गिणती 11
11
इस्राएलिया रा बड़बड़ाणा ओर तिजी री सजा मिलणी
1तेबे सेयो लोक आपणी तकलीफा रे बारे दे शकाईत करने लगे तो यहोवे तिना रा बड़बड़ाणा सुणेया; जेबे यहोवे तिना री गल्ला सुणिया तो तेसरा रा गुस्सा तिना लोका पाँदे पड़की गा ओर यहोवे री आग तिना रे डेरे दे लगी गी, ओर आगी डेरे खे एकी कूणे खे फूकणा शुरू करिता।
2तेबे लोक मूसे गे आई की मतादा रिया तँईं तेसखे आका पाणे लगे तेबे मूसे यहोवे ते प्रार्थना कित्ती; तेबे से आग बीजी गी, 3तेबे तेते जगा रा नाओं तबेरा पड़ेया, कऊँकि यहोवे री आग तिदे तिना बीचे बल़ी थी।
रोटिया रे बारे दे शकाईत
4फेर इस्राएलो रे लोका साथे जो परदेशी लोक मिली गे थे सेयो खरी रोटी खाणे री इच्छा करने लगे; तेबे इस्राएली लोक बी रोणे लगे ओर बोलणे लगे, “आसा खे मास खाणे खे मिलदा तो कितणा अच्छा ऊणा था?#11:4 1 कुरिन्थ 10:6 5आसा खे सेयो मछलिया याद ए जो आसे मिस्रो दे मुफ्तो दे खाया करुँ थे, तिंयाँ ई सेयो खीरे, खरबूजे, अरा प्याज, प्याज ओर लसण बी जो आसे खाया करुँ थे; 6पर एबे आसा खे मन्ना खांदे-खांदे इच्छ फटी गी री ओर एती एस मन्ने खे छाडी की ओर कुछ पनि दिशदा।” 7मन्ना तो बेणो जेड़ा था, ओर तिजी रा रंग मोतिए जेड़ा था। 8लोक ओरे-पोरे जाई की तिजी खे कट्ठा करो थे ओर चाक्किया दे पीसो थे या ऊखल़ो दे कूटो थे, फेर तसले दे पकाओ थे ओर तिजी रे फुलके बणाओ थे ओर तिजी रा स्वाद तेलो दे बणे दे मालपुड़ेया जेड़ा था। 9राथियो खे डेरे रिया जगा रे जेबे पाल़ा पड़ो था तेबे तिजी साथे मन्ना बी पड़ो था।#11:9 यूह. 6:31
10मूसे सबी करानेया रे माणूंआ खे आपणे-आपणे डेरे रे दरवाजे पाँदे शकाईत करदे ऊए सुणेया ओर मूसे खे बुरा लगेया कि यहोवे रा गुस्सा बऊत ई पड़की रा। 11तेबे मूसे यहोवे खे बोलेया, “तूँ आपणे दासो पाँदे एड़िया मुसीबता कऊँ ल्याया? ओर क्या बजअ ए कि मैं तेरी नजरा रे दया नि पाई, कि तैं इना सबी लोका री जिम्मेबारी मां पाँदे पाईती? 12क्या ये सब लोक मैं ई आपणी कोखा ते पैदा करी राखे? या क्या मैं ई यो पैदा करी राखे, तो तूँ माखे कऊँ बोलेया कि जेड़ा बाओ आपणे दूद पींदे बाल़का खे आपणी गोदा दे चकी की फिरदा रओआ, तिंयाँ ई आँऊ इना लोका खे आपणी गोदा रे चकी की तेस देशो रे लई जाऊँ, जेतेखे देणे री कसम तैं तिना रे बुजुर्गा ते खाई थी? 13इना सबी लोका खे आँऊ इतणा मास केथा ते ल्याई कि देऊँ? ये तो ये बोली-बोली की मांगे रोणे लगी रे कि तूँई आसा खे मास खाणे खे दे। 14आँऊ कल्ला इना सबी लोका रा बोज नि चकी सकदा, कऊँकि ये मेरे सईणे ते बारे ए। 15ओर जे तां मां साथे एड़ा ई बर्ताव करना, तो मां पाँदे तेरी इतणी दया ओ कि तूँ मेरा प्राण एबु ई लई लो, जेते कि आँऊ आपणी एड़ी दशा नि देखी सकूँ।”
मूसा रे जरीये सत्तर अगुवे चुणने
16तो यहोवे मूसे खे बोलेया, “इस्राएली बुजुर्गा बीचा ते सत्तर एड़े मर्द मांगे कट्ठे कर, जिना खे तूँ जाणेया कि सेयो लोका रे बुजुर्ग ओर तिना रे सरदार ए तिना सबी खे मिलणे वाल़े तम्बूए गे ली आओ, कि सेयो तां साथे एती खड़े ऊई सको। 17तेबे आँऊ थाले आई की तां साथे गल्ला करूँगा ओर जो आत्मा तांदे आये तिजी बीचा ते कुछ आत्मा लई कि तिना रे पाऊँगा; तेबे तिना इना लोका रा बोजा तां साथे चकणा, ओर ताखे से कल्ले नि चकणा पड़ना। 18ओर लोका खे बोलो कि कालो खे आपणे आपू खे पवित्र करो, जेबे तुसा मास खाणा; कऊँकि यहोवे तुसा रा रोणा सुणी राखेया जेबे तुसे बोलणे लगी रे थे कि आसा खे मास खाणे खे मिलदा तो अच्छा था! आसे मिस्र देशो रेई खरे थे! तेबेई तो यहोवे तुसा खे मास खाणे खे देणा ओर तुसा खाणा। 19पर तुसा से मास एक दिन, या दो, या पाँज, दस या बीई दिन ई नि, 20पर मीन्ना परी तिजी खे खांदे रणे, जदुए तक से तुसा रे नाको रिये नि निकल़ी जाओ ओर तुसा खे तिजी ते इच्छ नि फटी जाओ, कऊँकि तुसे लोके यहोवा जो तुसा बीचे रओआ तुच्छ जाणी राखेया, ओर तेसरे सामणे ये बोली की रोए कि आसे मिस्रो ते कऊँ निकल़े?”
21पर मूसे उत्तर दित्तेया, “जिना लोका बीचे आँऊ ए तिना बीचे 6 लाख तो पैदल चलणे वाल़े मर्द ईए ओर तुसे बोलोए कि मां तिना खे इतना मास देणा कि सेयो मीन्ना परी तिजी खे खांदे ई रणे। 22जे सेयो सब पेडा-बाकरिया, गाय-बल़द तिना री खातर मारे जाओ तेबे तिना रा मास तिना खे पूरा ऊणा क्या? जे समुद्रो रिया सारिया मछलिया बी तिना खे कट्ठी करिया जाओ तो तिना खे से मास पूरा ऊणा क्या?”
23यहोवे मूसे खे उत्तर देई की बोलेया, “क्या मां यहोवे रे एस कामो खे करने री सामर्थ निए? एबे तां देखणा कि मेरा वचन जो मैं ताखे बोलेया था से पूरा ओआ कि नई।” 24तेबे मूसे तम्बूए ते बारे जाई कि प्रजा रे लोका खे यहोवे री गल्ला सुणाईयां ओर तिने तिना रे बुजुर्गा बीचा ते 70 आदमी कट्ठे करी कि तम्बूए रे चऊँ कनारे खड़े कित्ते।
25तेबे यहोवा बादल़ो रे ऊई की थाले आया ओर तिने मूसे साथे गल्ला कित्तिया ओर जो आत्मा मूसे रे थी तिजी बीचा ते कुछ आत्मा लई की तिना 70 बुजुर्गा रे पाईती ओर जेबे से आत्मा तिना रे समाई गी तेबे सेयो भविष्यबाणी करने लगे। पर फेर ओरी दिने कदी नि कित्ती। 26पर दो परदान माणूं डेरे दे रईगे थे, जिना बीचा ते एकी रा नाओं एलदाद ओर दूजे रे नाओं मेदाद था, तिना दे बी आत्मा आईगी; ये बी तिना बीचा ते थे जिना रे नाओं लिखी राखे थे, पर सेयो तम्बूए गे नि गये थे, ओर सेयो डेरे देई भविष्यबाणी करने लगे। 27तेबे एक जवान दौड़ी की आया ओर मूसे खे बताया कि एलदाद ओर मेदाद डेरे रे भविष्यबाणी करने लगी रे। 28तेबे नूनो रा पाऊ यहोशू, जो मूसे रा मददगार ओर तेसरे चूणे रे वीरा बीचा ते था, तिने मूसे खे बोलेया, “ओ मेरे स्वामी मूसा, तिना खे भविष्यबाणी करने ते रोकी दे।” 29पर मूसे तेसखे बोलेया, “क्या तूँ मेरी बजअ ते जल़ेया? पला ऊँदा कि यहोवे री सारी प्रजा रे लोक भविष्यवक्ता ऊँदे ओर यहोवा आपणा आत्मा तिना सबी रे पाई देंदा!”#11:29 1 कुरिन्थ 14:5 30तेबे फेर मूसा इस्राएलो रे सत्तर बुजुर्गा समेत डेरे दे आया जेते जगा दे सेयो रूकी रे थे।
यहोवे रिया तरफा ते छावणिया रे बटेरा
31तेबे यहोवे री तरफा ते एक बड़ा तूफान आया ओर से समुद्रो ते बटेरा डवाई की डेरेया पाँदे ओर तिजी रे चऊँ कनारे इतणिया लई आया कि सेयो ओरे-पोरे एकी दिनो री बाटा तक जमीना पाँदे दुँईं आथा रे तकरीबन ऊच्चा टेर लगी गा। 32ओर लोक उठी की पूरे दिने ओर पूरी राती ओर दूजे दिने बी बटेरा खे कट्ठा करदे रये; जिने थोड़े ते थोड़ा कट्ठा कित्तिया सेयो बी 100 ते कम नि थिया ओर तिने सेयो डेरे रे चऊँ कनारे फैलाई तिया। 33फेर जेबे मास तिना रे मुंए रेई था ओर सेयो एबु तिजी खे खाई नि सके थे कि यहोवे रा गुस्सा तिना पाँदे पड़की गा, ओर यहोवे बऊत बड़ी महामारी तिना बीचे पाईती। 34इजी खे तेते जगा रा नाओं किब्रोतहत्तावा#11:34 किब्रोतहत्तावा मतलब लाल़ची लोका रिया कबरा पड़ेया, कऊँकि जिने लोके मासो री इच्छा कित्ती थी सेयो तेथी दबाईते थे।#11:34 1 कुरिन्थ 10:6
35फेर इस्राएली किब्रोतहत्तावा ते चली की हसेरोतो रे पऊँचे, ओर तेथी रये।
Currently Selected:
गिणती 11: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
