जकर्याह 6
6
चार रथ
1मैं फेर ऊबे देखेया ओर देखेया कि चार रथ मेरिया तरफा खे आऊणे लगी रे। सेयो दूई पाह्ड़ा बीचा ते आऊणे लगी रे थे जो पीतल़ी रे बणी रे थे। 2पईले रथो दे लाल कोड़े ओर दूजे दे काल़े ए। 3तीजे रथो रे सफेद ओर चौथे रथो दे तागतबर चिटकाबरे ओर बादामी रंगो रे कोड़े ए। 4तेबे मैं तेस स्वर्गदूतो ते जो मां साथे गल्ला करो था, पूछेया, “ओ मेरे परमेशर यहोवा, ये क्या ए?”
5स्वर्गदूते माखे बोलेया, “यो सर्गो रिया चार आत्मा ए जो सारी तरतिया रे परमेशरो गे आजीर रओईया, पर एबे निकल़ी की आई रिया। 6जेते रथो दे काल़े कोड़े ए, से उत्तर देशो रिया तरफा खे जाओआ ओर सफेद कोड़े तिना पीछे-पीछे जाओए ओर चिटकाबरे कोड़े दक्खण देशो रिया तरफा खे जाओए।” 7जेबे तागतबर ओर बादामी रंगो रे कोड़े बारे आए, तो सेयो तरतिया पाँदे फेरा लगाणे खे बऊत बेचैन थे। तेबे स्वर्गदूते बोलेया, “जाई की तरतिया पाँदे फेरा लगाओ।” इजी री खातर सेयो तरतिया पाँदे फेरा लगाणे लगे। 8तेबे स्वर्गदूते माखे आका पायी की बोलेया, “तिने बोलेया, सेयो जो उत्तर देशो रिया तरफा खे जाणे लगी रे, तिने यहोवे री आत्मा खे शान्ति देई राखी, कि तेस देशो दे सब कुछ शान्त ऊई जाओ।”
9तेबे परमेशरो रा एक ओर वचन मांगे पऊँचेया, 10तिने बोलेया, “हेल्दै, तोबिय्याह ओर यदायाह ते कुछ चाँदी ओर सूईना लई आओ। सेयो एबु-एबु बाबेलो ते वापस आई रे। तेस दिने ई योशिय्याह रे कअरे जाओ। से सपन्याह रा पाऊ ए।” 11तिना रे आथो ते सूईना, चाँदी लओ ओर तीजी ते मुकुट बणाई की तिना खे यहोसादाको रे पाऊ यहोशू बेड़े पुरोईतो रे सिरो पाँदे राख। 12यहोशूए खे ये बोल, “सेना रा यहोवा ईंयाँ बोलोआ कि तेस मर्दो खे देख जेसरा नाओं शाख#6:12 शाख पाँगटी ए, तेस आपणी जगा देई पैदा ऊई की परमेशरो रा मन्दर फेर बनाणा। 13तेस यहोवे रा मन्दर बनाणा ओर महिमा पाणी। तेस राजे रे टाल्ले पईनणे मानो से तेसरा शाही टाल्ला ओ। से राजे रे रूपो दे सिंहासनो पाँदे बैठणा। से तेती एक पुजारी बी ऊणा। ईंयाँ से राजा ओर पुरोईत दुनी पदा पाँदे आपू ई ऊणा।” 14तेबे सेयो मुकुट हेलेम, तोबिय्याह, यदायाह ओर सपन्याह रे पाऊ हेनो खे मिले ओर सेयो परमेशरो रे मन्दरो दे यादगार बणे दे रये। 15तेबे दूर-दूरा री जगा ते लोका आई-आई की परमेशरो रे मन्दरो रे बनाणे दे मताद करनी ओर तुसा खे पता लगी जाणा कि सेना रे परमेशरे आऊँ तुसा गे पेजी राखेया ओर जे तुसे मन लगाई की आपणे परमेशर यहोवे री आज्ञा खे मानोगे, तो ये गल्ल पूरी ऊणी।
Currently Selected:
जकर्याह 6: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
