नसीअता 24
24
1बुरेया लोका रे बारे ईर्ष्या नि करनी,
ओर ना ई तिना री संगतिया री इच्छा राखणी;
2कऊँकि सेयो लड़ाई-चगड़ेया रे बारे सोचदे रओए,
ओर हर बखत सेओ आपणियां गल्ला ते दूजेया खे बुरिया ई गल्ला बोलदे रओए।
3कअर बुद्धिया ते बणोआ ओर से समजा रे जरिये स्थिर रओआ।
4ज्ञानो रे जरिये कोठरिया सब प्रकारा रे कीमती
ओर मनो खे अच्छे लगणे वाल़ी चीजा ते परी जाओईया।
5अक्लमंद माणूं तागतबर बी ओआ,
ओर ज्ञानी जादा शक्तिशाली ओआ।
6इजी री खातर जेबे तूँ युद्ध करे, तेबे योजना साथे करेया,
जीत बऊत सारे मन्त्रिया रिया बजा ते मिलोई।
7मूर्ख माणूंए खे बुद्धिया रिया गल्ला तेसरिया समजा ते बारे ओईया।
से सबा बीचे आपणा मूँ नि खोली सगदा
8जो माणूं सोची समजी की बुराई करोआ,
तेसखे लोक दुष्ट ई बोलोए।
9मूर्खता रिया गल्ला खे सोचणा बी पाप ए,
ओर मजाक उडाणे वाल़े माणूंए ते लोक नफरत करोए।
10जे तूँ विपत्तिया रे बखते याओ छाडी दे,
तो तांदे तागत बऊत कम ए।
11जो बिना मतलबो ते मारने खे कसीटे जाओए,
तिना खे बचाणे खे पीछे नि हट।
12जे तूँ बोले कि देख, आऊँ एसखे नि जाणूं था,
तो क्या मनो खे परखणे वाल़ा इजी खे नि जाणदा?
क्या तेरे प्राणो री रक्षा करने वाल़ा इजी खे नि जाणदा?
क्या तेस हर माणूंए खे तेसरे कामो रा फल नि देणा?#24:12 मत्ती 16:27, रोमी 2:6, प्रकाशित 2:23, प्रकाशित 22:12
13ओ मेरे पाऊ तूँ सईत खा, कऊँकि से ताखे अच्छा ए,
कऊँकि से ताखे खाणे दे बऊत मीठा लगणा।
14ईंयाँ ई बुद्धि बी ताखे मीठी लगणी,
जे ताखे से मिली जाओ तो अन्तो रे तिजी रा फल बी मिलणा ओर तेरी उम्मीद नि टूटणी।
15ओ दुष्ट माणूं, तूँ तर्मी माणूंए रा कअर नाश करने रिया ताका रे नि बैठ;
ओर तेसरे राम करने री जगा खे नि ज्वाड़;
16कऊँकि तार्मिक माणूं विपत्तिया दे सात बार पड़ोगा तो से फेर खड़ा ऊई जाओआ,
पर दुष्ट लोक विपत्तिया रेई पड़े रे रओए।
17जेबे तेरा दुश्मण ठोकर लगी की रूड़ी जाओ, तेबे तैं खुश नि ऊणा,
ओर जेबे से ठोकर खाओ, तेबे बी तैं खुश नि ऊणा।
18केथी एड़ा नि ओ कि यहोवा ताखे एड़ा करदे ऊए देखी की उदास ओ
ओर आपणा गुस्सा तेरेया दुश्मणा पाँदा ते टाई देओ।
19बुरे काम करने वाल़ेया ते नि कुढ़,
दुष्ट लोका रिया बजा ते ईर्ष्या नि कर;
20कऊँकि बुरेया माणूंआ साथे कुछ बी खरा नि ऊँदा,
सेओ एक दिऊए जेड़े चट ई बिजी जाणे।
21ओ मेरे बच्चेयो, यहोवा ओर राजा दुँईं रा आदर करना,
ओर तिना रे खलाफ बगावत करने वाल़ेया साथे नि जाणा,#24:21 1 पत 2:17
22कऊँकि तिना पाँदे अचाणक आफ्त आऊणी,
ओर दुँईं रिया तरफा ते आऊणे वाल़ी आफ़्ता खे कुण जाणोआ?
अक्लमंदा रिया ओर बी गल्ला
23अक्लमंदा रिया गल्ला यो बी आ।
न्याय करदे ऊए केसी रा बी पक्षपात करना, किंयाँ बी अच्छा नि ए।
24जो न्याय करने वाल़ा दुष्टो खे बोलोआ कि तूँ बेकसुर आ,
तेसखे प्रजा रे लोक स्राप देओए, ओर जातिया-जातिया रे लोक तेसते घृणा करोए;
25पर जो न्यायी दुष्टो खे सजा देओए, तिना रा पला ओआ,
ओर खरे ते खरा आशीर्वाद तिना पाँदे आओआ।
26जो सच्चा माणूं ओआ से सिदा सीदा जबाव देओआ।
27पईले आपणा बारला काम पूरा करना,
ओर डोरू बी त्यार करी लणा, तिजी ते बाद आपणा कअर बनाणा।
28बिना बजा ते आपणे पड़ोसिये रे खलाफ गवाई नि देणी,
ओर ना से बईकेरना।
29एड़ा नि बोलणा कि जेड़ा तिने मां साथे कित्तेया, तेड़ा ई मां बी तेस साथे करना,
ओर तेसखे तेसरे कित्ते री सजा देणी।
30आऊँ एक दिन आल़सिये रे डोरूए रिये ऊई की
ओर मूर्ख माणूंए रे अंगूरा रे बगीचे रिये ऊई की गया,
31तो मैं क्या देखेया कि तिना रे डोरुए दे कांडेया रे जाड़ जमीं गे रे;
ओर से जमीन चींयाँ साथे टखी गी री ओर तिजी री पात्थरा री दवाल टल़ीगी री।
32तेबे मैं ये सब देखी कि त्यानो रे सोचेया;
तो माखे तेस देखी की ये शिक्षा मिली।
33एक ओर छोटी जी नींज, एक ओर टमका,
थोड़ी जी देर छातिया पाँदे आथ राखी की लेटे रे रणा,
34तो जिंयाँ एक डाकु अमला करी की सब कुछ लूटी लओआ,
ठीक तिंयाँ ई तां पाँदे अचाणक गरीबी आई जाणी।
Currently Selected:
नसीअता 24: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
