1 इतिहास 28
28
बिधाते भबना बणाणें बारै डाहअ राज़ै दाबेदै खोज़ी बोली
1राज़ै दाबेदै किअ हुकम कि इज़राईले सोभ कार-करिंदै, हआ एरुशलेम नगरी कठा। तेखअ हुऐ सोभी गोत्रा प्रैंदै राज़ै डाहै दै दरोगै, इज़राईली सोभी टोलीए सैणैं, राज़ै अर राज़े शोहरूए ज़िम्मीं-ज़ैगा, डागै-चैणैं अर होर ज़ैदात सभाल़णैं आल़ै दरोगै, सोभी ज़ैगा का राज़े पांच़, सैना दी खास-खास जोधै, दलपति अर सैनापति एरुशलेम कठा।
2ज़ांऊं सभा शुरू हुई, तेखअ उझ़ुअ राज़अ दाबेद खल़अ संघा बोलअ तिन्नां लै, “मेरै साथीओ! मेरी परज़े लोगो, मेरी गल्ल शूणां। बिधाते करारो मणशू ज़ुंण परमेशरे खूरा हेठै च़ौकी आसा, तेता लै च़ाहा हुंह बसेरअ बणाणअं कि सह सदा तिधी रहे। बिधाते तेऊ भबना बणाणां लै आसा मंऐं सोभै च़िज़ा झाल़ी हेरी दी। 3पर बिधाता बोला मुल्है इहअ कि तेऊ निं मेरै हाथै आप्पू लै भबन बणनैं दैणअ किल्हैकि मंऐं किऐ खास्सै जुध अर तेथ मारै मंऐं खास्सै मणछ। 4बिधाता छ़ांटअ यहूदा कि सह सोभी इज़राईली प्रैंदै राज़ करे। यहूदा गोत्रा मांझ़ै छ़ांटअ मेरै बाबो खिंब अर तेता मांझ़ै छ़ांटअ बिधाता हुंह कि सोभी इज़राईली प्रैंदै राज़अ होए अर आजू लै बी आसा तेऊ एही करार किई दी कि मेरी आद-लुआदा मांझ़ै रहणअ कुंण नां कुंण ज़रूर राज़अ। 5बिधाता दैनी मुल्है एही बर्गत कि मेरै हुऐ खास्सै शोहरू, पर तिन्नां सोभी शोहरू मांझ़ै छ़ांटअ बिधाता मेरअ शोहरू सुलैमान कि सह मुंह बाद इज़राईला प्रैंदै राज़अ बणी बिधातो राज़ सभाल़े।
6“बिधाता बोलअ मुल्है इहअ, ‘तेरै शोहरू सुलैमाना बणाणअं मुल्है मेरअ अदर करना लै भबन। सह हणअ मुल्है मेरै शोहरू ज़िहअ अर हुंह हणअ तेऊ लै बाबा ज़िहअ। 7ज़ै सह मेरअ बधान अर तेते सोभै हुकम मने, तै रहणअ तेऊओ राज़ सदा बणी।’
8“मेरै साथीओ, ऐबै बोला हुंह परमेशर अर सारी इज़राईली सभा शाजत मनी तम्हां बिधाते परज़ा लै इहअ कि बिधाते हुकम मनणा लै रहै शुचै-पाक्कै ताकि तम्हैं एऊ रज़दै-पज़दै देशै बस्सी अर तम्हां बाद आजू थारी आद-लुआद सदा एऊ देशे मालक रहे।”
9तेखअ बोलअ राज़ै दाबेदै आपणैं शोहरू सुलैमाना लै, “मेरै शोहरूआ, आपणैं बाबे परमेशरे बारै शिखल़ सोभी गल्ला संघा रहै शुचअ-पाक्कअ रही कोहरै मनै तेऊए च़ाकरी करदअ लागी। तेऊ का आसा सोभी गल्लो थोघ कि तूह किज़ै सोठा अर किज़ै च़ाहा। ज़ै तूह बिधाता सेटा डेओए तेऊ हेरनी तेरी अरज़ शूणीं, पर ज़ै तूह तेऊ का उंबल़ी बाखा फिरे, तै डाहणअ हेरे तूह तेऊ बी सदा लै शोटी। 10ऐहा गल्लो डाहै धैन हेरे आपणैं पबित्र भबना बणाणां लै आसा बिधाता तूह छ़ांटअ द। ऐबै कर हिम्मत संघा कर तेऊ कामां पूरै ज़ुंण ताखा सभाल़अ।”
11ज़ांऊं राज़अ दाबेद इना गल्ला बोली मुक्कअ, तेखअ दैनै तेऊ सुलैमाना लै बिधाते भबन, भढार, होरी कमरू, खास पबित्र ज़ैगा अर पापे प्राश्त करने ज़ैगे नक्षै कि किहै-किहै बणाणैं। 12बिधाते भबने पांड, भबना ओर्ही-पोर्ही ताटी, कमरू, बिधाता लै भैंट किई दी च़िज़ा लै भढार किहै-किहै लोल़ी हुऐ तेते सोभ नक्षै बी दैनै दाबेदै सोभ सुलैमाना का। 13प्रोहत अर लेबीए केतरै दल अर तिन्नां बिधाते भबनै किज़ै-किज़ै काम करनअ अर भबनै बिधाते च़ाकरी लै च़िज़े ज़िम्मैंबारी केही दैणीं तिंयां गल्ला बी समझ़ाऊई दाबेदै सुलैमाना का। 14इहअ बी डाहअ दाबेदै सुलैमाना का खोज़ी कि बिधाते भबने भांडै बणाणां लै केतरअ-केतरअ सुन्नअ अर च़ंदी लागणीं। 15तेता संघै सुन्नें दीऐ, सदीऐ, च़ंदीओ मेज़, 16सुन्नेंओ मेज़ ज़ेथ प्रैंदै बिधाता लै भैंट किई दी रोटी डाहा, तेता लै आसा सुन्नअ-च़ंदी तोली करै डाहअ द ज़ेतरअ-ज़ेतरअ तेथ लागणअ। 17च़ोखै सुन्नें कांडैदार च़िमच़ा, प्रिहै, गलास, कऊली, तेता लै बी आसा सुन्नअ-च़ंदी तोली करै डाहअ द ज़ेतरअ-ज़ेतरअ तेथ लागणअ। 18सुन्नें बेदी ज़ेथ धूप ज़ाल़ा अर बिधाते करारे मणशूए ढक्कणा प्रैंदै फैंख फुआरै दै सुन्नें करूब नाओंए स्वर्ग दूते मुहुर्ती बणाणां लै तोली करै केतरअ-केतरअ सुन्नअ लाणअ सह बी आसा डाहअ द।
19राज़ै दाबेदै बोलअ इहअ, “ज़ेही-ज़ेही बिधाता मुल्है समझ़ दैनी, तेही-तेही आसा मंऐं ईंयां गल्ला समझ़ी करै लिखी डाही दी।”
20तेखअ बोलअ राज़ै दाबेदै आपणैं शोहरू सुलैमाना लै इहअ, “तूह निं हैअ चोल़ी, हिम्मत कर संघा कर आपणअ काम शुरू। एता का निं तूह किछ़ू गल्ला करै पिछ़ू हटी। परमेशर बिधाता ज़सरी च़ाकरी हुंह करा, सह हणअ ताह संघै आप्पै। सह निं ताह शोटी डाहंदअ। तेऊ करनी ताह संघै रही आपणैं भबने काम पूरै करना लै तेरी मज़त। 21प्रोहत अर सोभी लेबी लै बी आसा बिधाते भबनै ज़ुदअ-ज़ुदअ काम सभाल़ी हेरअ द। सोभी कामें सज़ाण कारीगीर आसा न्हैल़ै बेठै दै कि काम केभै हआ शुरू कि तिंयां तेरी मज़त करे। सारी परज़ा अर तिन्नें सैणैं बी आसा ज़िहअ तूह बोला तिहअ करना लै तैर।”
Currently Selected:
1 इतिहास 28: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
