पजन 22
22
माणूंए रे मनो री पुकार ओर स्तुतिगान
बजाणे वाल़े परदानो रिया तँईं अभ्येलेरशर रागो दे दाऊदो रा पजन
1ओ मेरे परमेशर! ओ मेरे परमेशर!
तैं आऊँ कऊँ छाडीता?
तूँ मेरी मताद कऊँ नि करदा?
तूँ मेरी पुकार कऊँ नि सुणदा? तूँ माखे कऊँ नि बचांदा?
2ओ मेरे परमेशर! आऊँ ताखे दिने आका पाऊँआ,
पर तूँ ज्वाब नि देंदा
ओर राती बी आऊँ चुप नि रंदा।
3पर तूँ तो इस्राएलो री स्तुतिया रे सिंहासणो पाँदे विराजमान ए,
तूँ तो पवित्र परमेशर ए।
4म्हारे बुजुर्ग तां ई पाँदे परोसा राखो थे;
सेयो परोसा राखो थे
ओर तूँ तिना खे खतरेया ते बचाए था।
5तिने तूँई पुकारेया ओर तैं सेयो छुड़ाए
ओर सेयो तां ई पाँदे परोसा राखो थे
ओर सेयो कदी शर्मिंदा नि ऊए।
6पर तैं आऊँ नि बचाया,
लोक माखे नबाग समजोए ओर तिना रा बचार ए कि आऊँ एक माणूं नि आ,
पर एकी कीड़े जेड़ा बेकार ए!
7माखे देखणे वाल़े सब जणे मेरा मजाक उडाओए
ओर ओठ चबाओए
ओर सिर ईलाई की ओर मेरी बेजती करोए ओर बोलोए,#22:7 मत्ती 27:39, मरक 15:29
8“से यहोवे पाँदे परोसा करोआ ओर बोलोआ,
कि यहोवा तेसते बऊत खुश ए;
जे एड़ा ए, तो सेई एसखे छुड़ाओ ओर मताद करो!”#22:8 पजन. 91:14
9से तूँई था जिने आऊँ गर्भो ते निकयाल़ेया;
जेबे आऊँ दूद पींदा बच्चा था,
तदुए तेई तैं माखे परोसा राखणा सिखाया।
10आऊँ जन्मो तेई तांगे सम्बाल़ी ता था,
माया रे गर्भो तेई तूँई मेरा परमेशर रया।
11मांते दूर नि ओ कऊँकि मुसीबत नेड़े ए
ओर कोई मेरी मताद करने वाल़ा नि ए।
12मेरे दुश्मण बणो रे बल़दा रे चूण्डो जेड़े मेरे चऊँ कनारे ए।
सेयो बाशान देशो रे साँडा जेड़े बऊत तागती वाल़े ए ओर तिने मेरे चऊँ कनारे केरा पाई राखेया।
13सेयो फाड़ने ओर गरजणे वाल़े शेरो जेड़े ए,
तिने मेरी तरफा खे आपणा मूँ खोली राखेया।
14आऊँ पुरिया तरआ ते थकी गा रा
ओर मेरी सारी आड्डिया रे जोड़ उखड़ी गे;
आऊँ एबे ये उम्मीद नि करदा कि परमेशर माखे बचाओगा;
ये उम्मीद पुरिया तरआ ते चली गी री ए जिंयाँ मोम जो गल़ी गा रा ए।
15मेरी तागत टूटे रे माट्टिया रे पांडे जेड़ी सूकी गी ए,
ओर मेरी जीब मेरे ताल़ूए साथे चिपकी गी ए।
परमेशर, तैं आऊँ छाडीता रा ए कि आऊँ मरी की माट्टिया दे मिली जाणा।#22:15 नसी 17:22 अय्यू. 7.21; पजन 7.5, 90.3
16मेरेया दुश्मणे आऊँ चऊँ कनारा ते केरी ला कटणे वाल़े कुत्तेया रे चूण्डो जेड़ा,
तिने मेरे आथ-पैर कटी ते दे।#22:16 मत्ती 27:35, मरक 15:29, लूक 23:33
17आऊँ आपणी एक-एक आड्डी गिणी सकूँआ;
मेरे दुश्मण माखे कूरदे ऊए मेरा मजाक उडाणे लगी रे।
18तिने मेरे टाल्ले आपू बीचे बांडी ले
ओर मेरे टाल्लेया पाँदे चिट्ठी पाई।#22:18 मत्ती 27:35, लूक 23:34, यहून् 19:24,25
19पर ओ प्रभु तूँ दूर नि रओ!
ओ मेरी मताद करने वाल़े, बिना देर कित्ते मेरी मताद कर!
20तलवारी ते ओर कुत्ते रे पंजे ते मेरे प्राणो खे बचाई लओ!
21माखे शेरो रे मुंए ते बचा,
जंगल़ी सांडो रे सींगा ते तैं आऊँ बचाई ला रा।
22मां आपणे इस्राएली पाईया सामणे तेरे नाओं रा प्रचार करना;
सभा बीचे मां तेरी तारीफ करनी।#22:22 इब्रानी 2:12
23ओ यहोवे रा डर मानणे वाल़ेयो, तेसरी स्तुति करो!
ओ याकूबो रे वंशो रे लोको तुसे सब तेसरी महिमा करो!
ओ इस्राएलो रे वंशो रे लोको, तेसरी पग्ती करो!#22:23 पजन 135:19,20
24कऊँकि प्रभुए दु:खी माणूंए रा बेज्जती नि कित्तेया
ओर ना तेसते कृणा कित्ती ओर ना तेस दु:खी माणूंए ते आपणा मूँ लकोया;
पर जेबे तिने माणूंए प्रभुए री दुहाई दित्ती, तेबे तिने तेसरी सुणी ली।
25बड़ी सभा रे मेरा स्तुति करना तेरिया ई तरफा ते ओआ;
मां तेरे पग्ता रे सामणे आपणी मान्नत पूरी करनी।
26नम्र लोक रोटी खाई की रजणे;
प्रभुए खे टोल़ने वाल़ेया प्रभुए री स्तुति करनी।
सेओ सदा जिऊँदे रओ!
27तरतिया रे सबी दूर-दूर देशो रे लोका प्रभुए रा नाओं याद करना
ओर तेसरी तरफा खे फिरने
ओर हर जातिया रे लोका तेरी आराधना करनी।
28कऊँकि राज्य प्रभुए रा ईए
ओर सबी देशा पाँदे सेई राजा ए।#22:28 जकर्याह. 14:9
29पक्का, तरतिया रे सारे कमण्डी लोक प्रभुए रे सामणे चुकणे;
सेयो सब जो माट्टिया रे मिली जाओए
ओर जो आपणा प्राण नि बचाई सकदे,
तिना सबी यहोवे रे सामणे ई कुटणे टेकणे।
30एकी पीढ़िया रे लोका तेसरी सेवा करनी;
दूजी पीढ़िया रे लोका प्रभुए रे बारे बताणा।
31सेयो आऊणे ओर तेसरी तार्मिकता रे काम एकी वंशो पाँदे जो पैदा ऊणा,
ये बोली की प्रगट करने कि तिने एड़े-एड़े अचम्बे रे काम कित्ते।
Currently Selected:
पजन 22: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
