पजन 16

परमेशर मेरा पाअग

दाऊदो रा मिक्ताम

1ओ परमेशर मेरी रक्षा कर,

कऊँकि मेरा परोसा सिर्फ तां ई पाँदे ए।

2मैं प्रभुए खे बोलेया, “तूँ ई मेरा प्रभु ए,

मांगे जो कुछ अया से यो सारिया खरिया चीजा तांते ई मिली रिया ए।”

3तरतिया पाँदे जो पवित्र लोक ए,

सेयो ई आदरो जोगे ए

ओर तिना तेई आऊँ खुश ए।

4जो माणूं ओरी देवतेया रिया तरफा खे दौड़ोए, सेयो आपू पाँदे कई दु:ख लयाओए;

मां तिना रे खूनो वाल़े अर्घो दे इस्सा नि लणा;

मां तिना रे देवतेया री पग्ति नि करनी।

5तूँ ई प्रभु, जो मैं चूणी राखेया, तेरे बगैर मेरी पलाई केथी नि ए।

ओर तुसे माखे से सब देई राखेया जो जरूरी ए;

मेरा भविष्य तेरे ई आथो दे ए।

6यहोवे माखे एक नौखी जगा रणे खे देई राखी;

तिने माखे जो कुछ देई राखेया,

तिजी ते आऊँ खुश ए।

7आऊँ प्रभुए खे तन्य बोलूँआ,

कऊँकि तिने माखे सलाअ दित्ती;

बल्कि मेरा मन बी राती माखे सिखाओआ।

8आऊँ जाणूंआ कि यहोवा मां साथे ए।

से मेरे नेड़े ई ए; इजी री खातर कुछ बी माखे चिन्ता करने री गल्ल नि ए।

9इजी बजा ते आऊँ बऊत खुश ए;

आऊँ सई-सलामत रई सकूँआ। मेरी आत्मा खुश ए।

10आऊँ तेरे जरिये चुणेया दा माणूं ए।

तां आऊँ कब्रा दे नि छाडणा या मेरा शरीर सड़ने नि देणा। तां मेरा प्राण अधलोको दे नि छाडणा ओर ना तां आपणा पग्त सड़ने देणा।#16:10 तेरा वफादार सेवक यीशु मसीह

11तां माखे से बाट दखाणी;

जो अनन्त जीवनो रिया तरफा खे जाओई;

तेरी मौजुदगिया रे माखे आनंद ओर सदा री खुशी मिलोई।#16:11 प्रेरित 2:25-28

Currently Selected:

पजन 16: BGH

Highlight

Copy

Compare