1 शमूएल 18
18
दाबेद अर जोनाताने साथ
1शाऊल अर दाबेद मुक्कै गल्ला करी। तेखअ बणअ शाऊलो शोहरू जोनातान दाबेदो पाक्कअ साथी। सह झ़ूरा त दाबेदा लै खास्सअ ज़िहअ सह आप्पू लै झ़ूरा। 2तैहा धैल़ी पोर्ही निं शाऊलै दाबेद आपणैं बाबे घअरा लै छ़ाडअ संघा डाहअ बैल़ी आप्पू संघै तिधी। 3जोनातान झ़ूरा त दाबेदा लै खास्सअ अर तिन्नैं ती आप्पू मांझ़ै करार किई दी कि तिन्नां निं आपणीं साथ कधि चोल़णी। 4जोनातानै दैनअ आप्पू बान्हअ द च़ोल़अ खोल्ही करै दाबेदा लै। आपणीं तलबार, हीकबंद, कबाण अर कुछी च़ाम्भल़े गाची बी दैनी तेऊ दाबेदा लै। 5राज़अ शाऊल ज़िधा लै बी दाबेदा छ़ाडा त, दाबेद हआ त तेथ आपणीं अक्ली करै सफल। खिरी बणाअं शाऊलै आपणीं सैना दी अफसर। शाऊले कार-करिंदै अर सारी परज़ा ती दाबेदा करै खुश।
शाऊल लागअ दाबेदा संघै ज़ीद डाहंदअ
6ज़ांऊं दाबेद पलिश्ती गोलियाथा मारी करै बापस त एछदअ लागअ द, इज़राईले हर नगरी का आई खास्सी बेटल़ी राज़ै शाऊले सुआगता करदी। तिंयां ती डफली, बींन बाज़दी नाच़दी अर गिहा बोल्दी लागी दी। 7तिंयां ती नाच़दी-नाच़दी एही गिहा बोल्दी लागी दी,
“शाऊलै मारै हज़ार पर
दाबेदै मारै दस हज़ार दुशमण।”
8शाऊला निं अह गिह गम्मी अर तेऊ आई खास्सी रोश्शै। सह लागअ इहअ बोल्दअ, “दाबेदा लै बोला ईंयां दस हज़ार अर मुल्है बोला सिधअ एक हज़ार। ऐबै च़ाहा ईंयां एऊ इज़राईलो राज़अ बणाणअं!” 9इहअ करै डाही शाऊलै दिलै ई दिलै दाबेदा लै ज़ीद अर तधा बाद निं तेऊ दाबेदो भरोस्सअ किअ।
10दुजै धैल़ै गअ शाऊल राज़ै भिई भूत शाची, सह लागअ आपणैं मैहलै गूरा ज़िहअ मिट्टदअ। दाबेद लागअ पैहलै ई ज़िहअ तेऊ सेटा बींन बाज़दअ अर शाऊले हाथै त बर्छ़अ। 11शाऊलै सोठअ इहअ, “मुंह बाहणीं दाबेदा लै एही ज़ोरै बर्छ़ै कि अह लोल़ी एऊए पेटा बाती पोर्ही पिछ़ू भित्ती दी खुभअ।” तेऊ शोटअ दाबेदा बाखा लै दूई बारी बर्छ़अ पर दाबेदै किअ दुही बारी तेते सिधा का पोर्ही सिक्की आपणअ बच़ाअ।
12शाऊल त दाबेदा का डरअ द किल्हैकि बिधाता त तेऊ संघै अर शाऊला का थिअ बिधाता दूर गअ द हई। 13शाऊलै किअ दाबेद आप्पू का दूर, अर सह बणाअं तेऊ हज़ार सैना प्रैंदै सैनापति। दाबेद रहअ मानदारी दी आपणैं दला करै जुधा ज़ितदअ लागी। 14दाबेद अर तेऊए सैना हआ ती हर ज़ैगा तिन्नें अक्ली करै सफल किल्हैकि बिधाता त दाबेदा संघै। 15दाबेदा सफल हंदै भाल़ी डरअ शाऊल होर बी खास्सअ। 16पर यहूदा अर इज़राईले सारी परज़ा गम्मअ दाबेद होर बी खास्सअ किल्हैकि सह थिअ एक सफल सैनापति।
दाबेदो बैह हुअ शाऊले शोहरी संघै
17एकी धैल़ै बोलअ शाऊलै खिरी दाबेदा लै इहअ, “इधी भाल़ मेरी ज़ेठी शोहरी मिराब। मुंह करनअ ऐहा शोहरीओ बैह ताह संघै पर तेता लै रहैऊ मुखा तूह बिधाता बाखा जुध करी इहअ कि तूह आसा असली भरोस्सैमंद जोधअ।” शाऊलै सोठअ इहअ, “अह हेरनअ जुधा लै पलिश्ती मारी अर हुंह बी बच़अ तेखअ एऊ मारनै का।”
18दाबेदै दैनअ शाऊला लै ज़बाब, “माहा राज़अ, हुंह निं ताह सेटा किछ़ बी आथी कि हुंह तेरअ ज़ुआंईं बणू! अर नां इज़राईला दी मेरै खिंबे मशूरी आथी।” 19पर ज़ांऊं शाऊले शोहरी मिराबो दाबेदा संघै बैह करनैओ बगत आअ, तेऊ दैनी आपणीं शोहरी मेहोलाह नगरीए आद्रीएला लै बैही।
20शाऊले ती एक होर शोहरी, तैहा नाअं त मिकल, सह झ़ूरा ती दिलै ई दिलै दाबेदा लै खास्सी, ज़ांऊं ऐहा गल्लो थोघ शाऊला का लागअ, सह हुअ राज्ज़ी। 21शाऊलै सोठअ इहअ, “अह आसा दाबेदा पलिश्तीए हाथै मारनैओ होर मोक्कअ! मुंह बोल़णअ दाबेदा लै इहअ कि एभकी बारी करनअ मुंह आपणीं कान्हीं शोहरी संघै पाक्कै दी तेरअ बैह।” 22शाऊलै डाहै आपणैं कार-करिंदै शगरेऊई कि दाबेदा लै बोलै इहअ, “राज़अ आसा ताल्है खास्सअ खुश, अर हाम्हैं बी झ़ूरा ताल्है खास्सै, तूह मन्न राज़े गल्ल संघा कर तेऊए शोहरी संघै बैह।”
23राज़ै शाऊले कार-करिंदै बोली ईंयां गल्ला दाबेदा लै अर दाबेदै दैनअ तिन्नां लै ज़बाब, “राज़ैओ ज़ुआंईं हणअ आसा खास्सी बडी अदरे गल्ल अर मुंह ज़िहै गरीब अर बृथा मणछा लै आसा होर बी बडी गल्ल।”
24कार-करिंदै खोज़ी शाऊला का पठी गल्ला कि दाबेदै किज़ै बोलअ। 25शाऊलै किअ तिन्नां लै हुकम कि दाबेदा का खोज़ा इहअ, “शोहरीओ मोल ता निं राज़अ किछ़ै च़ाहंदअ पर सह च़ाहा इहअ कि तूह मार एक शौ पलिश्ती। तेखअ आण तिन्नें खतैर काटी गुप्त आंगे सोभी खलेफ़ल़ी मुंह सेटा लै। इहअ करै हणअ राज़ै शाऊलो आपणैं दुशमणा संघै बदल़अ पूरअ।” असली दी थिई शाऊले सोठ एही कि दाबेद लोल़ी पलिश्ती मारी पाअ। 26शाऊले कार-करिंदै खोज़ी दाबेदा का सारी गल्ला अर तेखअ हुअ दाबेद बी राज़ैओ ज़ुआंईं हणां लै राज्ज़ी। बैहा लै रहै तै थोल़ै धैल़ै, 27तैही डेऊऐ दाबेद अर तेऊए सैना संघा मारै दूई शौ पलिश्ती। तिन्नें खतैर काटी आणी तिन्नैं गुप्त आंगे दूई शौ खाल्हल़ी संघा दैनी राज़ै सेटा गणी करै कि सह ऐबै राज़ेए देई मिकला संघै बैह करी सके। तेखअ पल़अ शाऊला आपणीं कान्हीं शोहरीओ बैह दाबेदा संघै करनअ।
28शाऊला का गअ ज़ाण्हुंई कि दाबेदा संघै आसा बिधाता अर तेऊए शोहरी मिकल बी झ़ूरा तेऊ लै खास्सी। 29तेखअ डरअ शाऊल दाबेदा का होर बी खास्सअ अर तेखअ डाही तेऊ सारी अमरा तेऊ संघै ज़ीद।
30पलिश्ती सैना आई कई बारी जुधा लै, पर दाबेदा भेटी हर जुधा लै ज़ीत। तेऊ किअ शाऊले होरी कार-करिंदै का अक्ली करै काम अर इहअ करै हुअ दाबेद होर बी मशूर।
Currently Selected:
1 शमूएल 18: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
