1 राज़ै 17
17
बिधातो गूर एलियाह
1गलाद मुल्खे तिशबा नगरी का थिअ बिधातो एक गूर, तेऊ नाअं त एलियाह। तेऊ बोलअ अहाब राज़ै लै, “हुंह करा इज़राईले परमेशर बिधाते च़ाकरी ज़ुंण सदा ज़िऊंदअ आसा, हुंह खाआ तेऊ बिधाते सोह कि ज़ेभै तैणीं हुंह निं बोलूं, तेभै तैणीं नां एऊ देशै सरग हणअ अर नां ओश पल़णीं।”#याक. 5:17
2तेखअ बोलअ बिधाता आपणैं गूर एलियाह लै, 3“तूह डेऊ ऐहा ज़ैगा का दूर संघा रह जरदण नदी पुर्बा बाखा करीत नाओंए गाडा लुक्की। 4तैहा गाडो पाणीं हणअ ताल्है झुटणा लै अर मंऐं डाहअ काऊड़ै का बोली अर तिन्नां हेरनअ तिधी ताल्है खाणां लै पजैल़ी।”
5ज़िहअ बिधाता बोलअ, एलियाह किअ तिहअ ई संघा रहअ जरदण नदी पुर्बा बाखा करीत नाओंए गाडा लुक्की। 6सह करा त तैहा गाडो पाणीं झुटी अर काऊड़ै करा तै दोत्ती-उडै तेऊ लै रोटी अर शिखा खाणां लै आणी। 7तेऊ देशै निं सरग हुअ अर खिरी शुक्कअ तैहा गाडो पाणीं बी पठी।
एलियाह अर सारपत नगरीए बिधबा
8तेखअ बोलअ बिधाता एलियाह लै, 9“तूह डेऊ सदोन मुल्खे सारपत नगरी लै संघा रहै तिधी। तिधी आसा एक बिधबा बेटल़ी, मंऐं किअ तैहा लै हुकम कि सह ताल्है रोटी खैऊए अर तेरी हेर-सभाल़ करे।”#लूक. 4:25,26 10तेखअ डेऊअ एलियाह सारपत नगरी लै, ज़ांऊं सह नगरीए प्रऊल़ी सेटा पुजअ, तिधी शुझुई तेऊ का एक बिधबा बेटल़ी झ़ुका झाल़दी लागी दी। एलियाह बोलअ तैहा लै, “ज़ीबाण, मुल्है दै तूह झुटणा लै पाणीं।” 11सह डेऊई तेऊ लै पाणीं आणदी, तेतरी हेरअ एलियाह तैहा लै हाक लाई इहअ बोली, “पाणीं संघै आणै धख रोटी बी।”
12तैहा बिधबा बेटल़ी बोलअ एलियाह लै, “तेरअ परमेशर बिधाता ज़ुंण सदा ज़िऊंदअ आसा, हुंह काढा तेऊए सोह, मेरै निं रोटीओ म्हार बी आथी रहअ द। मेरै आसा हांडू भितरी एक अंदल़ू पिठअ अर शिंगी दी आसा धख ज़िहअ जैतूनो तेल। मंऐं निंयैं ईंयां धख ज़िहै झ़ुके डाल़ झाल़ी, संघा चाणणी ती मुंह आप्पू अर आपणैं शोहरू लै खिरी एऊ बच़ै दै पिठे धख ज़ेही रोटी। तेता बाद हुअ हाम्हां मरनअ ई।”
13एलियाह बोलअ तैहा बेटल़ी लै, “तूह निं फिकर करै, तूह डेऊ, संघा चाण रोटी। पर सोभी का आजी लअ तूह धख ज़ेही रोटी चाणी मुल्है दैई, तेखअ लागै तूह आप्पू अर आपणैं शोहरू लै चाणदी। 14किल्हैकि इज़राईलो परमेशर बिधाता बोलअ इहअ, ‘ज़ेभै तैणीं सरग निं होए, तेभै तैणीं निं तेरै हांडूओ पिठअ मुक्कणअ अर नां तेरी शिंगी भितरी तेल मुक्कणअ।’”
15सह बेटल़ी डेऊई भितरा लै संघा किअ ज़िहअ एलियाह गूरै बोलअ तिहअ ई। तधा बाद हुअ तैहा बिधबा बेटल़ी अर तेसे टबरा लै खास्सै धैल़ै तैणीं बतेर्हअ खाणां लै। 16ज़िहअ बिधाता एलियाह गूरा बाती बोलअ त, तैहा बिधबा बेटल़ीओ पिठैओ हांडू निं कधि मुक्कअ अर नां शिंगी भितरी तेल घटअ।
17थोल़ै धैल़ै बाद हुअ तेऊ घअरे मालक तैहा बिधबा बेटल़ीओ शोहरू बमार, तेऊ लागी धैल़ी-धैल़ी उंधै ई! सह हुअ खास्सअ बमार अर खिरी मूंअ सह! 18तैहा बिधबा बेटल़ी बोलअ एलियाह लै, “हे परमेशरे मणछा, तंऐं मुल्है इहअ किल्है किअ? तूह कै इधा लै मेरै शोहरू मारदअ आअ कि मुंह आद फिरै कि मंऐं आसा पाप किऐ दै?”
19एलियाह बोलअ तैहा लै, “एऊ शोहरू दै मुखा।” तेखअ दैनअ तैहा सह शोहरू तेऊए भोसल़ै बशैल़ी। एलियाह निंयं सह उझै आटल़ू लै ज़िधी सह सुत्तअ द हआ त। तेखअ डाहअ सह शोहरू धरनीं च़ैनैं। 20तेखअ किई एलियाह ज़ोरै-ज़ोरै बिधाता सेटा एही अरज़, “हे मेरै परमेशर बिधाता, तंऐं ऐहा बिधबा बेटल़ी लै एही घोर आफ़त किल्है पाई? ऐहा डाहअ हुंह आपणैं घअरै, एतरी किई ऐहा मेरी च़ाकरी अर तंऐं दैनअ एसे शोहरू मरनै!” 21बिधाता का अरज़ करदी बारी पल़अ एलियाह चिई बारी तेऊ शोहरू प्रैंदै उटअ संघा बोलअ बिधाता लै इहअ, “हे परमेशर बिधाता! एऊ शोहरू लोल़ी शाह फिरअ, एऊ कर भिई ज़िऊंदै।”#2 राज़. 4:34,35 22बिधाता शूणीं एलियाह गूरे अरज़ अर शोहरू फिरअ शाह संघा हुअ ज़िऊंदअ।
23तेखअ आणअ एलियाह सह शोहरू आटल़ू का उंधै संघा दैनअ इहअ बोली सह शोहरू तैहा बिधबा बेटल़ी का, “भाल़, तेरअ शोहरू आसा ज़िऊंदअ!”
24तैहा बिधबा बेटल़ी बोलअ एलियाह का, “ऐबै हुअ मुंह पाक्कअ भरोस्सअ कि तूह मणछ आसा परमेशरो। ज़िहअ बिधाता तेरी ज़िभा का बोला, सह निभा तिहअ ई।”
Currently Selected:
1 राज़ै 17: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
