश्वासी आसा तिंयां निं आपणैं मालका एता पिछ़ू नकदरै समझ़ी कि तिंयां आसा हाम्हां ई ज़िहै विश्वासी, पर तिन्‍नां करनअ आपणैं मालका लै होर बी खास्सअ काम किल्हैकि तिन्‍नें ज़हा मालके तिंयां च़ाकरी करा तिंयां आसा तिन्‍नें विश्वासी भाई अर तिन्‍नां संघै लागा तिन्‍नां झ़ूरी करनी। ईंयां सोभै गल्‍ला खोज़ी कर सोभी विश्वासी समझ़ाऊई।

झ़ुठी शिक्षा अर धन-मायो मांण

3ज़ै कुंण झ़ुठी शिक्षा दैआ, अर ज़ुंण शुची शिक्षा प्रभू ईशू पबित्र ज़िन्दगी ज़िऊंणां लै आसा दैनी दी तिन्‍नां नांईं मंदअ, 4तै आसा सह घमंडी, अर तेऊ का निं किछ़ै समझ़ आथी, इहअ मणछ च़ाहा बृथा गल्‍ला अर कहा बैणे मतलब पिछ़ू झ़गल़अ करनअ। एता करै हआ हठ पैईदा अर खिरी हआ एकी-दुजै लै ज़ल़ण, फूट, निंदा, बूरै बैहम 5अर तिंयां रहा आप्पू मांझ़ै झ़घल़दै लागी अर तिन्‍नें अक्ल आसा भ्रष्ट गई दी हई, तिन्‍नां निं समझ़ पल़दी कि सत्त किज़ै आसा। तिंयां समझ़ा परमेशरे शिक्षा ढब्बै-धेल्‍लै खटणें बात।

6म्हारी असली कमाई आसा तेही ज़िन्दगी ज़िऊंणीं ज़ेता करै परमेशर खुश हआ अर ज़ेतरअ हाम्हां का आसा हाम्हैं आसा तेथै खुश। 7किल्हैकि नां हाम्हैं संसारै पैईदा हंदी किज़ै आणअ अर नां हाम्हैं मरी करै किज़ै संघा निंईं सकदै।#आयू. 1:21; भज. 49:17

8ज़ै हाम्हां का खाणां अर बान्हणां लै किज़ै आसा, एता ई दी रहणअ खुश।

9पर ज़ुंण सेठ हणअ च़ाहा तिंयां पल़ा छ़ेक्‍कै कई रंगे पाप करने धोखै दी अर तिंयां शाचा बणें ज़ीबा ज़िहै फाही दी। तिंयां च़ाहा एही गल्‍ला करनी ज़ुंण ऐडी अर खातरै आल़ी आसा। तिन्‍नें एही सोठ करा तिन्‍नों बनाश।#सैणीं. 15:27

10किल्हैकि ढब्बै-धेल्‍लै लै मांण आसा सोभी बूराईओ मूल़, कई लोगै छ़ाडअ सुलै-सुलै मसीहे बारै शिक्षा दी विश्वास करनअ किल्हैकि तिंयां च़ाहा ढब्बै, होर बी खास्सै ढब्बै अर तिंयां पल़ै कई साबै इहै दुखा दी ज़िहअ कुंण मणछ आप्पू तलबारा करै छ़िन्ह-बिन्ह करा।

तिमोथी लै खास तेऊए बारै सलाह

11पर तूह, तिमोथी, तूह आसा परमेशरो मणछ, तूह रहै इना एही गल्‍ला करनै का दूर। हर साबै करनी भलै करने कोशिश अर एही ज़िन्दगी ज़िऊ ज़ेता करै परमेशरो अदर हआ। मसीहा दी डाह भरोस्सअ अर होरी संघै डाह झ़ूरी। कठण बगता दी रहणअ पाक्‍कै अर लोगा संघै निं रोश्शा संघै गल्‍ला करनी। 12ज़ुंण तूह विश्वास करा तेही ज़िन्दगी ज़िऊंणां लै लाआ आपणअ पूरअ ज़ोर। सदा रहणैं आल़ी ज़िन्दगी लोल़ी ताह दी शुझुई, ऐहा गल्‍ला डाहै सदा आद कि परमेशरै आसा तूह आप्पू संघा रहणा लै शादअ द। तेरी तिंयां गल्‍ला आसा कई सैणैं शूणीं दी ज़धू तंऐं तिन्‍नां सम्हनै अह गल्‍ल बडी मज़बुती दी प्रगट किई ती कि तूह करा मसीहा दी विश्वास।

13हुंह दैआ ताल्है तेऊ परमेशर शाजत मनी ज़ुंण सोभी ज़ीबा लै ज़िन्दगी दैआ, तेऊ का आसा तेरै सोभी कामों थोघ। ईशू मसीहा का बी आसा तेरै सोभी कामों थोघ। ज़ुंणी पुंतिउस पिलातुसा सम्हनै प्रगट किअ कि सत्त किज़ै आसा। 14हुंह बोला ताल्है इहअ कि ऐबै कर तूह सोभै गल्‍ला तेही ई पूरी, ज़िहअ करना लै परमेशरै आसा ताल्है बोलअ द। ताकि मसीहा ईशूए फिरी एछणैं तैणीं ताल्है कुंण दोश नां लाए कि तंऐं किअ गलत।

15ऐहा गल्‍ला डाहै आद कि परमेशरा खोज़णीं ईशूए भिई फिरी एछणें साईत तैहा घल़ी आप्पै। परमेशरा आसा म्हारी सोठ अर समझ़ा का बागै! सह आसा एक्‍कै माहा राज़अ! सह करा सोभी प्रैंदै राज़ ज़ुंण होरी लोगा प्रैंदै राज़ करा।#भज. 47:2

16सह आसा एक्‍कै ज़ुंण सदा रहणअ ज़िऊंदअ। सह रहा स्वर्गै प्रैश्शै दी तेतो झ़ामण आसा इहअ खास्सअ कि तिधी तैणीं निं कोहै पुजी सकदअ! सह ई आसा ज़ुंण आझ़ तैणीं कोही निं हेरअ अर नां कुंण मणछ तेऊ भाल़ी सकदअ! हुंह च़ाहा इहअ कि तेऊओ अदर किअ अर तेऊओ राज़ अर शगती लोल़ी सदा रही! एवमस्तू#1 तिम. 1:17

17एऊ संसारे सेठा लै बोल इहअ कि घमंड निं करा अर नां आपणीं धन-माया दी डाहा भरोस्सअ ज़ुंण थोल़ी घल़ी लै आसा, पर परमेशरा दी डाहा आशा ज़ुंण म्हारी ज़रुरतीए सोभै गल्‍ला खुल्है हाथै दैआ ताकि हाम्हैं तिन्‍नां करै नंद करी सके।#भज. 62:10

18तिन्‍नां लै बोल कि भलअ करा, खास्सै भलै काम करा, लोगा लै बांडा खुल्है हाथै। 19इहअ करी करनै तिन्‍नां आपणैं भलै काम भढारा ज़िहै आप्पू लै कठा ज़ुंण तिन्‍नां लै आजू स्वर्गा लै पाक्‍की आथरी ज़िहै हणैं अर शुची ज़िन्दगी हणीं तिन्‍नें आप्पू लै कमाई ज़ुंण सदा लै आसा।

विश्वासे फाज़त

20तिमोथी, एऊ शुचै खुशीए समादा खोज़ सोभी का शुचअ-पाक्‍कअ रही, ज़ुंण ताल्है ईशू आसा दैनअ द। तिन्‍नां मणछा का रहअ दूर ज़ुंण एही नथोघी गल्‍ला डाहा लाई ज़ेते परमेशरा ज़रुरत निं हंदी। तिन्‍नां मणछा का बी रहअ दूर ज़ुंण इहअ बोला कि तिन्‍नां का आसा शुचअ ज्ञैन पर ज़ुंण तिंयां बोला सह आसा तिन्‍नां गल्‍ला का उंबल़ी ज़ुंण हाम्हैं सखाऊआ। 21कई लोगै मनअ अह झ़ुठअ ज्ञैन अर तिन्‍नैं छ़ाडअ मसीहे शिक्षा दी विश्वास करनअ।

हुंह करा प्राथणां कि तम्हां लै लोल़ी परमेशरे झींण सदा रही।

Currently Selected:

1 तिमोथी 6: OSJ

Highlight

Copy

Compare