1 राज़ै 11
11
सुलैमानै पाअ बिधाता बिस्सरी
1राज़अ सुलैमान लोभणूंअ होरी-होरी देशे खास्सी बेटल़ी लै। मिसर देशे माहा राज़ेए देई का लाऊआ किअ तेऊ हित्ती, मोआबी, अमोनी, एदोमी सदोनी खास्सी बेटल़ी संघै बैह।#बधा. 17:17 2सुलैमान झ़ूरअ तिन्नां ज़ातीए बेटल़ी लै संघा बैही तिन्नां जैंदरा का ज़हा लै बिधाता इहअ त बोलअ द, “इना लोगा जैंदरी निं डेऊई नां ईंयां तम्हां जैंदरी लोल़ी आऐ, किल्हैकि तिंयां सका तम्हां इज़राईली आपणैं देअ देबतै बाखा फरेऊई।”#लुआ. 34:16; बधा. 7:3-4 3राज़ै सुलैमाने ती सात शौ राणीं अर तिन्नां का लाऊआ ती चअन शौ होर बेटल़ी डाही दी अर तिन्नैं पाअ सह बिधाता छ़ाडी कबाता, 4ज़ांऊं सुलैमान प्रोढअ हुअ, तिन्नैं बेटल़ी पाअ सह आप्पू संघै आपणैं देअआ पूज़दअ। सुलैमान निं आपणैं बाब दाबेदा ज़िहअ बिधाता लै शुचअ-पाक्कअ रहअ। 5सह लागअ सदोनी लोगे अशतरोत देबी अर अमोनी लोगे च़िल़्हखरै मलकोम देअआ पूज़दअ! 6इहअ करै किअ सुलैमानै सह ई काम ज़ेता का बिधाता नफरत करा त। सह निं बिधाता लै आपणैं बाब दाबेदा ज़िहअ शुचअ-पाक्कअ रहअ। 7सुलैमानै बणाईं एरुशलेम पुर्बा बाखा धारा मोआबी लोगे कमोश नाओंए च़िल़्हखरै देअआ अर अमोनी लोगे मोलक देअआ पूज़णा लै ज़ैगा। 8ज़ुंण तेऊ देशा-देशा का आप्पू लै खास्सी बेटल़ी ती आणी दी, तिन्नां लै बी बणाईं तेऊ ज़ुदी-ज़ुदी ज़ैगा कि तिंयां आपणैं-आपणैं देअ-देबी लै धूप ज़ाल़ी अर बल़ीदान करे!
9-10इज़राईलो परमेशर बिधाता आअ त सुलैमाना लै दूई बारी सुपनै अर तेऊ हेरअ त तेऊ का बोली कि होरी देअआ पूज़दअ निं लागी। पर सुलैमानै निं बिधातो सह हुकम मनअ अर सह पेठअ तेऊ छ़ाडी कबाता। तैही आई तेखअ बिधाता तेऊ लै रोश्शै। 11तैही बोलअ बिधाता सुलैमाना लै इहअ, “ज़िहअ मंऐं ताल्है बोलअ त, तंऐं निं तिहअ किअ! तंऐं किअ आपणीं मन्न-मरज़ीओ काम! ऐबै लाअ मंऐं ताखा राज़ दूर करी अर सह दैणअ मुंह तेरै कार-करिंदै मांझ़ै ई कहा एक ज़ण्हैं लै। 12पर तेरै बाब दाबेदा पिछ़ू निं हुंह तेरी ज़िऊंदी ज़िता ताखा राज़ दूर करदअ, आजू तेरै शोहरू का छ़ड़ैऊंणअ मुंह राज़ ज़रूर। 13तज़ी बी निं मुंह तेरै शोहरूओ सारअ राज़-पाठ खतम करनअ, सह डाहणअ मुंह आपणैं दास दाबेद, एकी गोत्रो#11:13 एकी गोत्रो यहूदा राज़अ डाहणअ मुंह सह बणाईं किल्हैकि हुंह निं आपणैं दास दाबेदा अर मंऐं आप्पू लै छ़ांटी दी एरुशलेम नगरी बिस्सरुअ आथी।”
सुलैमाने दुशमण
14एदोम मुल्खै थिअ राज़े खिंबा का हदाद, सह बणाअं बिधाता राज़ै सुलैमानो दुशमण। 15-16एता का खास्सी साला पैहलै ज़धू राज़ै दाबेदै एदोम मुल्खै कबज़अ किअ त। दाबेदो सैनापति डेऊअ तिधा लै तिन्नां दाबदअ ज़ुंण जुधा दी मारै तै। जोआब अर तेऊ संघै इज़राईली सैना रही तिधी छ़हा भिन्नैं तैणीं अर तेतरै धैल़ै पाऐ तै तिन्नैं तिधी बस्सै सोभ मर्ध अर शोहरू मारी। 17हदाद त तधू होछ़अ ज़िहअ शोहरू अर तेऊए बाबे एदोमी दास ठुर्है तिधा का मिसर देशा लै अर सह शोहरू बी निंयं तिन्नैं संघा बच़ाऊई। 18तिंयां डेऊऐ मिद्यान देशा बाती परान तैणीं अर तिधी ज़ुल़ै तिन्नां संघै होर बी आदमी संघा पुजै किहअ करै मिसर देशे माहा राज़ै सेटा। तेऊ दैनी हदादा रहणा लै धख ज़ेही ज़िम्मीं, घअर अर तिन्नां लै ज़िणस। 19बादा का हुई मिसर देशे राज़ै अर हदादे पाक्की साथ अर माहा राज़ै किअ आपणीं साल़ीओ बैह हदादा संघै ज़ुंण तेऊए राणीं तपनेसे च़ेई थिई। 20तेखअ हुअ तिन्नों एक शोहरू अर तेऊ नाअं डाहअ तिन्नैं गनूबत। तेऊओ च़ूई चल़ाऊई तपनेस राणींए मैहलै अर तिधी लागअ सह मिसर देशे माहा राज़ेए होरी शोहरू संघै रहंदअ।
21ज़ांऊं अह खबर मिसर देशै माहा राज़ै हदादा सेटा पुजी कि राज़अ दाबेद, तेऊओ सैनापति जोआब गअ त मरी, तेखअ बोलअ हदादै मिसर देशे माहा राज़ै का, “तूह दै मुल्है मेरै आपणैं देशा लै डेऊणे ज़ाज़त।”
22माहा राज़ै पुछ़अ तेऊ का, “तूह किल्है च़ाल्लअ? इहअ किज़ै आसा ज़ुंण हुंह ताल्है दैई निं सकअ?”
हदादै बोलअ, “इहअ निं किछ़ै, तूह दै मुंह डेऊणैं।” तेखअ डेऊअ हदाद आपणैं मुल्खा लै फिरी।
एदोम मुल्खो राज़अ रही त हदाद बेघै बूरअ अर इज़राईलो खास्सअ दुशमण।
23तेखअ बणाअं परमेशरै एल्यादो शोहरू रजोन सुलैमानो दुशमण। रजोन त आपणैं मालक सोबा नगरीए राज़ै हदादेज़ेरा सेटा का ठुर्हअ द। 24-25ज़धू दाबेद राज़ै हदादेज़ेरे सैना का ज़ितअ त, तेता बाद बणाअं रजोनै आपणअ एक छ़ुंढ अर आप्पू बणअ तिन्नों दलपति। तेखअ डेऊऐ रजोन अर तेऊए सैना दमिश्क नगरी लै अर तिधी बणअ सह सिरीया देशो राज़अ अर इज़राईलो पाक्कअ दुशमण। इहअ करै तै हदाद अर रजोन दुहै इज़राईले दुशमण ज़धू सुलैमान इज़राईला दी राज़अ थिअ। तिन्नैं दुही पाई सुलैमाना लै आफ़ता प्रैंदै आफ़त।
जरोबामा संघै बिधाते करार
26एक होर मणछ बी हुअ राज़ै सुलैमाने खलाफ, सह थिअ तेऊए ई कार करिंदै मांझ़ै सरूयाह नाओंए बिधबो शोहरू जरोबाम। तेऊए बाबा नाअं त नबात ज़ुंण एप्रैम गोत्रा का सारतान नगरीओ थिअ। 27सह हुअ राज़ै सुलैमाने खलाफ इहअ करै कि राज़अ सुलैमान त लागअ द एरुशलेम पुर्बा बाखा दाबेदपूर गहल़ा बणाऊंदअ अर नगरी फेर-फिरदै गहल़ा स्केरदअ लागअ द। 28जरोबाम त ज़ोर-ज़ाहणा आल़अ ज़ुआन शोहरू। राज़ै सुलैमानै भाल़अ कि अह शोहरू आसा खास्सअ मैन्थी। तेऊ डाही तेऊ का युसुफे खिंबे मनिश्शे अर एप्रैम गोत्रे मुल्खै सोभी बेठूए ज़िम्मैंबारी सभाल़ी।
29एकी धैल़ै हुअ इहअ कि जरोबाम त एरुशलेम नगरी का डेऊंदअ लागअ द। तेऊ भेटअ बाता शिलोह नगरीओ आहिजा गूर, तिंयां दुहै तै किधी दहल़ै कल्ही। 30आहिजा खोल्हअ नऊंअ च़ोल़अ पोर्ही ज़ुंण तेऊ बान्हअ द थिअ संघा बणाऐं तेता धेल़ी करै बारा शाट्टै, 31तेखअ बोलअ तेऊ जरोबामा लै, “एता मांझ़ै निंऊं तूह दस शाट्टै आप्पू लै, किल्हैकि इज़राईलो परमेशर बिधाता बोला ताल्है इहअ, ‘मंऐं लाअ सुलैमाना का राज़ पोर्ही छ़ड़ैऊई अर बारा मांझ़ै दसा गोत्रा प्रैंदै लाअ तूह राज़अ बणाईं। 32पर आपणैं दास दाबेद अर एरुशलेम नगरी ज़ुंण मंऐं आप्पू लै आसा छ़ांटी दी, तेता पिछ़ू लाअ मंऐं इज़राईली मांझ़ै एकी गोत्रा प्रैंदै सुलैमाना लै राज़ अज़ी बी डाही। 33इहअ लाअ मंऐं तै करी कि सुलैमानै हेरअ हुंह छ़ाडी अर सह लागअ सदोन देशे अशतरोत देबी, मोआबीए देअआ कमोश, अमोनी लोगे मलकोम देअआ पूज़दअ। ऐबै निं सुलैमान मेरअ हुकम मंदअ! तेऊ किअ बेघै बूरअ अर तेऊ निं मेरअ बधान अर बिधी तेही मनी ज़िहअ तेऊओ बाब दाबेद करा त।
34“‘पर सारअ राज़ निं मुंह सुलैमाना का दूर करनअ अर तेऊए ज़िऊंदी ज़िता रहणअ सह सोभी इज़राईली प्रैंदै राज़अ। किल्हैकि तेऊओ बाब मेरअ दास दाबेद ज़ुंण मंऐं राज़अ छ़ांटअ थिअ, सह मना त मेरअ बधान अर तेते सोभ बिधी पठी। 35पर तेऊए शोहरू का करनअ मुंह इज़राईलो राज़ दूर संघा बणाणअं बारा मांझ़ै दस गोत्रा प्रैंदै तूह राज़अ। 36सुलैमाने शोहरू लै दैणअ मुंह एकी गोत्रा प्रैंदै ज़रूर राज़ ताकि मेरै दास दाबेदे आद-लुआदा मांझ़ै कुंण नां कुंण एरुशलेम नगरी राज़ करे ज़ुंण नगरी मंऐं आप्पू लै आसा छ़ांटी दी कि इधी एछी सोभ मुंह सेटा माथअ टेक्के। 37जरोबाम, मुंह बणाणअं तूह इज़राईलो राज़अ अर तूह करै सारै इज़राईला प्रैंदै ज़िहअ तूह च़ाहा तिहअ राज़। 38ज़ै तूह मेरै दास दाबेदा ज़िहअ मेरी शुणें, तै करनीं मुंह तेरी मज़त। ज़ै तूह ज़िहअ हुंह बोले तिहअ ई करे ज़िहअ मेरअ दास दाबेद करा थिअ, तै डाहणअ मुंह तेरी आद-लुआदा मांझ़ै कुंण नां कुंण इज़राईला प्रैंदै राज़अ। यहूदा मुल्खै हणअ दाबेदे आद-लुआदो राज़ अर इज़राईल मुल्खै हणअ तेरी आद-लुआदो राज़ पोस्ती दर पोस्ती। 39सुलैमाने पाप करनै पिछ़ू लागणीं दाबेदे आद-लुआदा सज़ा भुगतणी पर सदा लै दुख निं हुंह तिन्नां लै दैंदअ।’”
40सुलैमानै किई जरोबामा मारने बी कोशिश पर जरोबाम निखल़अ बच़ी संघा ठुर्हअ मिसर देशे राज़ै शिशका सेटा लै संघा रहअ सुलैमाना मरनै तैणीं तिधी।
राज़ै सुलैमाने मौत
(2 इतिहास 9:29-31)
41सुलैमाने होर सोभै गल्ला ज़ुंण तेऊ राज़ै रहंदी किअ, तेऊए अक्लीए गल्ला, आसा सोभै सुलैमाने इतिहास नाओंए कताबा दी लिखी डाही दी। 42राज़ै सुलैमानै किअ एरुशलेम नगरी का सारै इज़राईला प्रैंदै च़ाल़्ही साला तैणीं राज़। 43खिरी मूंअ सह संघा डाहअ दाबेदपूर नगरी दाबी अर आजू बेठअ तेऊओ शोहरू रहबाम तेऊए ज़ैगा राज़अ।
Currently Selected:
1 राज़ै 11: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
