जकर्याह 9
9
इस्राएलो रे दुश्मणा खे सजा देणा
1हद्राक प्रदेशो रे बारे दे परमेशरो रा बोलेया रा सन्देस जो दमिश्क शईरो पाँदे बी पड़ना। कऊँकि परमेशरो री नजर माणूंआ ओर इस्राएलो रे सबी गोत्रा पाँदे लगी री। 2हमात शईरो रिया तरफा खे जो दमिश्क शईरो रे नेड़े ए ओर सोर ओर सिदोन शईरा रिया तरफा खे, यो तो बऊत ई अक्लमंद ए। 3सोर शईरो रे लोके आपणे शईरो रे चऊँ कनारे एक ऊच्ची दवाल खरी करी राखी ए। तिने बऊत सारा चाँदी ओर सूईना कट्ठा करी राखेया ए। 4देखो, परमेशरो से सारिया चीजा बारे काडी देणियां ओर सेयो ओरी रे कब्जे दे करी देणा ओर तेसरा ऊच्चा नाओं समुद्रो दे सेटी देणा। ओर बादो ते सोर शईर पूरी तरआ ते आगी दे फूखी देणा।
5अशकलोन शईरो रे लोका ये सब ऊँदे ऊए देखणा ओर बऊत डरी जाणे। गाजा शईरो रे लोक डरो रे मारे काँबी जाणे, ओर एक्रोन शईरो रे लोक बी काँबी जाणे कऊँकि तिना खे एबे ओर खुशिया री उम्मीद नि रणी। गाजा शईरो रा राजा कायी देणा ओर अश्कलोन शईर उजाड़ पड़ी जाणा। 6अशदोद शईरो पाँदे परदेशी लोका कब्जा करी लणा। मां पलिश्तिया रे तिना सबी शईरा रे लोका खे फेर कमण्ड नि करने देणा। 7तिना एबे आपणे बलि कित्ते रे डांगरा रा खून नि पीणा। मां तिना रे मुंए ते अशुद्ध खाणा काडी देणा। जो पलिश्ती बचणे सेयो म्हारे परमेशरो रे ऊणे। सेयो यहूदा दे एकी परिवारो जेड़े बणी जाणे। ओर एक्रोन शईरो रे लोक यबूसिया जेड़े ऊई जाणे। ईंयाँ पलिश्ती इस्राएलो रा इस्सा बणी जाणे। 8तेबे मां तेसा सेना रिया बजा ते जो नेड़े रिये ऊई की जाणी ओर फेर वापस आऊणी, आपणे मन्दरो रे नेड़े-तेड़े डेरे बणाई की रणा ओर कोई बी दुश्मण मेरे लोका खे यरूशलेम शईरो दे फेर कदी बी अराई नि सकणा, कऊँकि आऊँ इना गल्ला एबे बी देखूँआ।
सिय्योनो रा आऊणे वाल़ा राजा
9सिय्योन शईर, खुशिया मना! ओ यरूशलेम शईरो रे तर्मी लोको, जयजयकार करो! देखो, तुसा रा राजा तुसा गे आऊणे लगी रा। से सदा सई काम करोआ। तिने जीत आसिल करी राखी। से नम्र ए ओर गह्दे पाँदे बैठेया दा ए। से गह्दिया रे बच्चे पाँदे चढ़ी की आऊणा। 10मां एप्रैम इलाके दे लड़ाईया दे इस्तेमाल ऊणे वाल़े रथा ओर यरूशलेमो रे सारे लड़ाईया रे कोड़े नाश करी देणे। युद्धो दे इस्तेमाल ऊणे वाल़े सारे धनुष तोड़ी देणे। तुसा रे राजे घोषणा करनी कि तेस देशो दे सब कुछ खरा करना ओर देश शान्तिया साथे चलाणा। तेस भूमध्य समुद्रो ते लई की मृत समुद्रो तक, ओर फरात नदिया ते लई की तरतिया रे सबी ते दूर जगा तको रे इलाके पाँदे राज करना। 11ओ यरूशलेमो रे मेरे लोको, मां तुसा रे गुलाम लोक तिना रे दुश्मणा री कैदा ते छुड़ाणे। मां ये तेस खूनो रिया बजा ते करना जिने तुसा साथे मेरी वाचा पूरी करी राखी ए। 12ओ कैदियो, जो एबु बी उम्मीद लगाए दे ए, आपणी सुरक्षा रिया जगा खे वापस आई जाओ। एबे बी आऊँ घोषणा करूँआ कि मां तुसा खे पईले ते जादा सुख देणा। 13कऊँकि मैं धनुषो जेड़ा यहूदा चढ़ाई की तेस पाँदे तीरो जेड़ा एप्रैम लगाई राखेया। मां यरूशलेम शईरो दे रणे वाल़े यूनानो रे रणे वाल़ेया रे खलाफ उभारने ओर सेयो वीरो री तलवारी जेड़े करी देणे।
यहोवे आपणे लोक बचाणे
14तेबे परमेशर तिना पाँदे दिशणा ओर तेसरा तीर बिजल़िया जेड़ा छूटणा ओर परमेशर यहोवा नरसिंगा बजाई की दक्खण देशो रे जे तूफानो दे ऊई की चलणा। 15ओर सर्वशक्तिमान यहोवे आपणे लोका री मताद करनी। तिना आपणे दुश्मणा पाँदे बड़े-बड़े पात्थर सेटणे। जेबे तिना लड़ाईया दे जाणा, तो तिना बऊत जादा शराब पीणे वाल़ेया जेड़े जोरे-जोरे की चींगणा। सेयो तितणे ई खुशिया ते परी जाणे, जितणा पुरोईतो रा कटोरा खूने की परी जाओआ, जेबे से तेते खे वेदिया पाँदे लटोआ। 16तेस दिने, म्हारे परमेशर यहोवे आपणी प्रजा एड़े बचाणी जेड़े एक ग्वाल़ा आपणियां पेडा रे चूण्डो खे खतरे ते बचाओआ। आपणे देशो दे, सेयो मुकुटो पाँदे चमकणे वाल़े मणिया जेड़े ऊणे। 17तेसरी पलाई ओर सुन्दरता केड़ी अपार ए! तेसरे जवान लोक नज्ज खाई की ओर कुआँरिया नया शराब पी की तगड़े ऊई जाणे।
Currently Selected:
जकर्याह 9: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
