रोमियो 2
2
परमेसर दा तरमी न्याय
1एस आसतै ए दोष लाने आले, तू कोई कि नेई ओगा, तू दोषी ऐं; किके जेस गल्ल च तू दुए उपर दोष लाना ऐं, उसै गल्ल च तू अपने आप गी बी दोषी खुआना ऐं, एसकरी के तू जेड़ा दोष लाना ऐं, अप्पुं उवै कम करना ऐं। 2ते अस जांनदे न के ऐसे-ऐसे कम करने आले उपर परमेसर तर्फुं ठीक-ठीक सजा दा उक्म ओंदा ऐ। 3ए मनुक्ख, तू जेड़ा ऐसे-ऐसे कम करने आले उपर दोष लाना ऐं, ते अप्पुं गै उवै कम करना ऐं; के ए जानना ऐ के तू परमेसर दी सजा दे उक्म कोलां बची जागा? 4के तू ओदी पलाई, ते सेंन करने दी शक्ति, ते स्बर करने आला तन्न गी तोच्छ जानना ऐं? के ए नेई समझदा के परमेसर दी पलाई तुगी मन फराव गी सखांदी ऐ? 5पर तू अपनी कठोरता ते जिद्दी मन दे मताबक ओदे गुस्सै दे देन लेई, जेदे च परमेसर दा सच्चा न्याय परकट ओग, अपने लेई गुस्सा कमा करना ऐं। 6परमेसर अर एक गी ओदे कम्में दे मताबक बदला देग; 7जेड़े छैल कम च मजबूत रेईयै मैमा, ते आदर, ते अमरता दी खोज च न, उनेंगी परमेसर मेशा दी जिंदड़ी देग; 8लेकन जेड़े खोदगरजी न ते सच्च गी नेई मनदे, लेकन ओ अतर्म गी मनदे न, उन्दे उपर गुस्सा ते कोप पौग। 9ते कलेश ते संकट अर एक मनुक्ख दे प्राण उपर जेड़ा बराई करदा ऐ औग, पैलैं यहूदी पर पी यूनानी उपर 10लेकन मैमा ते आदर ते शांति अर एक गी मिलग, जेड़ा पला करदा ऐ, पैलैं यहूदी गी पी यूनानी गी। 11किके परमेसर कुसे दी तरफदारी नेई करदा।
12एसकरी के जिन्नें बिना कनून पाएदे पाप कित्ता, ओ बिना कनून दे नाश ओई जागन; ते जिन्नें कनून पाईयै पाप कित्ता, उन्दी सजा कनून दे मताबक ओग; 13किके परमेसर दे उत्थें कनून दे सुनने आले तरमी नेई, लेकन कनून उपर चलने आले तरमी खुआए जागन। 14पी जेलै दुई जाती दे लोक जिन्दे कोल कनून नेई, अपनी अन्तर आत्मा दे कनून दी गल्लें उपर चलदे न, ते कनून उन्दे कोल नेई ओनें उपर बी ओ अपने आसतै अप्पुं गै कनून न 15ओ कनून दीया गल्लां अपनी-अपनी अन्तर आत्मा च लिखी दियां दसदे न ते उन्दे मन बी गवाई दिंदे न, ते उन्दे वचार उनेंगी दोष लांदे, यां उनेंगी निर्दोष खुआंदे न; 16जेस देन परमेसर ओस शोभ समाचार दे मताबक जेड़ा मैं प्रचार कित्ता यीशु मसीह दे अथ्थें मनुक्खें दी गोप्त गल्लें दा न्याय करग।
17जेकर तू अपने आप गी यहूदी खुआना ऐं, ते कनून उपर परोसा रखना ऐं, ते परमेसर दे बारै च कमंड करना ऐं, 18ते ओदी मरजी गी जानना ते कनून दी शिखया पाईयै छैल-छैल गल्लें गी पयारीयें जानना ऐं, 19जेकर तू अपने उपर परोसा रखना ऐं के आंऊँ आत्मा दे अन्नें लोकें दा अगुआ, ते नेरे च पेदे लोकें दी लो, 20ते बेबकूफे गी समझाने आला, ते बच्चें गी शिखया देने आला ऐं, ते ज्ञान, ते सचाई दा नमूना, जेड़ा परमेसर दे कनून च ऐ, मिगी मिलया ऐ 21के जेड़ा तू दुए गी सखाना ऐं, अपने आप गी नेई सखांदा? के तू जेड़ा चोरी नेई करने दी शिखया दिना ऐं, अप्पुं गै चोरी करना ऐं? 22तू जेड़ा अखनां ऐं “ब्यभिचार नेई करना,” के अप्पुं गै ब्यभिचार करना ऐ? तू जेड़ा मूरतें क्न्ने बैर करना ऐं, के अप्पुं गै मंदरें गी लूटना ऐ? 23तू जेड़ा कनून उपर कमंड करना ऐ, के कनून दी नेई मनियै, परमेसर दा अनादर करना ऐं? 24किके पवित्र शास्त्र च लिखे दा बी ऐ, “थुआड़े कारन परमेसर दे नां दी निंदया दुई जातीयें च कित्ती जन्दी ऐ।”
खतने दा फायदा नेई ओना
25जेकर तोस कनून उपर चलदे ओ, तां खतने कोलां फायदा तां ऐ, लेकन जेकर तू कनून गी नेई मनें, तां तेरा खतना, बिना खतने आला लेखा ओग। 26तां जेकर बिना खतना आला मनुक्ख कनून दे नियम दा पालन करै, तां के ओसदी बिना खतने दी आलत खतने आला लेखा नेई गिनी जाग? 27ते जेड़ा मनुक्ख शारीर च बिना खतना रिया ऐ, जेकर ओ कनून उपर चालदा ऐ, तां के ओ तुगी जेड़े लिखे दे कनून पाने ते खतना कित्ते जाने उपर बी कनून दा पालन नेई करदा ऐ, दोषी नेई मनया जागा? 28किके जेड़ा बारें द्सने च यहूदी ऐ, ओ यहूदी नेई; ते नां गै ओ खतना, खतना ऐ जेड़ा दखाबटी या शरीर च ऐ। 29लेकन यहूदी उवै ऐ, जेड़ा दिले थमां परमेसर क्न्ने सेई ऐ; ते खतना उवै गै, जेड़ा एर्दें दा ते आत्मा दा ऐ, नां के कनून दे लेख दा; ते ऐसे लोकें दी तरीफ मनुक्खें थमां नेई, पर परमेसर थमां ओंदी ऐ।
Currently Selected:
रोमियो 2: DOG
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
