गिणती 6
6
यहोवे रिया तँईं लग रणे रा बिधान
1तेबे यहोवे मूसे खे बोलेया, 2“इस्राएलिया खे बोल कि जेबे कोई मर्द या जवाणस नाज़ीर#6:2 नाज़ीर यहोवे री सेवा रिया तँईं लग कित्तेया रा माणूं यहोवे रिया तँईं आपू खे लग करी की राखणे री खास मान्नत मानो, 3तेबे से अंगूरा रे रसो ओर शराबो ते लग रओ ओर से ना अंगूरा रा ना शराबो रा सिरका पियो ओर ना ई दाखा रा कुछ रस पियो, बल्कि दाख बी नि खाओ, से चाए अरी ओ चाए सूकी ओ।#6:3 लूक 1:15 4जदुओ तक से यहोवे रिया तँईं मान्नता करी की आपणे आपू खे लग करी की राखो तितणे दिना तक से अंगूरा रे बीजो ते लई की छिलकेया तक कुछ नि खाओ।”
5फेर जितणे दिना तक तिने लग रणे री मान्नत मानी राखी ओ तितणे दिना तक से आपणे सिरो रे कैंची या उस्तरा नि लगाओ ओर जदुए तक सेयो दिन पूरे नि ओ जिना रे से यहोवे रिया तँईं लग रओ तदुओ तक से पवित्र रणा ओर आपणे सिरो रे बाल़ बढ़ाई की राखो।#6:5 प्रेरित 21:23, 24:2 6मान्नत मानणे वाल़ा माणूं जितणे दिन से यहोवे रिया तँईं लग रओ तितणे दिना तक केसी लोथा रे नेड़े नि जाओ। 7जेबे तेसरा बाओ या माए या पाई या बईण बी मरो तेबे बी से तिना री बजअ ते अशुद्ध नि ओ; कऊँकि आपणे परमेशरो खे लग रणे रा चिह्न तेसरे सिरो पाँदे ऊणा। 8आपणे लग रणे रे सारे दिना रे से यहोवे रिया तँईं पवित्र बणेया रा रओ।
9जे कोई तेसगे अचाणक मरी जाओ ओर तेसरे लग रणे रा जो चिह्न तेसरे सिरो पाँदे ऊणा से अशुद्ध ऊई जाओ, तो से शुद्ध ऊणे रे दिने मतलब 7 वे दिने आपणा सिर कपाओ। 10ओर 8 वे दिने से दो कूगी या कबूतरिया रे दो बच्चे मिलणे वाल़े तम्बूए रे दरवाजे पाँदे पुरोईतो गे लई जाओ, 11फेर पुरोईत एकी खे पापबलि ओर दूजे खे होमबलि करी की मान्नता वाल़े माणूंए खे प्राश्चित करो, कऊँकि से लोथा गे रई की पापी ठईरेया ओर पुरोईत तेसी दिने तेसरा सिर फेर पवित्र करो, 12ओर से आपणे लग रणे रे दिना खे फेर यहोवे खे लग ठराओ, ओर एकी सालो रा एक पेडा रा बच्चा दोषबलि करी की ली आओ ओर जो दिन इजी ते पईले बीतीगे सेयो बेकार गिणे जाओ, कऊँकि तेसरे लग रणे रा चिह्न अशुद्ध ऊईगा।
13फेर जेबे नाज़ीरो रे लग रणे रे दिन पूरे ओ, तेस बखतो खे तिजी रा येई बिधान ए; मतलब से मिलणे वाल़े तम्बूए रे दरवाजे पाँदे पऊँचाया जाओ, 14फेर से यहोवे रिया तँईं होमबलिया खे एकी सालो रा बिना नुक्शो रा पेडा रा बच्चा ओर पापबलिया खे एकी सालो री एक बिना नुक्शो री पेडा री बच्ची ओर मेलबलिया खे एक बिना नुक्शो रा खाडू चढ़ाणे खे ल्याऊणा, 15ओर बिना सजेड़े री रोटिया री टोकरी परी की तेलो साथे बणे रे मैदे रे फुलके ओर तेलो साथे चोपड़ी री बिना सजेड़े री पापड़िया ओर तिना बलिया रे नज्जो री बलि ओर अर्घ; ये सब चढ़ावे नेड़े लई जाओ। 16इना सबी खे पुरोईत यहोवे रे सामणे पऊँचाई की तेसरे पापबलि ओर होमबलि चढ़ाओ, 17ओर बिना सजेड़े री रोटिया री टोकरिया समेत खाडूए खे यहोवे रिया तँईं मेलबलि ओर तेसा मेलबलिया साथे नज्जो री बलि ओर अर्घो खे बी चढ़ाओ। 18तेबे नाज़ीरो खे आपणे लग रणे रे चिह्नो वाल़े सिरो रे बाल़ मिलणे वाल़े तम्बूए रे दरवाजे पाँदे कटवाई की तिना बाल़ा खे तेते आगी रे पाई देओ जो मेलबलिया निठे बल़ी री ऊणी। 19फेर जेबे नाज़ीर आपणे लग रणे रे चिह्नो वाल़े बाल़ कटवाई चुको तेबे पुरोईत खाडूए रा पकेया रा फरकु ओर टोकरिया बीचा ते एक बिना सजेड़े री रोटी ओर एक बिना सजेड़े री पापड़ी लई की नाज़ीरो रे आथो रे देई देओ, 20फेर पुरोईत इना ईलाणे री पेंट करी की यहोवे रे सामणे ईलाओ; ईलाई री छाती ओर चढ़ाई री खुटिया ये बी पुरोईतो खे पवित्र इस्सा ऊणा; इजी ते बाद से नाज़ीर अंगूरा रा रस पी सकोआ।
21नाज़ीरो री मान्नता रे चढ़ावे रा बी येई बिधान ऊणा। यहोवे खे जो चढ़ावा से आपणी आँऊदणिया रे मुताबिक चढ़ाई सको, तिजी ते जादा जेड़ी तिने मान्नत मानी री ओ तेड़ी ई आपणे लग रणे रे बिधानो रे मुताबिक तेसखे करना ओगा।
पुरोईता रा आशीर्वाद देणे रा बिधान
22तेबे यहोवे मूसे खे बोलेया, 23“हारूण ओर तेसरे पाऊआ खे बोल कि तुसे इस्राएलिया खे इना वचना ते आशीष देया करो।
24यहोवा ताखे आशीष देओ
ओर तेरी रक्षा करो
25यहोवा तां पाँदे आपणे मुंए रा तेज चमकाओ
ओर तां पाँदे दया करो:
26यहोवा तेरी पलाई करो,
ओर ताखे शान्ति देओ।”
27ईंयाँ हारूण ओर तेसरे पाऊआ मेरा नाओं आशीषा रे रूपो रे इस्राएलिया रे सामणे लणा ओर मां तिना खे आशीष देणी।
Currently Selected:
गिणती 6: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
