गिणती 16
16
कोरह, दातान ओर अबीरामो रा तोखा
1एकी दिने लेवी गोत्रो रे कहातो रा पोता, यिसहारो रा पाऊ कोरह रूबेनो रे गोत्रो रे एलीआबो रे पाऊ दातान ओर अबीराम ओर पेलेतो रे पाऊ ओन इना तिंऊँ रूबेनिया साथे मिली की मूसे रे खलाफ बुरा बर्ताव करने लगेया; 2इना तिंऊँ रूबेनिया ते मिली की मण्डल़िया रे 250 इस्राएली परदान, जो सभा रे जाणे माने रे लोक थे, सेयो बी मूसे रा बरोद करने खे पड़काये; 3सेयो सब जणे मिली की मूसा ओर हारूणो रे खलाफ खड़े ऊईगे, ओर तिना खे बोलणे लगे, “तुसे बऊत करी बैठे, एबे बस बी करो; एबे सारी मण्डल़िया रा एक-एक माणूं पवित्र ए ओर यहोवा तिना साथे रओआ; पर तुसे यहोवे री मण्डल़िया ते बी ऊच्चे पदो वाल़े कऊँ बणी रे?” 4ये सुणी की मूसा आपणे मुंए रे पारे पड़ीगा; 5फेर तिने कोरह ओर तेस पीछे चलणे वाल़ी सारी मण्डल़िया खे बोलेया, “प्यागा खे यहोवे दखाई देणा कि तेसरा कुण ए ओर पवित्र कुण ए ओर से आपू गे बुलाई लणा; जो तेस आपू चूणी लणा सेई आपू गे बुलाई बी लणा। 6इजी खे, ओ कोरह, तूँ आपणी सारी मण्डल़िया रे लोका समेत ये कर कि तुसे आपणी-आपणी तंग्यारटी लई आओ; 7ओर काल तिदे आग राखी की यहोवे री मौजुदगिया रे तूप पाणा, तेबे यहोवा जेसखे चूणी लओ सेई पवित्र ठईरना। ओ लेवियो, तुसे अदो ते जादा जाई चुके रे, एबे बस करो।”
8फेर मूसे कोरह खे बोलेया, “ओ लेवियो रे वंशजो, सुणो! 9क्या ये तुसा खे छोटी जी गल्ल जाणोई कि इस्राएलो रे परमेशरे तुसे सारी इस्राएलो री मण्डल़िया ते लग करी की आपणे पवित्र तम्बूए रे मण्डल़िया रे सामणे खड़े ऊई की तिजी री सेवा करने खे आपणे नेड़े बुलाई राखे; 10ओर तूँ ओर तेरे सबी लेवी साथी पाई बी आपणे नेड़े बुलाई राखे? पर एबे तुसे पुरोईत बी बणना चाओए। 11तूँ ओर तेरे चूण्डो रे सब लोक यहोवे रे खलाफ खड़े ऊए; हारूण कुण ए कि तुसे तेसरे खलाफ शकाईत करोए?” 12फेर मूसे एलीआबो रे पाऊ दातान ओर अबीरामो खे बुलाया; पर तिने बोलेया, “आसा तांगे नि आऊणा। 13क्या ये छोटी जी गल्ल ए कि तूँ आसा खे मिस्र देशो ते जो सच्चो खेई बऊत ई पजणे वाल़ा देश ए निकयाल़ी की लई आया कि आसा खे एते सुनसाण जगा रे मारी देओ? ओर एबे तूँ आसा पाँदे बणी की अक्क जताणा चाओआ। 14इतणा ई नि तैं आसे एड़े देशो रे जो सच्चो खेई बऊत ई पजणे वाल़ा देश ए तेती नि पऊँचाए ओर ना ई आसे डोरू ओर अंगूरा रे बगीचे रे अक्कदार बणाए। एबे क्या तूँ आसा लोका खे तोखा देणा चाएया? ना, आसा तो नि आऊणा।” 15तेबे मूसे रा गुस्सा बऊत पड़की गा ओर तिने यहोवे खे बोलेया, “इना लोका रे चढ़ावे कबूल नि कर। मैं तो इना ते एक गह्दा बी नि लई राखेया ओर ना ई इना बीचा ते केसी रा नुकशाण करी राखेया।” 16तेबे मूसे कोरह खे बोलेया, “काल तूँ आपणी सारी मण्डल़िया खे साथे लई की हारूणो साथे यहोवे रे सामणे आजीर ऊणा; 17ओर तुसे सबी आपणी-आपणी तंग्यारटी लई की तिदे तूप पाणा, फेर हर एक आपणी-आपणी तंग्यारटी जो सब मिलाई की 250 लोक ऊणे यहोवे रे सामणे लई जाओ; खास करी की तूँ ओर हारूण आपणी-आपणी तंग्यारटी लई जाएयो।” 18तेबे तिने आपणी-आपणी तंग्यारटी लई की ओर तिदे आग राखी की तिदे तूप पाया ओर मूसा ओर हारूणो साथे मिलणे वाल़े तम्बूए रे दरवाजे पाँदे खड़े ऊए। 19ओर कोरहे आपू पीछे चलणे वाल़ी सारी मण्डल़ी तिना रे खलाफ मिलणे वाल़े तम्बूए रे दरवाजे पाँदे कट्ठी करी ती। तेबे यहोवे री महिमा रा तेज सारी मण्डल़िया रे लोका खे दिशेया।
20फेर यहोवे मूसा ओर हारूणो खे बोलेया, 21“एसा मण्डल़िया बीचा ते तुसे लग ऊई जाओ ताकि आँऊ तिना खे पला बीचे राख करी देऊँ।” 22पर मूसा ओर हारूण दोनो जणे यहोवे रे सामणे मुंए रे पारे पड़ी कि बोलणे लगे, “ओ परमेशर, ओ सबी प्राणिया री आत्मा रे साआ परने वाल़े परमेशर, क्या एकी मर्दो रे पापो री बजअ ते तेरा गुस्सा सारी मण्डल़िया पाँदे पड़ना?”#16:22 इब्रानी 12:9
23यहोवे मूसे खे बोलेया, 24“मण्डल़िया रे लोका खे बोली दे कि कोरह, दातान, ओर अबीरामो रे तम्बूआ रे नेड़े-तेड़े ते अटी जाओ।” 25तेबे मूसा उठी की दातान ओर अबीरामो गे गया ओर इस्राएलिया रे बुजुर्ग लोक तेस पीछे-पीछे गए। 26तेबे तिने मण्डल़िया रे लोका खे चतौणी देई की बोलेया, “तुसे तिना दुष्ट लोका रे डेरेया गे ते अटी जाओ ओर तिना री कोई चीज नि छूणी, केथी एड़ा नि ओ की तुसे बी तिना रे सबी पापो रे फसी की मरी जाओ।”#16:26 2 तीमुथि 2:19 27तो सेयो ये सुणी कि कोरह, दातान ओर अबीरामो रे तम्बूआ रे नेड़े-तेड़े ते अटी गे; तेबे दातान ओर अबीराम बी निकल़ी की आपणी लाड़िया, पाऊआ ओर बाल-बच्चेया समेत आपणे-आपणे डेरेया रे दरवाजे पाँदे खड़े ऊए।
28तेबे मूसे बोलेया, “इजी ते तुसा जाणी लणा कि यहोवे आँऊ पेजी राखेया कि ये सब काम करुँ ओर मैं आपणी मर्जिया ते कुछ नि कित्तेया। 29जे इना माणूंआ री मौत ओरी सबी माणूंआ जेड़ी ओ ओर यो सबी माणूंआ जेड़ा आपणे कित्ते रे कामो रा फल़ पुगतो, तेबे तुसे जाणी लणा कि आँऊ यहोवे नि पेजी राखेया। 30पर जे यहोवे आपणी नऊखी सामर्थ दखाई की सबी ते नये तरीके ते मतलब तरती फटी की तिना खे ओर तिना रा सब कुछ थाले लई जाओ ओर सेयो जिऊँदे जिऊए अधलोको रे पड़ी जाओ, तो तेबे तुसे समजी लणा कि इने माणूंए यहोवे रा नरादर करी राखेया।”
31से ये गल्ला बोली ई चूकी रा था कि जमीन तिना लोका रे पैरा निठा ते फटी गी; 32तेबे तरती फटी गी ओर सेयो ओर तिना रे कअरो रा समान ओर कोरह रे पीछे चलणे वाल़े सारे माणूं जो तेस साथे खड़े थे ओर तिना री सारी जायदात तरतिया रे चली गी। 33ईंयाँ सेयो ओर तिना रा सारा कअर बार जिऊँदा ई अधलोको रे चलीगा ओर तरतिए सेयो टकी ले ओर सेयो इस्राएली लोका री मण्डल़िया बीचा ते लोप ऊईगे। 34ओर जितणे इस्राएली तिना रे चऊँ कनारे थे सेयो तिना रा चींगणा सुणी की ये बोलदे ऊए नठे, “केथी तरती आसा खे बी खाई नि जाओ!” 35तेबे यहोवे गे ते आग निकल़ी ओर तिना 250 तूप चढ़ाणे वाल़े राख करीते।
तंग्यारटी
36तेबे यहोवे मूसे खे बोलेया, 37“हारूण पुरोईतो रे पाऊ एलीआजारो खे बोल कि तिना तंग्यारटिया खे आगी बीचा ते चकी लओ ओर आगी रे फेऊआ खे तेथी ओरे-पोरे सेटी देओ, कऊँकि सेयो पवित्र ए। 38जिने पाप करी कि आपणे ई प्राणा रा नुकशाण करी राखेया, तिना रे तूपदान थेची-थेची की तिना रे पतरे बणाओ कि सेयो बेदिया खे मढ़ने रे कामे आओ; कऊँकि तिने सेयो मां यहोवे रे सामणे राखे रे थे; जेते की सेयो पवित्र ऊईगे रे। ईंयाँ से इस्राएलिया खे एक चेतावणिया रा नशाण ठईरना।”#16:38 इब्रानी 12:3 39तेबे एलीआजार पुरोईते तिना पीतल़ी री तंग्यारटिया खे, जिना रे तिने फूखे रे माणूंए तूप चढ़ाया था, लई की तिना रे पतरे थेची की बेदिया खे मढ़ने खे बणाईते, 40जेड़ी एलीआजर पुरोईतो खे यहोवे मूसे रे जरीये आज्ञा दित्ती थी तिने तिजी रे मुताबिक कित्तेया कि यो पतरे थेची की बेदिया खे मढ़ने रिया तँईं बणवाई ते। ये इजी खे कि इस्राएलिया खे ये गल्ल याद रओ कि हारूणो रे वंशो रा ई यहोवे रे सामणे तूप चढ़ाणे नेड़े जाओ, जे तिजी ते अलावा ओर कोई जाओ तो से बी कोरह ओर तेसरी मण्डल़िया जेड़े नाश ऊई जाणे।
इस्राएलिया दे महामारी
41दूजे दिने इस्राएलिया री सारी मण्डल़ी ये बोली की मूसा ओर हारूणो गे शकाईत करने लगी, “यहोवे री सारी प्रजा रे लोक तुसे काईते।” 42ओर जेबे मण्डल़िया रे लोक मूसा ओर हारूणो रे खलाफ कट्ठे ऊणे लगी रे थे, तेबे तिने मिलणे वाल़े तम्बूए री तरफा खे देखेया ओर देखेया कि बादल़े से टकी ता ओर यहोवे रा तेज दिशणे लगी रा था। 43मूसा ओर हारूण मिलणे वाल़े तम्बूए रे द्धारो रे सामणे जाई की खड़े ऊईगे,
44तेबे यहोवे मूसा ओर हारूणो खे बोलेया, 45“तुसे एसा मण्डल़िया रे लोका बीचा ते अटी जाओ ताकि तुसा दुँईं जणेया खे नुकशाण नि पऊँचो ओर आँऊ तिना खे पला बीचे राख करी देऊँ।” तेबे सेयो मुंए रे पारे पड़ी गे।
46तेबे मूसे हारूणो खे बोलेया, “तंग्यारटिया खे लई की तिदे बेदिया पाँदा ते आग राखी कि तिजी पाँदे तूप पा ओर मण्डल़िया गे फटाफट जाई की तिना रिया तँईं प्राश्चित कर; कऊँकि यहोवे रा गुस्सा बऊत ई पड़की रा, महामारी फैलणे लगी री।” 47मूसे री आज्ञा रे मुताबिक हारूण तंग्यारटी लई की मण्डल़िया गे दौड़ी गा; तेबे बी ये देखी की कि लोका बीचे महामारी फैलणे लगी री, हारूणे तूप बाल़ी की लोका खे प्राश्चित कित्तेया। 48फेर से मरे रेया ओर जिऊँदेया लोका बीचे खड़ा ऊईगा; तेबे महामारी रूकी गी। 49फेर बी कोरह साथे ऊई की जो लोक एसा महामारिया ते मरीगे थे सेयो 14 ह्जार 700 लोक थे।#16:49 1 कुरिन्थ 10:10 50जेबे महामारी रूकी गी तेबे हारूण मिलणे वाल़े तम्बूए रे दरवाजे पाँदे मूसे गे आईगा।
Currently Selected:
गिणती 16: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
