रोमियों 9

परमेशर और तिना रे चूणे रे लोक

1आऊँ मसीह रे सच्च बोलूँआ, चूठ नि बोलदा और मेरा विवेक बी पवित्र आत्मा रे गवाई देओआ 2कि माखे बऊत दु:ख ए और मेरा मन मेरे लोका री खातर दु:खदा रओआ। 3कऊँकि आऊँ एथो तक चाऊँ था कि आपणे यहूदी पाईया खे, जो शरीरो ते मेरे टब्बरो रे ए, आपू ई मसीह ते स्रापित और लग ऊई जांदा। 4सेयो बी मां ई जेड़े इस्राएली लोक ए। सेयो लोक बी परमेशरो रे चूणे रे गोदीपुत्र ए। परमेशरे आपणी महिमा तिना लोका पाँदे प्रकट कित्ती। तिने तिना लोका साथे वाचा बानी और आपणा बिधान दित्तेया। परमेशरो तिना लोका खे आपणी भक्ति करने खे और आपणा नौखा वादा पाणे खे खास अक्क दित्तेया। 5मशूर पूर्वज बी तिना रेईए और मसीह बी शरीरो रे भावो ते तिना ई बीचा ते ऊआ। से परमेशर ए जो सबी पाँदे राज करोआ तेसरी तारीफ जुगो-जुगो ऊँदी रओ। आमीन्।

6फेर बी ये नि समजणा चाईयो कि परमेशर आपणा वादा निबाणे रे असफल ऊईगा रा। कऊँकि इस्राएलो रे वंशो रे जन्म लणे वाल़े सब लोक सच्चे इस्राएली निए। 7अब्राहमो रे वंशो रे जन्म लणे तेई सब परमेशरो री सच्ची ल्वाद नि बणी जांदे। कऊँकि परमेशरे अब्राहमो खे बोलेया, “जिना इसहाको रे वंशो ते जन्म लणा सेयो ई तेरे वंशो रे माने जाणे।” 8इजी रा मतलब ये ए कि शरीरो ते जम्मे रे परमेशरो री ल्वाद निए, पर वादे रे जरिए जम्मे रेई अब्राहमो रे असली वंश गिणे जाओए। 9कऊँकि वादे रा वचन ये ए, “आगले साल एस बखते मां फेर आऊणा और सारा रे एक पुत्र ऊणा।”

10और बस येई नि, पर जेबे रिबका रे गर्भो रे एकी मर्द मतलब आसा रे पुर्वज इसहाको ते जुड़ुवा बच्चे थे। 11और एबुए तक ना बाल़क जम्मी रे थे और ना तिने कुछ पला या बुरा कित्तेया रा था कऊँकि परमेशरो री इच्छा, जो तेसरे चूणे रे मुताबिक ए, कर्मो री बजअ ते नि, पर बुलाणे वाल़ेया री बजअ ते बणी रओ। 12तिने बोलेया, “जेठा छोटे रा दास ऊणा।” 13जेड़ा पवित्रो शास्त्रो रे लिखी राखेया, “मैं याकूबो खे प्यार कित्तेया, पर एसाव अप्रिय जाणेया।”

14तो आसे क्या बोलूँ? क्या परमेशरो रे कअरे अन्याय ए? कदी पनि। 15कऊँकि परमेशरे मूसे खे बोलोआ,

“आऊँ जेस केसी पाँदे बी दया करना चाऊँ, तेस पाँदे दया करूँआ,

और जेस केसी पाँदे कृपा करना चाऊँ, तेस पाँदे ई कृपा करूँआ।”

16इजी खे ये माणूंआ री इच्छा या तेसरी मईणती पाँदे निर्भर नि करदे, बल्कि दया करने वाल़े परमेशरो पाँदे निर्भर रओए और जेसखे से चुणना चाओआ तेस पाँदे दया करोआ। 17कऊँकि पवित्र शास्त्रो रे मिस्रो रे राजा फिरौनो खे बोलेया था, “मैं तूँ इजी खे राजा बणाया ताकि आऊँ तांदे आपणी सामर्थ दखाऊँ और मेरे नाओं रा प्रचार सारी तरतिया रे ओ।” 18तो परमेशर जेस पाँदे चाओआ, तेस पाँदे दया करोआ और जेसखे चाओआ, तेसखे हठी बणाई देओआ।

परमेशरो रा रोष और तिना री कृपा

19तेबे कुछ लोका माखे बोलणा, “जे एड़ा ए तो परमेशरो किंयाँ आसा खे दोषी ठराई सकोआ? कऊँकि कोई बी तिना खे रोकी नि सकदा जो से करना चाओआ।” 20ओ पाई! पला तूँ कुण ए, जो परमेशरो ते बईस करी करोआ? क्या कअड़ी री चीज, कअड़णे वाल़ेया खे बोली सकोई कि तैं आऊँ एड़ी कऊँ बणाई राखी? 21क्या कम्मारो खे माट्टिया पाँदे अक्क निए कि एक ई चाको पाँदो ते, एक पांडा खास कामो रे इस्तेमालो खे और दूजा हर रोज इस्तेमाल करने खे बणाओ?

22हालाँकि परमेशरो खे आपणा रोष और आपणी सामर्थ प्रगट करने रा अक्क ए, फेर बी से तिना लोका साथे बऊत ई सब्र राखोआ, जिना पाँदे तिना रा रोष आओआ और जो विनाशो खे त्यार कित्ते थे। 23तिने एड़ा इजी खे कित्तेया कि दया रे तिना पांडेया पाँदे आपणी महिमा री शान प्रकट करना चाओ था जो तिने पईले तेई तेसा महिमा खे त्यार कित्ते। 24मतलब आसा पाँदे जिने तिने ना बस यहूदिया बीचा ते, बल्कि दूजी जातिया बीचा ते बी बुलाया। 25जेड़ा परमेशर होशे भविष्यवक्ता री कताबा रे बी दूजिया जातिया रे बारे रे बोलोआ,

“जो मेरी प्रजा नि थी, तिना खे मां आपणी प्रजा बोलणा

और जो प्यारी नि थी, तिना खे प्यारा बोलूँगा।”

26और,

“एड़ा ऊणा कि जेते जगा रे तिना खे एड़ा बोलेया था कि

‘तुसे मेरी प्रजा निए,’

तेते जगा रे सेयो ‘जिऊँदे परमेशरो री ल्वाद ऊणे।’ ”

27और यशायाह भविष्यवक्ता इस्राएली लोका रे बारे रे आक्का पाई की बोलोआ,

“चाए इस्राएलिया रे ल्वादा री गिणती समुद्रो रे बालूए रे बराबर ओ,

तेबे बी तिना बीचा ते थोड़े ई बचणे।

28कऊँकि प्रभुए आपणा वचन तरतिया रे पूरा करी की

धार्मिकता ते चट ई तरतिया रे लोका रा न्याय करना।”

29जेड़ा यशायाह भविष्यवक्ते पईले बी बोलेया था,

“जे सेनाओं रा प्रभु,

आसा खे कोई वंश नि छाडदा,

तो आसे सदोमो जेड़े ऊई जाणे थे

और गमोरा जेड़े ठईरने थे।”

इस्राएलो रा अविश्वास

30तो आसे क्या बोलूँ? ये कि दूजी जाति, जो तर्मो खे नि टोल़ो थे, तिना खे धार्मिकता मिली, मतलब तेसा धार्मिकता खे जो विश्वासो ते ए। 31पर इस्राएली लोक जो तर्मो रे बिधानो खे टोल़दे ऊए, तर्मी बणने रे सफल नि ऊए। 32किजी खे? इजी री खातर कि सेयो विश्वासो ते नि, पर मानो अच्छे कामा ते तेसखे टोल़ोए, तिने तेस ठोकरा रे पात्थरो पाँदे ठोकर खाई। 33जेड़ा पवित्र शास्त्रो रे लिखी राखेया,

“देखो, आऊँ सिय्योन नगरो रे एक ठोकर लगणे रा पात्थर

और ठोकर खाणे री जान राखूँआ

और जेस तेस पाँदे विश्वास करना, से शर्मिंदा नि ऊणा।”

Currently Selected:

रोमियों 9: BGH

Highlight

Copy

Compare