1 शमूएल 6
6
करारो मणशू दैनअ बापस पजैल़ी
1बिधाते करारो मणशू रहअ पलिश्ती देशै साता भिन्नैं तैणीं। 2तेखअ शादै पलिश्ती आपणैं देअए पज़ैरै अर मणशाण झ़ैऊंणै आल़ै संघा पुछ़अ तिन्नां का, “बिधाते करारे मणशूओ हाम्हां किज़ै करनअ? हाम्हां का खोज़ा कि अह एते आपणीं ज़ैगा केऊ साबै पजैल़णअ अर एते प्राश्त करना लै किज़ै लागणअ दैणअ?”
3तिन्नैं बोलअ इहअ, “ज़ै तम्हैं इज़राईलीए देअओ करारो मणशू बापस छ़ाडे, तेता संघै लऐ मणशू इधा लै आणने पापो प्राश्त करना लै दोश बल़ी ज़रूर दैई। इहअ करै जाणैं तम्हैं बमारी का नरोगै हई। तेखअ जाणअ तम्हां का थोघ लागी कि इज़राईले देअऐ तम्हां लै एही घोर आफ़त किल्है पाई।”
4पलिश्ती पुछ़अ इहअ, “हाम्हां दोश बल़ी लै किज़ै लागणअ दैणअ?”
तिन्नैं बोलअ इहअ, “तम्हैं निंयैं पापे प्राश्त करना लै सुन्नें पांज़ गिल्टी अर पांज़ मुश्शै हरेकी पलिश्ती राज़े नाओंऐं एक-एक। किल्हैकि सारी परज़ा अर सोभी पांज़ा राज़ै लै थिई एकी ई रंगे बमारी। 5इना गिल्टी अर मुश्शे मुहुर्ती बणाऐं तम्हैं ऐहा गल्ला रहैऊंणा लै कि तम्हैं करा इज़राईलीए देअओ अदर। तै झ़ाणीं सह तम्हां अर थारै देअआ लै पल़ी दी ऐहा आफ़ता दूर करे। 6ज़िहै मिसर देशे लोगा अर तिन्नों माहा राज़अ हठू थिऐ, तम्हैं निं तिहै हआ। ज़ांऊं इज़राईलीओ देअ तिन्नां लै सबक दैई मुक्कअ, तेखअ पल़अ त तिन्नां इज़राईली डेऊणैं दैनअ।
7“तम्हैं आणा एक कोरी गाड्डी, संघा छ़ांटा दूई गाऊई ज़ुंण लाहुदी सूई दी होए अर आझ़ तैणीं किधी निं ज़ुंडी, तिन्नां गाऊई ज़ुंडै तैहा गाड्डी दी पर तिन्नें होछ़ै बाछ़ू डाहै खुढै हूल़ी। 8तेखअ पाऐ एऊ बिधाते करारे मणशू तैहा गाड्डी दी, अर तम्हैं ज़ुंण पापो प्राश्त करना लै सुन्नें गिल्टी अर दोश बल़ी लै सुन्नें मुश्शै आसा बणाईं दी, तेता बी डाहै मणशू संघै गाड्डी दी। तेखअ छ़ेल़्है तैहा गाड्डी संघा दैऐ तेता आपणीं बाता आज़री डेऊणैं। 9तम्हैं रहै पिछ़ू का तैहा गाड्डी भाल़ै लागी कि सह गाड्डी बेथ-शमेश नगरी बाखा आपणैं मुल्खा लै डेऊई कि नांईं, तै समझ़ै तम्हैं इहअ कि अह आसा इज़राईलीओ देअ ज़ुंणीं हाम्हां लै घोर आफ़त पाई, ज़ै सह गाड्डी आपणैं मुल्खा बाखा नांईं डेओए, तै ज़ाणैं इहअ कि हाम्हैं पल़ै ऐहा घोर बमारी कुदरती अर अह आफ़त निं इज़राईलीए देअऐ पाई।”
10ज़ेही तिन्नैं पज़ैरै अर मणशाण झ़ैऊंणै आल़ै सलाह दैनी, पलिश्ती किअ तिहअ ई। तिन्नैं आणी दूई लाहुदी सूई दी गाऊई संघा ज़ुंडी तैहा कोरी गाड्डी दी अर तिन्नें होछ़ै बाछ़ू डाहै खुढै हूल़ी। 11तेखअ बशैल़अ तिन्नैं बिधाते करारो मणशू तैहा गाड्डी दी अर तेथ संघै तिंयां सुन्नें पांज़ गिल्टी अर तेथ संघै तिंयां पांज़ मुश्शे मुहुर्ती बी डाही एकी होरी दरोठू भितरी गाड्डी दी। 12तेखअ छ़ेल़्ही सह गाड्डी बेथ-शमेश नगरीए बाता अर तिंयां गाऊई रही तैहा ई बाता आज़री हांढदी लागी अर तिंयां निं तैहा बाता का ओर्ही नां पोर्ही फिरी। तिंयां पांज़ पलिश्ती राज़ै डेऊऐ तैहा गाड्डी पिछ़ू-पिछ़ू बेथ-शमेश नगरीए सिऊंआं तैणीं भाल़ै।
13बेथ-शमेश नगरीए लोग तै तेऊ खागै कणका लऊंदै लागै दै। ज़ांऊं तिंयां उझै बाखा भाल़अ, तिन्नां का शुझुअ करारो मणशू अर तेता भाल़ी हुऐ तिंयां खास्सै खुशी। 14-15सह गाड्डी आई बेथ-शमेश नगरीए ज़ैहसू नाओंए मणछे खेचा लै अर गाड्डी खल़्हुई तैहा ज़ैगा ज़िधी बडी टोल्ह आसा। तिधी झाल़्हुऐ नगरीए लोग अर तिन्नां संघै तै लेबी बी। लेबी डाहअ सह करारो मणशू गाड्डी का थुआल़ी तैहा बडी टोल्हा प्रैंदै अर तेता संघै ज़ुंण तिंयां सुन्नें गिल्टी अर सुन्नें मुश्शै बी डाही टोल्हा प्रैंदै। तिन्नां संघै थोल़ै आदमी फाल़ी सह गाड्डी झ़ुका लै अर तिंयां गाऊई किई बिधाता लै हूम बल़ी। तैहा ई धैल़ी किऐ बेथ-शमेश नगरीए लोगै बिधाता लै होर बी हूम अर मेल़-ज़ोल़े बल़ीदान।
16तिंयां पलिश्ती पांज़ राज़ै तै दूरा का इना सोभी गल्ला भाल़ै लागै दै कि किज़ै-किज़ै किअ अर तेखअ डेऊऐ तिंयां तैहा ई धैल़ी अक्रोन नगरी आपणैं घअरा लै बापस फिरी।
17सुन्नें ज़ुंण तिंयां पांज़ गिल्टी पलिश्ती बिधाते करारे मणशू निंणे पापे प्राश्त करना लै दोश बल़ी दैनी ती, तिंयां ती अशदोद, गाज़ा, अशकलोन, गात अर अक्रोन नगरी बाखा एक-एक। 18तिंयां सुन्नें मुश्शै बी थिऐ सोभी फेर-फिरदै उछ़टै गहल़ा आल़ी नगरी अर गराऊंआं बाखा एक-एक ज़ेथ तिन्नां पांज़ पलिश्ती प्रैंदै राज़ करनै आल़ैओ राज़ थिअ। बेथ-शमेश नगरी ज़ैहसूए खेचै सह बडी टोल्ह ज़ेथ प्रैंदै बिधाते करारो मणशू बशैल़अ त, सह टोल्ह आसा आझ़ तैणीं बी#6:18 आझ़ तैणीं बी ऐहा कताबा लिखणे ज़मानै तैणीं तिधी ऐहा गल्ले शाजत कि इहअ-इहअ हुअ त।
19बेथ-शमेश नगरीए मूंऐं तिधी सत्तर मणछ किल्हैकि तिन्नैं भाल़अ बिधाते करारो मणशू घुआल़ी करै भितरा का। तिधी पल़अ खास्सअ शोग किल्हैकि तिन्नां मांझ़ै पाऐ तिधी बिधाता एतरै खास्सै मणछ मारी।
करारो मणशू निंयं किर्यात-ज़रीम
20बेथ-शमेश नगरीए लोग लागै इहअ बोल्दै, “एऊ पबित्र परमेशर बिधाता नेल़ निं कोह डेऊई सकदअ! अह करारो मणशू हुअ हाम्हां किधी होर्ती डाहणअ पजैल़ी! पर अह किधा लै दैनअ?” 21तैही छ़ाडै तिन्नैं किर्यात-ज़रीम नगरी लै दूत, तिन्नां लै दैनअ इहअ समाद, “पलिश्ती हेरअ बिधाते करारो मणशू बापस दैई, तम्हैं लोल़ी उंधै आऐ संघा निंयैं एता आप्पू संघै।”
Currently Selected:
1 शमूएल 6: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
