जकर्याह 11
11
1ओ लबानोनो रे लोको, आपणे द्वार खोलो, ताकि आग तुसा रे देवदारा रे डाल़ा खे फूकी देयो! 2ओ सनौबरो रे डाल़, हाय, हाय, कर! कऊँकि तागतबर देवदार टल़ी गा रा ओर सबी ते बांके डाल़ नाश ऊईगे रे! बाशान इलाके रे बड़े डाल़ा खे बी रोणा चाईयो, कऊँकि बणो रे ओर सारे डाल़ बाडी ते दे ए। 3ग्वाल़ेया री जोरे-जोरे की आका पाणे री आवाज सुणो, कऊँकि तिना रा वैभव नाश ऊईगा रा! जवान शेरा रा दहाड़ना सुणने लगी रा, कऊँकि यरदन नदिया रे कनारे रा कणा बण नाश करी ता रा!
दो ग्वाल़े
4मेरे परमेशर यहोवा ये आज्ञा दित्ती : “तिना पेडा री देखपाल़ करो जिना खे बलि करने खे लग राखी राखेया ए।” 5जो लोक तिना खे खरीदो ए, सेयो तिना खे कायी देओए ओर आपू खे दोषी नि समजदे, ओर बिना सजा ते चली जाओए; ओर जो लोक तिना खे बेचो ए, सेयो बोलोए, परमेशर तन्य ए, आसे अमीर ऊईगे, ओर तिना रे गवाल़े तिना पाँदे कोई दया नि करदे। 6परमेशरो री ये बाणी ए कि मां एस देशो रे रणे वाल़ेया पाँदे बी दया नि करनी। देखो, मां माणूं एकी-दूजे रे आथो दे ओर तिना रे राजे रे आथो दे पकड़वाई देणे ओर तिना ये देश नाश करना ओर मां कोई बी तिना री शक्तिया ते नि बचाणा। 7इजी री खातर मां पेडा रे बपारिया रे जरीये बलि करने वाल़े दीन चूण्डो रा ग्वाल़ा बणीगा। मैं दो डण्डे लये, एकी रा नाओं मैं दया ओर दूजे रा नाओं एकता राखेया। ओर आऊँ पेडा री देखपाल़ करने लगेया। 8पर मां साथे काम करने वाल़े तीन ग्वाल़े मांते नफरत करने लगे, ओर आऊँ तिना ते परेशान ऊईगा। एकी मीन्ने रे पीतरे ई मैं तिना ग्वाल़ेया रा नाश करिता। 9तेबे मैं तिना खे बोलेया, “मां तुसा रा ग्वाल़ा नि बणना। तुसा बीचा ते जो मरो सेयो मरो ओर जो नाश ओ सेयो नाश ओ ओर जो बची की रओगिया, सेयो एकी-दूजे रा मास खाओ।” 10तेबे मैं आपणा से डण्डा तोड़ी ता, जेसरा नाओं दया था कि जो वाचा मैं सबी दूजी जातिया साथे बानी थी, तिजी खे तोड़ूँ। 11ये तेस दिने ई ऊआ। जिना पेडा साथे बुरा बर्ताओ ऊआ था, सेयो माखे देखणे लगी रिया थिया। सेयो जाणो थिया कि ये प्रभुए री आज्ञा ए। 12तेबे मैं तिना खे बोलेया, “जे तुसा खे अच्छा लगो, तो मेरी मजदूरी देयो ओर जे नई तो मत देयो।” तेबे तिने मेरी मजदूरिया रे चाँदिए रे तीई सिक्के तोली की माखे दित्ते। 13तेबे परमेशरे माखे बोलेया, “इना खे कुम्हारो ते आगे सेटी दे” ये रकम दखाओई कि तिने मेरी कितणी कम इज्जत कित्ती! इजी री खातर मैं सेयो तीई चाँदिए रे सिक्के प्रभुए रे मन्दरो दे कुम्हारो खे देईते। 14तेबे आपणा दूजा डण्डा तोड़ेया जेसरा नाओं एकता था, ईंयाँ मैं यहूदा ओर इस्राएलो रे लोका बीचे पाईचारा तोड़ी ता। 15तेबे परमेशरे माखे बोलेया, “एबे तूँ मूर्ख ग्वाल़े रे अथियार लई लो। 16कऊँकि देखो, आऊँ एस देशो दे एक एड़ा ग्वाल़ा खड़ा करने वाल़ा ए, जेस नाश ऊणे वाल़ेया री कोई चिन्ता नि करनी, न बच्चे टोल़ने, न टूण्डे ठीक करने, ओर ना ठीक-ठाक लोका री देखपाल़ करनी, पर मोटेया रा मास खाया जाणा, एथो तक कि तिना रे खुर बी नोची-नोची की खाणे। 17लाणत ए तेस नकम्मे गवाल़े पाँदे जो पेडा-बाकरिया खे छाडी जाओआ! तलवारा तेसरी खूँजी बाँ बाडी देणी ओर तेसरी दाँणी आख फोड़ी देणी। तेसरी बाँ बेकार ऊई जाणी ओर तेसरी दाँणी आख पूरी तरआ ते फूटी जाणी।”
Currently Selected:
जकर्याह 11: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
