इफिसियों 6

माता-पिता ते बच्चे

1ए बच्चयो, प्रभु च अपने माता-पिता दे उक्म गी मन्नो, किके ए बाजब ऐ। 2ए परमेसर दा उकुम ऐ के “अपने माता ते पिता दा आदर कर (ए पैला उक्म ऐ, जेसदे कन्ने बायदा बी ऐ), 3के तेरा पला उवै, ते तुगी तरती उपर लमी उम्र थूऐ।” 4ए बच्चें आलयो, अपने बच्चें गी गुस्सा नेई चड़ायो, लेकन प्रभु दी शिखया, ते सुधारदे ओई, उन्दा पालन-पोषण करो।

मालक ते दास

5ए दासो, जेड़े लोग दुनिया दे मताबक थुआड़े मालक न, अपने साफ़ मन कन्ने डरदे ते कंवदे ओई, जियां मसीह दा उयांगै उन्दा उक्म मन्नो। 6ते मनुक्खें गी खोश करने आलें आला लेखा दसने आसतै सेवा नेई करो, लेकन मसीह दे दासें आला लेखा मन कन्ने परमेसर दी मर्जी उपर चलो। 7ते ओस सेवा गी मनुक्खें दी नेई, लेकन प्रभु दी समझीयै सच्चे दिले कन्ने करो। 8किके तोस जांनदे ओ, के जेड़ा कोई जियां छैल कम करग, पवें दास उवै, पवें अजाद, प्रभु थमां उसी उवै नया गै प्रतिफल थोग। 9ए मालको, तोस बी धमकियां देना छुड़ीयै अपने दासें कन्ने उवै जियां शैल गै सलूक करो; किके तोस जांनदे ओ, के उन्दा ते थुआड़ा दौनीं दा मालक सोर्ग च ऐ, ते ओ कुसे दी तरफदारी नेई करदा।

आत्मिक योद्द दे थ्यार

10एस आसतै प्रभु च ते ओसदी शक्ति दे असर कन्ने तकड़े बनो। 11परमेसर दे सारे थ्यार कस्सी लियो के तोस शतान दी युक्तियें दा विरोध करी सको। 12किके साड़ा ए योद्द खून ते मास कन्ने नेई, लेकन प्रधानें कन्ने, ते अख्त्यार रखने आलें कन्ने, ते एस दुनिया दे न्हेरे दे मुखीयें कन्ने, ते ओस दुष्टता दी आत्मिक सैना कन्ने ऐ जेड़ी अम्बर च ऐ। 13एस लेई परमेसर दे सारे थ्यार कस्सी लियो के तोस बुरे दिनें च उन्दा मकाबला करी सको, ते सब केछ पूरा करियै टिके दे रेई सको। 14एस आसतै सच्च कन्ने अपना लक्क बन्नीयै, ते तार्मिकता दी झेलम लाईयै, 15ते पैरें च मेल कराने आलियां शोभ समाचार दी त्यारी दियां चपला लाईयै; 16ते उनै सारें थ्यारें कन्ने विश्वास दा बोर्ज लेईयै टिके दे रवो जेस कन्ने तोस ओस दुष्ट शतान दे सारे जलदे तीरें गी बझाई सको। 17ते उद्धार दी टोपी, ते आत्मा दी तलवार जेड़ा परमेसर दा वचन ऐ, लेई लियो। 18अर बेलै ते अर चाली कन्ने आत्मा च प्रार्थना, ते अर्ज करदे रवो, ते जागदे रवो के सारें पवित्र लोकें आसतै लगातार अर्ज करदे रवो, 19ते मेरे आसतै बी प्रार्थना करो के मिकी बोलने दे बेलै ऐसा इम्त आला वचन दिता जा के आऊँ दलेरी कन्ने शोभ समाचार दा पेद सनाई सकां, 20जेस आसतै आऊँ कैदखाने च सगंलें कन्ने बझे दा राजदूत ऐं; ते एबी के आऊँ ओदे बारै च जे नियां मिकी चाईदा दलेरी कन्ने बोलां।

खीरी नमश्कार

21तुखिकुस, जेड़ा प्यारा प्रा ते प्रभु च विश्वासजोग सेवक ऐ, तुसेंगी सारीयां गल्लां सनाग के तोस बी मेरी आलत जानो के आऊँ कियां रौना ऐं। 22उसी मैं थुआड़े कोल एस आसतै पेजे दा ऐ, के तोस साड़ी आलत गी जानो, ते ओ थुआड़े मनें गी शान्ति ते हिम्मत दियै।

23परमेसर पिता ते प्रभु यीशु मसीह थमां प्राऐं गी शान्ति ते विश्वास समेत प्यार मिलै। 24जेड़ा साड़े प्रभु यीशु मसीह कन्ने सच्चा प्यार करदे न, उन्दे सारें उपर क्रपा ओंदी रवै।

Currently Selected:

इफिसियों 6: DOG

Highlight

Copy

Compare