1 राज़ै 19
19
एलियाह डेऊअ सीनाई धारा
1अहाब राज़ै खोज़ी आपणीं लाल़ी जज़बेला का सारी गल्ला कि एलियाह किज़ै किअ अर तेऊ किहै पाऐ बाल देअए गूर मारी। 2जज़बेलै छ़ाडअ एलियाह सेटा दूत इहअ समाद लई, “ज़िहअ तंऐं बाल देअए गूरा संघै किअ, ज़ै हुंह काल्ला ऐहा ई बेला तैणीं ताह संघै बी तिहअ ई निं करूं, तै लोल़ी मेरै देअऐ हुंह ई मारी पाई।” 3एऊ समादा शूणीं डरअ एलियाह खास्सअ, सह ठुर्हअ आपणीं ज़ान बच़ाऊई यहूदा मुल्खै बेर्शेबा नगरी लै।
आपणअ दास डाहअ तेऊ तिधी अर 4आप्पू डेऊअ दुजी सारी धैल़ी हांढी करै रेगीस्तानै संघा बेठअ एकी मधनूंए बूटा हेठै। सह लागअ तिधी इहअ बोली बिधाता का मौत मांगदअ, “हे बिधाता, ऐबै हुअ, मुल्है दै ऐबै मौत, हुंह निं आपणैं दादा-बाबा का राम्बल़अ आथी।”#जोह. 4:3
5सह रहअ तेऊ मधनूंए बूटा हेठै सुत्ती अर तेऊ आई तिधी घणीं नींज। तिधी आअ एक स्वर्ग दूत तेऊ छ़ुंहंअ सह आपणैं हाथा करै संघा बोलअ, “खल़अ उझ़ू संघा खा रोटी।” 6एलियाह लागअ फेर भाल़अ अर तेखअ शुझुअ तेऊ का आपणैं शरैहणा बाखा आसा पात्थरा प्रैंदै एकी सटेऊई दी रोटी अर झ़ारी दी आसा पाणीं। तेऊ रोटी खाई अर पाणीं झुटअ, तेखअ रहअ भिई तिधी सुत्ती। 7बिधातो स्वर्ग दूत आअ तेऊ सेटा दुजी बारी भिई संघा झ़ैऊअ इहअ बोली खल़अ, “खल़अ उझ़ू संघा खा, अज़ी आसा ताह आजू खास्सअ हांढणा लै।” 8एलियाह उझ़ुअ खल़अ तेखअ खाई तेऊ भिई रोटी अर पाणीं बी झुटअ। तेखअ आअ तेऊ इहअ बल कि सह रहअ च़ाल़्ही धैल़ी अर च़ाल़्ही राची हांढदअ लागी संघा पुजअ बिधाते पबित्र होरेब धारा। 9तिधी रहअ सह बैल़ी एकी डुआरै।
बिधाता बोलअ तेऊ लै इहअ, “एलियाह, तूह इधी किज़ै करा?”
10एलियाह दैनअ ज़बाब, “हे स्वर्गे सारी सैने मालक बिधाता, मंऐं किई कबल्ली तेरी ई च़ाकरी, पर इज़राईली परज़ा निं ताह संघै किई दी करारा लै शुचै-पाक्कै रहै! तिन्नैं पाई तेरी बेदी ढोल़ी अर तेरै गूर पाऐ मारी। हुंह आसा तेरअ एक्कै गूर बच़अ द अर ऐबै आसा तिंयां मेरै पिछ़ै पल़ै दै कि मुंह मारी पाए!”#रोम. 11:3
11बिधाता बोलअ एलियाह लै, “तूह डेऊ उझै धारे च़ुंडी लै संघा खल़्हू मुंह सेटा।”
बिधाता डेऊअ एलियाह आजू बाती पोर्ही अर तिधी हुई बिधाता करै एही ढिश-बागर कि सारी धार झ़ील़ी-काम्बी अर भिल़ी का लागै पात्थर अल़दै। पर बिधाता निं तैहा ढिश-बागरी जैंदरी आथी त। ढिश-बागरी बाद हुई तिधी बेघै बडी ज़ाज़री पर बिधाता निं तैहा ज़ाज़री दी बी आथी त। 12ज़ाज़री बाद शुझुई तिधी आग पर बिधाता निं तैहा आगी जैंदरी बी आथी त। आगी बाद शुण्हुंअ सुलै करै एक बोल।
13ज़ांऊं एलियाह का सह बोल शूणअ, तेऊ ढोपअ आपणअ मुंह च़ादरू करै संघा निखल़अ डुआरा का तेते मोहरै लै। तेखअ शुण्हुंअ तिधी भिई सुलै करै इहअ बोल, “एलियाह, तूह इधी करा किज़ै?”
14एलियाह दैनअ ज़बाब, “हे स्वर्गे सारी सैने मालक बिधाता, मंऐं किई कबल्ली तेरी ई च़ाकरी, पर इज़राईली परज़ा निं ताह संघै किई दी करारा लै शुचै-पाक्कै रहै! तिन्नैं पाई तेरी बेदी ढोल़ी अर तेरै गूर पाऐ मारी। हुंह आसा तेरअ एक्कै गूर बच़अ द अर ऐबै आसा तिंयां मेरै पिछ़ै पल़ै दै कि मुंह मारी पाए!”
15 #
2 राज़. 8:7-13
बिधाता बोलअ एलियाह लै, “तूह डेऊ दमिश्क नगरी नेल़ रेगीस्ताना लै फिरी, तेखअ डेओऐ नगरी लै संघा करै तिधी करै तूह हज़ाएले मुंडै तेल तरैल़ी करै अभिषेक कि सह हणअ आजू अराम देशो राज़अ अर 16इज़राईला दी आगलअ राज़अ हणां लै करै निमशीए शोहरू ज़ैऊओ अभिषेक अर ताह बाद मेरअ गूर हणअ आजू अबेल-मेहोल नगरीए शापातो शोहरू एलिशा तेऊओ बी करै अभिषेक।#2 राज़. 9:1-6 17तेखअ ज़ुंण हज़ाएले हाथै मरनै का बच़े, तिंयां पाणै ज़ैऊ मारी अर ज़ुंण ज़ैऊ का बच़े तिंयां पाणै एलिशा मारी। 18तैबी डाहणैं मुंह इज़राईली मांझ़ै सात हज़ार मणछ ज़िऊंदै ज़ुंणी बाल देअआ सेटा माथअ निं टेक्कअ अर तेते मुहुर्ती लै माख्खू निं दैनअ।”#रोम. 11:4
एलिशा छ़ांटअ गूर
19तेखअ लागअ एलियाह तिधा का हांढदअ, बाता भेटअ तेऊ शापातो शोहरू एलिशा खेचै हल़ा लांदअ लागअ द, तेऊ आजू तै गैरा ज़ोल़ी बल्द अर बार्हूई ज़ोल़ी संघै त सह सोभी का पिछ़ू आप्पू। एलियाह डेऊअ तेऊ सेटा संघा पाअ आपणअ च़ादरू तेऊ प्रैंदै। 20एलिशा छ़ाडै आपणैं हल़-बल्द तिधी संघा ठुर्हअ एलियाह गूरा पिछ़ू, एलिशा लागअ इहअ बोल्दअ, “हुंह एछूं आपणैं ईजा-बाबा लै मल़्हैची दैई, तेखअ एछूं हुंह ताह संघै।”
एलियाह दैनअ तेऊ लै ज़बाब, “डेऊ, मंऐं किधी रोक्कअ तूह?”
21एलिशा फिरअ बापस संघा किऐ एक ज़ोल़ी बल्द बल़ीदान, तेते हल़-जूँ पाऐ दहई अर शिखा दैनी लोगा लै खाणां लै अर ज़ांऊं तिंयां खाई मुक्कै, तेखअ डेऊअ एलिशा एलियाह गूरा संघै कि तेऊए च़ाकरी करे।
Currently Selected:
1 राज़ै 19: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
