1 राज़ै 14
14
राज़ै जरोबामे शोहरूए मौत
1तधू काल्ला ई हुअ इहअ कि जरोबाम राज़ैओ शोहरू अबियाह हुअ खास्सअ बमार। 2जरोबामै बोलअ आपणीं लाल़ी लै इहअ, “तूह बदल़ आपणअ भेश कि तूह निं कोही बछ़ैणीं लोल़ी, संघा डेऊ शिलोह ज़िधी सह आहिजा गूर रहा ज़ुंण मुल्है इहअ बोलअ त कि हुंह हणअ इज़राईलीओ राज़अ। 3तेऊ लै निंयैं दस रोटी, टिक्की अर एक शिंगी मखीर। तेऊ हेरनअ ताखा खोज़ी कि शोहरू लै आजू किज़ै हणअ।”
4जरोबामे बेटल़ी किअ तिहअ ई संघा पुजी हांढी करै शिलोह आहिजा गूरे घअरै। आहिजा गूर त खास्सअ प्रोढअ अर तेऊए आछी का निं शुझदअ बी आथी त। 5बिधाता बोलअ आहिजा गूरा का, “आहिजा, जरोबामे लाल़ी एछणी ताह सेटा आपणैं शोहरूए बारै पुछ़दी ज़ुंण खास्सअ बमार आसा। तूह खोज़ै तैहा का एही-एही गल्ला।”
ज़ांऊं जरोबामे लाल़ी आहिजा गूरा सेटा पुजी, तैहा किअ इहअ दखाअ कि सह आसा कुंण होर बेटल़ी। 6पर ज़ांऊं आहिजा गूरै दुआरा ओर्ही तेसे हांढणे छ़ेल़ शूणीं, तेऊ बोलअ तैहा लै इहअ, “मुखा आसा थोघ कि तूह आसा राज़ै जरोबामे लाल़ी। तूह किल्है आसा इहअ दखाअ करदी लागी दी कि तूह आसा कुंण होर बेटल़ी? मुखा आसा ताल्है बडी बूरी खबर। 7तूह डेऊ राज़ै जरोबामा सेटा लै संघा खोज़ कि इज़राईलो परमेशर बिधाता बोला ताल्है इहअ, ‘सारी परज़ा मांझ़ै छ़ांटअ मंऐं तूह कि तूह मेरी परज़ा इज़राईली प्रैंदै राज़ करे। 8दाबेदे आद-लुआदा का किअ मंऐं राज़-पाठ दूर संघा दैनअ ताल्है, पर तूह निं मेरै दास दाबेदा ज़िहअ शुचअ आथी। तेऊ मनै मेरै सोभै हुकम, संघा किअ ज़िहअ मंऐं बोलअ तिहअ ई। 9ज़ेतरै बी ताखा आजी राज़ै हुऐ, तंऐं किअ तिन्नां सोभी का खास्सअ पाप। तंऐं समझ़अ हुंह नकदरअ अर सुन्नें मुहुर्ती बणाईं तिन्नां देअए पूज़ा करी ठैऊई तंऐं मुल्है खास्सी रोश्शै। 10एता पिछ़ू पाणीं मुंह तेरै सारै खिंबा लै एही आफ़त कि तेरै खिंबा दी मरनै होछ़ै का प्रोढै तैणीं सोभ मर्ध च़ाऐ तिंयां गलाम होए च़ाऐ आज़ाद। तिन्नें करनीं मुंह इज़राईली मांझ़ा का एही सफाई ज़िहै कुंण खुढा का च़िक्करै बागै शोधा।#1 राज़. 15:29 11तेरै खिंबा दी ज़ुंण नगरी दी मरे, तिन्नैं खाणीं ल्हासा बी कुक्करा अर ज़ुंण नगरी बागै खेचै मरे तिन्नें ल्हासा च़ोच़ल़णी काअ-गरली। अह गल्ल डाही मंऐं बिधाता बोली।’”
12तेखअ बोलअ आहिजा गूरै जरोबामे लाल़ी लै इहअ, “ऐबै डेऊ तूह घअरा लै फिरी, ज़ेही ई ताह नगरी दी आपणैं दुआरे डेहल़ा भितरी गंईं डाहणीं, तिहअ ई जाणअ सह शोहरू मरी। 13इज़राईले सोभी लोगा करनअ तेऊ लै शोग संघा डाहणअ सह दाबी। जरोबामे खिंबा दी हणअ सह ई एक्कै मणछ ज़ुंण बिधी-बधाना संघै डाहणअ दाबी। किल्हैकि इज़राईलो परमेशर बिधाता आसा सिधअ तेऊ लै खुश। 14बिधाता करनअ इज़राईला लै इहअ राज़अ खल़अ, तेऊ राज़ै करनअ जरोबामो खिंब पठी खतम! मेरअ मतलब कि इहअ आसा ऐबै छ़ेक्कै हणैं आल़अ। 15बिधाता दैणीं इज़राईली लै सज़ा, तेऊ झ़ुंझ़ल़णै तिंयां इहै, ज़िहअ गाडा-नाल़ो हर्हल नगाल़े डाल़ी झ़ुंझ़ल़ा। तैहा रज़दी-पज़दी ज़ैगा का पेच़णैं तिंयां तेऊ गोधी का ज़ुंण ज़ैगा तेऊ तिन्नें दादा-बाबा लै थिई दैनी दी। तेऊ डाहणैं तिंयां फरात दरैऊआ पार छिंगी किल्हैकि अशेरा देबीए मुहुर्ती बणाईं ठैऊई तिन्नैं बिधाता लै रोश्श। 16जरोबामै किअ पाप अर इज़राईली का बी कराऊअ तेऊ पाप। तेता पिछ़ू छ़ाडणैं बिधाता ऐबै इज़राईली।”
17जरोबामे लाल़ी लागी तिधा का हांढदी संघा पुजी तिर्सा नगरी आपणैं घअरै। ज़ेही ई तैहा आपणैं घअरै डेहल़ा भितरी गंईं डाही, तेही ई शोटै तेऊ शोहरू प्राण। 18सोभी इज़राईली किअ तेऊ शोहरू लै शोग संघा डाहअ सह बिधी-बधाना संघै दाबी। सह हुअ तिहअ ई ज़िहअ बिधाता आहिजा गूरा बाती बोलअ त।
राज़ै जरोबामे मौत
19राज़ै रहंदी जरोबामै ज़िहै बी काम किऐ, तेऊ केतरै जुध लल़ै अर केतरै ज़ितै, तिंयां सोभै गल्ला आसा इज़राईले इतिहासे कताबा दी लिखी दी। 20जरोबामै कि इज़राईला प्रैंदै बाई साला तैणीं राज़। सह मूंअ संघा डाहअ दाबी अर तेऊए ज़ैगा बेठअ तेऊओ शोहरू नादाब राज़अ।
यहूदा मुल्खै राज़ै रहबामो राज़
(2 इतिहास 11:5—12:15)
21राज़ै सुलैमानो शोहरू रहबाम थिअ कताल़ी सालो ज़ेभै सह यहूदा मुल्खो राज़अ बणअ। तेऊ किअ सतारा साला तैणीं एरुशलेम नगरी राज़ ज़ुंण बिधाता इज़राईलीए होरी सोभी नगरी मांझ़ै आप्पू लै छ़ांटी कि तिधी तेऊए पूज़ा-गाज़ा होए। रहबामे ईज नामाह ती अमोन नगरी का।
22यहूदा मुल्खै लोग बी लागै तिहअ ई पाप करदै ज़ेता का बिधाता नफरत करा। तिन्नैं ठैऊई बिधाता लै आपणैं दादा-बाबा का बी खास्सी रोश्श। 23तिन्नैं डाहै उछ़टी धारा अर बडै-बडै बूटा हेठै ओडै अर अशेरा देबीए मुहुर्ती स्तापी।#2 राज़. 17:9,10 24तिन्नां ज़ैगा करा तै तिन्नां मांझ़ै कई मर्ध अर बेटल़ी कंज़रैई। ज़ुंण ज़ाती बिधाता इज़राईली का दूर काढी ती, तिंयां लोग लागै तिन्नें ई च़िल़्हखरै रिती-रबाज़ा मंदै।#बधा. 23:17
25रहबाम राज़े पांज़ूई साला छ़ेल़अ मिसर देशे राज़ै शिशकै जुध संघा पल़अ एरुशलेम नगरी लै चुटी।#2 इति. 12:2-8 26तेऊ निंईं एरुशलेम बिधाते भबने अर राज़े मैहले सोभ किम्मती च़िज़ा लुटी अर तेथ संघै निंईं तेऊ तिंयां ढाल़ा बी ज़ुंण सुलैमानै सुन्नें ती बणाईं दी।#1 राज़. 10:16,17; 2 इति. 9:15,16 27तेखअ बणाईं राज़ै रहबामै तेते ज़ैगा कांस्से ढाल़ा संघा डाही तिंयां पहरीए सैणैं सेटा सभाल़ी ज़ुंण राज़े मैहलै फाज़त करा तै। 28ज़ेभै-ज़ेभै राज़अ बिधाते भबना लै डेऊअ त, तेभै-तेभै आणा तै तिंयां पहरी तिन्नां ढाल़ा भढारा का काढी अर तेखअ डाहा तै तिंयां बापस।
29रहबाम राज़ै ज़िहै-ज़िहै काम किऐ, तिंयां आसा यहूदा मुल्खै राज़े इतिहासे कताबा दी लिखै दै। 30ज़ेभै तैणीं रहबाम अर जरोबामो राज़ रहअ, तिंयां रहै एकी-दुजै संघै कधि बणी। 31रहबामे ईज नामाह ती अमोन नगरी का, ज़ांऊं रहबाम राज़अ मूंअ, सह डाहअ दाबेदपूर दाबी ज़िधी तेऊए दाद-बाब तै दाबै दै। आजू बणअ तेऊए ज़ैगा तेऊओ शोहरू अबियाह यहूदा मुल्खो राज़अ।
Currently Selected:
1 राज़ै 14: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
