प्रकाशितवाक्य 8

सत्मी मोर, तुरहियाँ ते सुने दी ढेपट

1जेस ले उस्स ने सतवीं मोर खोली, ते सोर्ग बिच अधे कैणटे आसतै सन्‍नाटा छाई गीया। 2ओस बेलै आऊँ ओनें सत्तें सोर्गदूत गी दिखया जेड़े परमेसर दे समुक खड़ोते रैंदे न, ते उनेंगी सत तुरियां दिती गईयां।

3पी एक ते सोर्गदूत सुन्ने दा धूपदान लेते दे आया, ते बेदी दे कोल खड़ोई गीया; ते उसी मता तूफ दिता गीया के सारे पवित्र लोकें दी प्रार्थनाएं दे कन्ने सुन्ने दी उस्स बेदी उप्पर, जेड़े संहासन दे समुक न चढ़ान। 4उस्स तूफ दा तुंआ पवित्र लोकें दी प्रार्थना कन्ने सोर्गदूत दे हत्थे थमां परमेसर दे समुक पूजी गीया। 5ओस बेलै सोर्गदूत ने तूफदान लेईयै उस्स च के बेदी च अग्ग परी ते तरती उपर सुट्टी दिती; ते गर्जन ते शब्द ते बिजलियां ते पुंचाल ओना लगे।

6ओस बेलै ओ सत सोर्गदूत जिंदे कोल सत तुरियां हियां उनेंगी फुकने गी तयार ओए।

पैली तुरही

7पैले सोर्गदूत ने तुरी फुकी, ते खून कन्ने मिले दे ओलै ते अग्ग पैदा ओई, ते तरती उपर सुट्टी गई; ते तरती दी एक तिहाई जली गई, ते साड़े सैली काह बी जली गई।

दुई तुरही

8दुए सोर्गदूत ने तुरी फुकी, ते मनो अग्ग जेया जलदा एक पाड़ समुंद्र बिच सुट्या गीया; ते समुंद्र दा एक तिहाई खून ओई गीया, 9ते समुंद्र दे एक तिहाई लोग मरी गे, ते एक तिहाई चाज नाश ओई गै।

त्री तुरही

10त्रिये सोर्गदूत ने तुरी फुकी, ते एक बड़ा तारा जेहड़ा मशाल जेया जलदा हा, सोर्ग थमां टूटया, ते नदियें दी एक तिहाई उपर ते पानी दे सोते उपर आई पेया। 11उस्स तारे दा नां नागदौना ऐ; ते एक तिहाई पानी नागदौना जेया कोड़ा ओई गीया, ते मते सारे मनुक्ख उस्स पानी दे कोड़े ओनें दे कारन मरी गै।

चौथी तुरही

12चौथे सोर्गदूत ने तुरी फुकी, ते सूरज दी एक तिहाई, ते चण दी एक तिहाई ते तारें दी एक तिहाई उपर मसीबत आई, इत्थैं तकर के उंदा एक तिहाई अंग न्नेरा ओई गीया ते धयारे दी एक तिहाई च लो नेई रेई, ते उय्यां गै राती च बी।

13जेस ले आऊँ पी दिखया, ते अम्बर दे बिच एक उकाब गी उड़दा ते उच्चे शब्द कन्ने ए आखदे सुनया, “ऊन त्रै सोर्गदूतें दे तुरी दे शब्दें दे कारन, जिंदा फुकना अयें बाकी ऐ, तरती दे रैने आलें उपर ब्सोस बसोरा!”

Currently Selected:

प्रकाशितवाक्य 8: DOG

Highlight

Copy

Compare